Adzin z łukašysckich kanałaŭ aburyŭsia tym, što inšyja admaŭlajuć isnavańnie biełarusaŭ jak nacyi
U praŭładnym siehmiencie Telegram nazirajecca «dziŭny fienomien paviarchoŭnaha i vybarčaha ŭsprymańnia», a niekatoryja «piersanažy» prasoŭvajuć «antydziaržaŭny paradak», admaŭlajučy dziaržaŭnaść Biełarusi i biełaruskaj movy. Pra heta napisaŭ adzin z łukašenkaŭskich kanałaŭ.
«Samyja «čyrvonyja kchmiery» staranna vyšukvajuć łajki 2019 hoda ŭ Instagram i ličać heta padstavaj patrabavać kryvi, nie saromiejučysia ramkami zakona ŭ svaich vyrazach i abvinavačańniach. I zusim ža naplavać, što čałaviek robić i rabiŭ karysnaha dla krainy prosta ciapier», — piša kanał «Kibier hraf Vilenskij».
Aŭtar sarkastyčna zaŭvažaje, što «pamiž vielmi važnymi i hučnymi vykryćciami zabytych łajkaŭ, niekatoryja piersanažy prasoŭvajuć usiaho tolki antydziaržaŭny paradak».
Jon piša, što idei, jakija prasoŭvajucca pad prykryćciom zaŭziataj patryjatyčnaści, «krychu bolš, čym całkam, pra adsutnaść biełaruskaj dziaržaŭnaści, movy, historyi, ideałohii i navat naroda jak takoha».
Aŭtar nie nazyvaje imionaŭ «patryjotaŭ», ale piša, što jany «ahitavali ŭ minułym hodzie suprać refierendumu, Kanstytucyi, Dnia narodnaha adzinstva, biełaruskaj movy, a ciapier suprać kiraŭnictva Bresckaj krepaści i navat muzieja Vialikaj Ajčynnaj vajny», a taksama raspalvajuć skandały i chajpujuć nie tolki na pop-kulturnych, ale i na palityčnych temach, «jakija nibyta ŭžo ŭstajalisia».
«Nijakaj abjektyŭnaściu tam i nie pachnie. Usie sovy naciahnutyja na hłobus zhodna z žadanym vynikam. Eklektyčnaść mietadaŭ prama kareluje z eklektyčnaściu ŭsprymańnia niekatoraj častki aŭdytoryi, jakaja addaje pieravahu tamu, kab hetaha nie zaŭvažać», — źjedliva piša aŭtar.
Jon źviartaje ŭvahu na toje, što takaja prapahanda moža adbicca na maładych biełarusach.
«Novaja, maładaja i niejtralnaja aŭdytoryja bolš patrabavalnaja. I kali jana natkniecca na «praŭładnych» kanałach na kantent ab nieisnavańni Biełarusi, dziaržaŭnaści ci movy, na ciemrašalstva, nianaviść, pravavy nihilizm, nieadekvatnaść, šarykaŭščynu, reakcyjanierstva i ckavańnie — nie ciažka pradkazać, jakija vysnovy buduć zroblenyja. I jakija prablemy heta moža abiacać u budučyni», — piša jon.
Paśla 2020 hoda ŭłady raspačali masavyja represii. Adnačasova pačałasia kampanija ŭzmocnienaj rusifikacyi: šmatlikija knihi pa historyi Biełarusi pryznanyja ekstremisckimi, voklič «Žyvie Biełaruś» byŭ zabaronieny, navat krajaznaŭčyja supołki i biełaruskaja łacinka apynulisia pad udaram.
Kanał «Kibier hraf Vilenskij» trymajecca ŭ rečyščy ahulnaha łukašenkaŭskaha kursu, ale ličyć represii praźmiernymi i pieryjadyčna źviartaje ŭvahu na toje, što hramadstva nie ŭsprymaje ideałohii rasijskaha šavinizmu, jakaja stała mejnstrymam dziaržaŭnaj prapahandy i kanałaŭ, źviazanych ź Ministerstvam unutranych spraŭ. Raniej z anałahičnaj krytykaj «infakazački Bondaravaj» vystupiŭ šerah žurnalistaŭ dziaržaŭnych ŚMI i kiraŭnica «Biełaj Rusi» ŭ Hrodzienskaj vobłaści.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta4
Kamientary