Zatrymali za vyviešvańnie nacyjanalnych ściahoŭ Biełarusi i Ukrainy, ale sudzić buduć za «ekstremizm»
U siaredzinie vieraśnia siłaviki zatrymali piać minčukoŭ za toje, što jany vyviesili vialikija nacyjanalnyja ściahi Biełarusi i Ukrainy na fasadzie doma pa vulicy Lesi Ukrainki ŭ Minsku.
Suprać ich zaviali kryminalnuju spravu za «złosnaje chulihanstva, ździejśnienaje hrupaj asob», pavodle č. 2 art. 339 Kryminalnaha kodeksa i źmiaścili ŭsich pad vartu ŭ žodzinskuju turmu, paviedamlaje «Viasna».
Heta Dzianis Varozaŭ, Viačasłaŭ Panciušenka, Volha Cierach, Uładzimir Łavor i Kaciaryna Zareckaja. Ale pieraśled zatrymanych na hetym nie spyniŭsia.
Praz dva tydni paśla ich zatrymańnia Ministerstva ŭnutranych spraŭ pryznała «ekstremisckim farmavańniem» kanał u dadatku Zello, praź jaki kamunikavali minčuki padčas arhanizacyi akcyi.
Śledstva pa spravie skončana. Siarod inkryminujemych artykułaŭ niama «złosnaha chulihanstva», na padstavie jakoha zatrymali i źmiaścili pad vartu palitviaźniaŭ. Ciapier piać čałaviek abvinavačvajecca pa bolš ciažkich artykułach Kryminalnaha kodeksa: č. 1, 3 art. 361—1 (stvareńnie i ŭdzieł u «ekstremisckim farmavańni») i č. 2 art. 361—4 KK (sadziejničańnie ekstremisckaj dziejnaści). Im pahražaje da 7 hadoŭ kałonii.
«Kali niama za što «pasadzić» luboha čałavieka, to možna vybrać z najaŭnych abo stvaryć dla jaho «ekstremisckaje farmavańnie». Tamu što, viadoma, vyviešvańnie ściahoŭ — heta dakładna nie chulihanstva ŭ hetym kantekście, a pakarać za prajavu hramadzianskaj pazicyi vielmi chaciełasia», — prakamientavaŭ pravaabaronca Pavieł Sapiełka.
Padtrymać palitviaźniaŭ možna listami, hrašovymi pieravodami, pasyłkami pa adrasie: Śledčaja turma № 8, 222163, h. Žodzina, vuł. Savieckaja, 22A.
Kamientary