Nad ZŠA źbili nieapaznany abjekt. Špijonskim jaho pakul nie nazyvajuć
Praz tydzień paśla incydentu z kitajskim zondam u niebie nad ZŠA znoŭ źbity latajučy abjekt. Hetym razam źbity abjekt lacieŭ nad Alaskaj i byŭ pamieram ź nievialiki aŭtamabil.
Pradstaŭnik Biełaha doma Džon Kirbi nie staŭ vykazvać zdahadki ab jaho mahčymych funkcyjach, skazaŭ tolki, što abjekt byŭ źbity, bo ujaŭlaŭ pahrozu dla hramadzianskaj avijacyi, piša Bi-bi-si.
Pa słovach Kirbi, ułady ZŠA na hety momant nie mohuć skazać ničoha kankretnaha ab pachodžańni i fizičnych danych abjekta, ale jon byŭ našmat mienšy pa pamiery, čym niadaŭna źbity vajskoŭcami ZŠA pavietrany šar, jaki ŭłady krainy ličać častkaj špijonskaj prahramy Kitaja.
Vajskoŭcy nazirali za abjektam 24 hadziny, pierš čym jon byŭ źbity źniščalnikam F-22 u 13:45 pa miascovym časie ŭ piatnicu pa rašeńni prezidenta Bajdena. Hetuju infarmacyju paćvierdziŭ Pientahon.
«Usio prajšło paśpiachova», — prakamientavaŭ situacyju sam amierykanski prezident u intervju telekanału CNN.
Nijakich inšych abjektaŭ, jakija ŭjaŭlajuć patencyjnuju pahrozu, u pavietranaj prastory nad ZŠA zaŭvažana nie było, paviedamili ŭ Biełym domie.
«Pahroza hramadzianskaj avijacyi»
Ciapierašni abjekt, abłomki jakoha śpiecyjalisty buduć vyzvalać sa ldoŭ la ŭźbiarežža Alaski, byŭ upieršyniu zaŭvažany raźviedvalnymi słužbami ŭ čaćvier na paŭnočnym uschodzie Alaski, niedaloka ad miažy z Kanadaj.
Pa słovach Kirbi, piłoty, ahledzieŭšy abjekt, pryjšli da vysnovy, što ludziej u im niama.
«Nieapaznany abjekt lacieŭ na vyšyni 40 tys. futaŭ [kala 12 km] i ŭjaŭlaŭ saboj niekatoruju pahrozu hramadzianskaj avijacyi», — skazaŭ pradstaŭnik Biełaha doma.
Kamientary