U epicentry ziemlatrusu ŭ Turcyi adzin horad acaleŭ. Mer patłumačyŭ, čamu tak adbyłosia
U tureckaj pravincyi Chataj, jakaja akazałasia adnoj z samych paciarpiełych ad ziemlatrusaŭ na paŭdniovym uschodzie Turcyi, znajšli horad, dzie nie abrynuŭsia nivodny budynak. Pra heta tureckamu telekanału TV5 raspavioŭ mer horada Erziń Akieš Elmasahłu, paviedamlaje BAZA.
Pa słovach mera, Erziń z nasielnictvam 42 tysiačy čałaviek nie tolki acaleŭ, ale i paźbieh čałaviečych achviar. Nivodny miascovy žychar u vyniku ziemlatrusaŭ nie zahinuŭ. «U nas nie było ni čałaviečych achviar, ni traŭm, ni abvałaŭ», — skazaŭ Elmasahłu.
Pry hetym harady Asmanije (u 20 kiłamietrach na poŭnač), Chataje (110 kiłamietraŭ na poŭdzień) i inšyja surjozna paciarpieli ad stychii.
Kiraŭnik horada patłumačyŭ hety fienomien tym, što jon rašuča zabaraniaŭ lubyja parušeńni standartaŭ budaŭnictva. Elmasahłu padkreśliŭ, što jon nie dazvalaŭ budavać bieź licenzii navat svaim svajakam, a budaŭničyja normy detalova praviarajucca. Budaŭniki i žychary horada łajali jaho za hetuju nieprymirymaść, ale 44-hadovy mer nie sastupiŭ cisku.
«U mianie jość vyraznyja ŭjaŭleńni ŭ hetym pytańni — nijakaha niezakonnaha budaŭnictva. Zrazumieła, ludzi zaŭsiody znachodziać sposab budavać biez dazvołu i nahladu. Ale navat kali niemahčyma praduchilić heta na 100 adsotkaŭ, možna skaracić razmach. Ja nie pajšoŭ na kampramis, i heta kaštavała mnie svarki z mnostvam ludziej. Zatoje majo sumleńnie čystaje», — skazaŭ Elmasahłu.
Kamientary