ISW: Adychod z Bachmuta nie budzie spryjać padrychtoŭcy Ukrainy da kontrnastupu
Zachad zaniepakojeny niežadańniem Ukrainy admaŭlacca ad praciahu abarony Bachmuta. Zatoje analityki Instytuta vyvučeńnia vajny ličać takoje rašeńnie Kijeva pravilnym.
U instytucie padkreślili, što Zachad praciahvaje vykazvać zaniepakojenaść adnosna rašučaści Ukrainy ŭtrymlivać Bachmut. U pryvatnaści, hazieta Washington Post paviedamiła, što amierykanskija śpiecyjalisty pa abaronnym płanavańni ličać, što ŭkrainskija siły nie zdolnyja adnačasova abaraniać Bachmut i pačać viasnovaje kontrnastupleńnie, a tamu zaklikali Ukrainu dać pryjarytet viasnovamu kontrnastupu, a nie abaronie Bachmuta.
Zrešty, ISW praciahvaje ličyć, što rašeńnie Ukrainy abaraniać Bachmut źjaŭlajecca stratehična abhruntavanym.
«Abarona Bachmuta prymusiła Kreml vydatkavać značnuju častku PVK «Vahnier» i zadziejničać značnyja resursy pavietrana-desantnych sił dla padtrymki źniasilvajučaha nastupu. Ukrainskaja abarona Bachmuta asłabiła značnyja rasijskija siły i, vierahodna, stvoryć spryjalnyja ŭmovy dla budučaha ŭkrainskaha kontrnastupleńnia.
Kali b rasijskija vojski ŭziali Bachmut biez značnaha supracivu z boku Ukrainy, jany mahli b raźličvać na pašyreńnie apieracyj takim čynam, kab prymusić Ukrainu budavać paśpiešnyja abarončyja pazicyi na mienš spryjalnaj miascovaści. Takim čynam, abarona Bachmuta i stvareńnie Ukrainaj umoŭ dla kontrnastupleńnia źjaŭlajucca ŭzajemadapaŭnialnymi, a nie ŭzajemavyklučalnymi mierami, uličvajučy, što rasijskija vojski praciahnuli b svoj nastup za miežami Bachmuta, kali b Ukraina zdała horad raniej».
Kamientary