Sałdat u Rasii skončyŭ žyćcio samahubstvam, nie žadajučy «jechać va Ukrainu zabivać»
Žychar rasijskaj Piačory Siarhiej Hrydzin pamior 10 lutaha na 21-ym hodzie žyćcia. Siastra napisała ŭ sacsietcy, što brat «tak i nie vierniecca z vojska» i što jon zaŭsiody ŭsich padtrymlivaŭ, ale akazałasia, što padtrymka patrebna była jamu samomu.
«Što ž tak vymatała ciabie, što ty pajšoŭ na taki krok?»— napisała dziaŭčyna.
14 lutaha ŭ rasparadžeńni «7ch7» źjaviłasia fota mahčymaj pieradśmiarotnaj zapiski Hrydzina. U joj napisana, što jaho napiaredadni «ŭpisali ŭ ratacyju va Ukrainu», adkul ź jaho roty nibyta jašče nichto nie viartaŭsia. Sałdat, miarkujučy z tekstu zapiski, paprasiŭ u kamandzira ŭzvoda nie jechać va Ukrainu. Paśla hetaha kamandzir i siaržanty nibyta «nie davali prachodu svaimi ździekami». U zapiscy paznačana, što raspavieści pra ŭsie «ździeki», jakija ździajśniali «hetyja žyvioły», chłopiec nie moža. Ale spadziajecca, što ich pasadziać za daviadzieńnie čałavieka da suicydu.
«Pryniaŭ rašeńnie pamierci tut, na rodnaj ziamli, biez čužoj kryvi na rukach», — napisaŭ aŭtar lista.
Siarhiej Hrydzin słužyŭ u čaści ŭ Padmaskoŭi. Kamandziry nibyta adabrali zapisku, ale kalehi paśpieli jaje sfatahrafavać. U materyjałach pravierki jana adsutničaje.
«7ch7» źviazaŭsia ź dźviuma blizkimi svajačkami Hrydzina. Abiedźvie paćvierdzili, što počyrk padobny da jaho. Pryčynu suicydu vajskoŭcy im nijak nie patłumačyli i pra zapisku nie skazali. Na ciele chłopca byli paboi, jakija potym, pa słovach dziaŭčat, nie adlustravali ŭ zaklučeńni ab śmierci.
«Paśla Novaha hoda jon nam telefanavaŭ i kazaŭ, što jaho chočuć adpravić va Ukrainu. Ale potym jon zrabiŭ vyhlad, što heta byŭ žart. I jak ciapier my zrazumieli, heta, mahčyma, byŭ nie žart», — raspaviała «7ch7» siastra Hrydzina.
Kamientary