 "Trojca". fota - troitsa.net |
Voś tak ciškom-niškom, kupalskaje koła z nazvaj «Trojca» ŭžo 10 hadoŭ u darozie.Zasnavanaje ŭ 1999 hodzie, etna-tryjo zajmajecca spałučeńniem ciapierščyny i zaviadzionki, z pašanaj da žyvoha sprakavietnaha huku, stvaraje sučasnaje. Niezastupnym kiraŭnikom «Trojcy» źjaŭlajecca multyinstrumientalist Ivan Kirčuk, adna z zaŭvažnych postaciaŭ u biełaruskaj etnakultury.
Hurt, jaki vykonvaje narodnuju muzyku, abjeździŭ uvieś śviet, zapisaŭ piać albomaŭ, siarod jakich takija šedeŭry, jak «Žuravy» i «Son-trava», a taksama braŭ udzieł u zapisie saŭndtrekaŭ kinastužak «Maleńkija ŭciekačy» i «Try talery».
Jak «Trojca» budzie adznačać svajo dziesiacihodździe? 15 listapada ŭ vialikaj zali KZ «Minsk» adyhraje vialiki solny kancert «Aŭtabany i mieniestreli».
Na scenie my ŭbačym «Trojcu» nieta. «Razahravać nas nichto nie budzie — my damo rady ŭtroch, — kaža Ivan Kirčuk. — Koliś u Maskvie my sami razahravali Massive Attack: skažu ščyra, było niekamfortna. Da taho ž my suprać razahravańnia jak takoha, my chutčej chacieli b pahružać u daŭniejšyja miełodyi i staražytnyja pulsacyi».
Muzyki abiacajuć, što adsutnaść haściej budzie kampiensavanaja vialikaj kolkaściu razmaitych, cikavych pa hučańni, instrumientaŭ, jakija hurt nažyŭ za 10 hadoŭ svajho isnavańnia. Na scenie razharniecca cełaja etničnaja kuchnia z roznych krainaŭ: i tybieckija čany, i cytra, jakuju hurtu padaryli ŭ Hałandyi, i biełaruski smyk, i arabskaja darbuka, a taksama zvyčajnyja bubny i hitary.
«U nac asablivaje staŭleńnie da kancertaŭ na radzimie, — dadaje Kirčuk. — Kali dzieści za miažoj možna vystupić napaŭsiły, niešta prychavać, pamylacca, to pierad svaimi zrabić toje ciažka: jany ŭsio bačać, usio razumiejuć».
Akramia taho, u honar 10-hodździa svajho hurta, Kirčuk vydaŭ knihu «Aŭtabany i mieniestreli», u asnovu jakoj lehli jaho dziońnikavyja natatki. «Aŭtabany i mieniestreli» — heta najpierš jaskravyja momanty z žyćcia hurta, uražańni ad padarožža pa krainach i kantynientach.
«My bačyli bačyli sotni daroh, rasiejskich, jeŭrapiejskich, dziasiatki nie padobnych adna da adnoj krain, — kaža Ivan Kirčuk. — I zachaciełasia svaje ŭražańni ad vandrovak zachavać. U knizie apisanyja sustrečy ź ludźmi, krajavidy, falkłornyja ekśpiedycyi. Niejkija momanty prychodzili ŭ vieršavanaj formie».
 fota - troitsa.net |
Takim paradkam, śviatkujma 10-hodździe «Trojcy» na ich solnym kancercie. 15 listapada. Vialikaja zała KZ «Minsk». Pačatak a 19.00
