Biełaruskaja chryścijanskaja demakratyja na svaim ustanoŭčym źjeździe vyrašyła, što partyja budzie prymać udzieł u miascovych i prezidenckich vybarach. U rejtynhavym hałasavańni Vital Rymašeŭski pierahnaŭ Alaksandra Milinkieviča.
Dubl dva byŭ nie mienš uračystym, čym pieršaja sproba.
Tolki delehataŭ hetym razam sabrali mieniej — darahaja radaść.
Lidery BCHD Pavał Sieviaryniec i Vital Rymašeŭski.
Kiraŭnictva DK MTZ zabaraniaje zdymać aficyjny ściah sa sceny.
Chadeki vyrašyli ŭdzielničać i ŭ miascovych, i prezidenckich vybarach.
Paśla pieršaj admovy ŭ rehistracyi chryścijanskija demakraty dumali, ci varta pravodzić jašče adzin ustanoŭčy źjezd. Mierapryjemstva nie samaje tannaje, a toje, što zarehistrujuć, to nieviadoma. Vyrašyli treba pasprabavać usio ž.
Miescam zboru, jak i ŭ lutym, staŭ Pałac kultury Traktarnaha zavodu. Praŭda, kab atrymać hetaje pamiaškańnie, daviałosia pahrazić praviadzieńniem źjezdu na Kastryčnickaj płoščy. Čałaviek dziesiać tak i pryjšło na centralny minski plac, ad ich stała viadoma, što na płoščy ŭ hety dzień było šmat milicyjantaŭ u cyvilnym.
Na źjezd volna akredytavali pradstaŭnikoŭ dziaržaŭnych ŚMI. «My adkrytyja dla ŭsich», — skazaŭ na heta P.Sieviaryniec. Nie pabajalisia novaj antyahitki ad telekanałaŭ.
Čym uražvajuć źjezdy BCHD, dyk heta tym, što na ich bačyš absalutna novych ludziej, jakija nie źjaŭlajucca stałymi naviedvalnikami inšych apazicyjnych mierapryjemstvaŭ. Kiraŭnictvu chadekaŭ nasamreč udałosia pryvieści ŭ partyju niezaanhažavanych raniej u palityku.
Kali ludziej pačali zapuskać u zału, to jany pabačyli dva dziesiatki partyjnych ściahoŭ, jaki łunali pad stollu. Na ekranie byŭ bieł‑čyrvona‑bieły ściah z vyjavaj Chrysta. Jak potym vyśvietliłasia, taki prapanoŭvajuć homielskija siabry arhanizacyi. Hučała muzyka. Z kałonak čułasia «Armahiedon, Armahiedon» ŭ vykanańni hurtu «Tezaŭrus», a taksama «Ty i ja za Svabodu».
Ahułam na źjezd sabrałasia 311 delehataŭ, a taksama 332 hości. Siarod haściej byli novapryznačanaja pasoł Vialikabrytanii Razmary Tomas, a taksama Vienhryi Fierenc Kontra. Byli dypłamaty i ź inšych krain.
A voś pradstaŭnictva palityčnych paplečnikaŭ na hetym źjeździe było našmat mienšym, čym na pieršym. Tady byli amal usie hałoŭnyja hulcy ŭ apazicyjnym łahiery — Milinkievič, Labiedźka, Statkievič, Barščeŭski, Kazulin.
Na pieraźjezd pryjšli tolki Stanisłaŭ Šuškievič i Alaksiej Janukievič. Milinkieviča zamianiaŭ Viktar Karniajenka. Zatoje pryvitańnie było pieradadzienaje ad premjer‑ministra Litvy Andrusa Kubilusa i byłoha prezidenta hetaj krainy Vitaŭtasa Łandśbierhisa.
Hałandski sacyjał‑demakrat raskazvaŭ, što nijak nie moh rastłumačyć svaim kaleham, jak ustanoŭčy źjezd partyi moža być paŭtornym. Byli vitańni ad polskaha deputata Jeŭraparłamientu Jacka Pratasieviča i lidera CHDS Hiermanii Ronalda Pofały.
U svaim vystupie Pavieł Sieviaryniec kazaŭ ab tym, što treba zmahacca z karupcyjaj. Jon paabiacaŭ, što aborty i samahubstvy pierastanuć być normaj, kali BCHD pryjdzie da ŭłady.
Sustaršynia BCHD kobryniec Hieorhij Dźmitruk upieršyniu pramaŭlaŭ pa‑biełarusku. Jon havaryŭ pra toje, što va ŭsich susiednich krainach abvieščana baraćba z kazino i załami hulniavych aŭtamataŭ, tady jak u Biełarusi, heta tolki nabiraje abaroty. Dźmitruk pryhadaŭ paśpiachovuju kampaniju BCHD suprać akultyzmu, i zaklikaŭ pačać novuju suprać kazino.
Ksiondz Jury Barok z Hłybokaha nazvaŭ absurdam słovy, što chryścijanin nie moža zajmacca palitykaj.Mienavita Barok napačatku pracy źjezda čytaŭ malitvu «Ojča naš» z sceny.
Było ŭ zali i kolki pjanych pravakataraŭ, jakija paśla hukańnia «Žyvie Biełaruś» kryčali «Žyvie, maza‑faka». Chłopcy z achovy chutka ich pavykidali z zali. Achovaj, darečy, kiravaŭ były palitviazień i «krajoviec» Vadzim Kabančuk, jaki niadaŭna viarnuŭsia z emihracyi. Jahonaja maci Taisa, da słova, uznačalvaje Mahiloŭskuju abłasnuju arhanizacyju BCHD.
Paradavaŭ publiku «maskoŭski hastarbajter» Kastuś Žukoŭski z Homielu, jaki nastojvaŭ na vyłučeńni Vitala Rymašeŭskaha kančatkovym kandydatam ad apazicyi. «Ciapier lesu niama, drotu kalučaha niama, a my svajho kandydata vyłučyć baimsia», — kazaŭ K.Žukoŭski.
Prahramnyja dakumienty partyi byli pryniatyja amal tyja ž, što i ŭ lutym. Sustaršyni taksama zastalisia raniejšymi — Pavieł Sieviaryniec, Vital Rymašeŭski, Hieorhij Dźmitruk i Alaksiej Šein.
Najbolš pryncypovym było pytańnie farmatu ŭdziełu BCHD u vybarach. «Kali prymajem niešta, to vykonvajem abaviazkova», — skazaŭ P.Sieviaryniec.
U miascovych udzielničajem da kanca, vyrašyli delehaty. Choć toj ža Sieviaryniec byŭ za toje, kab abvieścić pra ŭdzieł, ale z kančatkovym farmatam vyznačycca paźniej.
Hieorhij Dźmitruk skazaŭ: «Kali my palityki, to my pavinny ŭdzielničać. Nikoha nie cikaviać, jakija praviły hulni. Heta, jak futbalisty, jany vychodziać hulać i ŭ kiepskaje nadvorje, i kali sudździa kupleny, bo heta ich praca».
Za toje, kab udzielničać u prezidenckich vybarach vykazalisia amal usie delehaty. Najbolš sprečnym było, ci stavić na svajho kandydata i nie hladzieć na inšych, ci ŭsio ž udzielničać u ahulnych prajmieryz, ci ŭvohule ŭžo zaraz źniać svajho Rymašeŭskaha.
Vyrašyli kandydata ad BCHD pakinuć, ale pazmahacca ź inšymi. Chto akažacca macniejšym, toj i budzie ŭdzielničać u vybarach. Sieviaryniec skazaŭ, što adziny budzie vyznačany tym, u kaho akažacca samaja vialikaja inicyjatyŭnaja hrupa.Nakolki nam viadoma, Biełaruski niezaležnicki błok jašče nie vyznačyŭsia, jak budzie adbyvacca pracedura vyłučeńnia adzinaha. A voś BCHD za BNB vyrašyŭ.
Naprykancy adbyłosia rejtynhavaje hałasavańnie, kaho siabry BCHD mohuć padtrymać na nastupnych prezidenckich vybarach. Pryčym hałasavać možna było za niekalkich kandydataŭ.
U vyniku Vital Rymašeŭski atrymaŭ 201 hołas, Alaksandr Milinkievič — 131, Zianon Paźniak — 97, Alaksandr Kazulin — 36, Lavon Barščeŭski — 14, Mikoła Statkievič — 10, Aleś Michalevič — 10, Anatol Labiedźka — 4, Alaksandr Łukašenka — 3, Siarhiej Kalakin — 0.
Adzin dziadula paśla hetaha hałasavańnia kryčaŭ: «Žančynku treba! Dzie Tetčer? Dzie Mierkiel? Niama žančynki. Tolki žančynka niešta zmoža źmianić».
A skončyŭsia źjezd, jak i pačynaŭsia, malitvaj.
