Rasijskija aficyjnyja asoby prasoŭvajuć rytoryku, jakaja daje iłžyvaje ŭjaŭleńnie pra toje, što vajna Rasii va Ukrainie źjaŭlajecca žyćciova važnaj dla dalejšaha isnavańnia Rasijskaj Fiederacyi, pišuć ekśpierty Instytuta vyvučeńnia vajny (ISW) u čarhovaj zvodcy, piša Bi-bi-si.
U intervju telekanału «Rasija 1» 26 lutaha prezident Rasii Uładzimir Pucin papiaredziŭ, što nie viedaje, ci zmoža «ruski narod vyžyć u tym vyhladzie, u jakim jon isnuje siońnia», kali Zachadu ŭdasca «razburyć Rasijskuju Fiederacyju i ŭstalavać kantrol nad jaje askiepkami».
Pucin pačaŭ stvarać umovy dla hetaj infarmacyjnaj kampanii ŭ vystupie pierad Fiederalnym schodam 21 lutaha, abvinavaciŭšy kalektyŭny Zachad u vykarystańni vajny va Ukrainie dla pahrozy isnavańniu Rasii. Z padobnymi zajavami vystupiŭ i namieśnik kiraŭnika Rady biaśpieki Rasii Dźmitryj Miadźviedzieŭ.
«I Pucin, i Miadźviedzieŭ u svaich zajavach vykarystoŭvajuć infarmacyjnuju rytoryku, jakaja pradstaŭlaje vajnu va Ukrainie jak ekzistencyjalnuju dla dalejšaha vyžyvańnia postsavieckaj Rasii, što, vierahodna, źjaŭlajecca sprobaj pradstavić vajnu jak takuju, jakaja maje bolš vysokija staŭki dla Rasii i Zachadu, čym jość na samaj spravie», — pišuć ekśpierty.
Pucin, vierahodna, spadziavajecca stvaryć infarmacyjny fon, kab abvinavacić Ukrainu i Zachad u pahrozie vyžyvańniu Rasii na fonie vajennych niaŭdač Maskvy i padtrymki Zachadam pośpiechaŭ ukraincaŭ na poli boju.
«Pramova Pucina zaklikanaja padahreć padtrymku vajny ŭ Rasii i raspalić na Zachadzie strach pierad niestabilnaściu, jakaja ŭtvorycca paśla raspadu Rasii, kab strymać padtrymku Ukrainy i pierakanać Zachad prymusić Kijeŭ pryniać rasijskija patrabavańni», — zaklučajuć u ISW.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie8
Kamientary