Što Łukašenka moža «pradać» Kitaju i navošta Kitaj padtrymlivaje Rasiju
Z čym i pa što Łukašenka palacieŭ u Kitaj, a taksama pra «stratehičny kašmar» dla Kitaja ŭ efiry «Jeŭraradyjo» raspaviała palitołah Roza Turarbiekava.
Turarbiekava źviartaje ŭvahu na toje, što vizit Łukašenki — nie raptoŭny, heta daŭno zapłanavanaja pajezdka, choć i «dosyć udała zapłanavanaja dla Łukašenki».
Turarbiekava kaža, što ciapier vidavočna, što ŭ Łukašenki isnuje niejkaja vusnaja damoŭlenaść z Kijevam. I niaŭdzieł biełaruskaj armii ŭ vajnie ŭžo pradajecca jak kapitał, u pieršuju čarhu, na źniešnim rynku, pryčym pradajecca nie tolki na zachad, ale i ŭ bok Kitaja.
Ciapier Biełaruś sprabuje prymać aktyŭny ŭdzieł u atrymańni vajennych zakazaŭ z boku Rasijskaj Fiederacyi. Pa zajavach Łukašenki vidać, što jon źbirajecca zarabić na vajenna-pramysłovym kompleksie, jon zajaŭlaŭ ab vytvorčaści snaradaŭ, BPŁA — Kitaj u hetym moža dapamahčy, u tym liku pastaŭkaj kamplektujučych, jakich nie chapaje Biełarusi ŭ suviazi z zachodnimi sankcyjami.
Z druhoha boku, tema supracoŭnictva Rasii i Kitaja — tema numar adzin u suśvietnaj presie. Zachodnija raźviedki adkryta kažuć, što padazrajuć Kitaj u hatoŭnaści pastaŭlać zbroju Rasii. Ale Kitaju važna nie patrapić pad zachodnija sankcyi.
«Ja schilnaja dumać, što Biełaruś moža razhladacca jak adzin z mahčymych abchodnych šlachoŭ. Biełaruś i Kitaj źbirajucca adzin adnamu dapamahać i ŭ hetym».
Turarbiekava źviartaje ŭvahu na toje, što Biełaruś nie trapiła ŭ dziasiaty pakiet sankcyj, dziakujučy pracy łabistaŭ.
Atrymlivajecca takaja šeraja zona, a dla Kitaja, pavodle jaje, šeryja zony — całkam znajomaja reč, miarkuje palitołah.
Tamu Biełaruś budzie «pradavać» Kitaju toje, što ŭžo jaki pakiet sankcyj Biełaruś «nie ŭ pakiecie z Rasijaj».
«Ja dumaju, što Łukašenka pasprabuje hetuju ideju pradać, što Biełaruś zjaŭlajecca aknom mahčymaściaŭ», — kaža jana.
Pavodle Turarbiekavaj, siońnia Kitaj razhladaje Biełaruś vyklučna ŭ kantekście adnosin z Rasijaj. Razhlad Biełarusi ŭ jakaści niezaležnaha subjekta dla Kitaja skončyŭsia ŭ dvaccatym hodzie, kali jana mahła razhladacca jak transpartny kalidor dla Kitaja ŭ ES u abychod Rasii. Ale pratesty 2020 hoda i Sajuznaja dziaržava, jakuju ciapier budujuć, faktyčna pastavili kryž na bačańni Biełarusi jak niezaležnaha aktara.
Biełaruś była cikavaja Kitaju jak niezaležny subjekt tolki z punktu hledžańnia transpartnaha kalidora ź Jeŭrapiejskim sajuzam, a ciapier Biełaruś cikavaja prosta jak častka stasunkaŭ z Rasijaj, miarkuje palitołah.
Navošta Kitaju dapamahać Rasii?
Kitajskaje kiraŭnictva, kitajskija ekśpierty razhladajuć adnosiny pamiž ZŠA, Rasijaj i Kitajem u ramkach stratehičnaha trykutnika, kaža palitołah.
Kitaju nie vyhadna, kab Rasija była nastolki asłablenaja, što Kitaj zastaniecca sam-nasam z ZŠA. Dla Kitaja heta zjaŭlajecca stratehičnym kašmaram, kaža jana. Padtrymlivajučy Rasiju, asłablajučy tym samym Złučanyja Štaty i jeŭrapiejskich sajuźnikaŭ, adnačasova pry słabiejučaj Rasii Kitaj stanovicca hałoŭnym bienieficyjaram situacyi.
Palitołah kaža, što Kitaj byŭ napałochany 24 lutaha, i, samaje hałoŭnaje, napałochany tym, što Rasija apynułasia nie nastolki mahutnaj, kab vyrašyć svaje zadačy ŭ vajnie.
Dla Kitaja stała realnaj pahroza pašyreńnia NATA na ŭschod, u tym liku, i z punktu hledžańnia jadziernaj biaśpieki.
«Dla Kitaja vielmi vialikaje pytańnie i palityčnaja budučynia Rasii. Kali vajna skončycca poŭnaj parazaj Rasii i prychodam da ŭłady ŭ Maskvie prazachodniaha ŭrada abo ŭrada, jaki pojdzie na zhodu z Zachadam u mnohich pytańniach. Voś heta dla ich zjaŭlajecca samym sapraŭdnym stratehičnym kašmaram», — tłumačyć palitołah.
Kamientary