Uładalniki i supracoŭniki handlovych punktaŭ Wildberries abjavili na siońnia ŭsierasijskuju zabastoŭku ŭ jakaści pratestu suprać palityki kampanii. Jak piša «Baza» i inšyja rasijskija ŚMI, u mnohich rehijonach i haradach Rasii tak i nie adčynilisia punkty vydačy zakazaŭ.
Pratest źviazany z tym, što Wildberries biez mahčymaści asprečvańnia pačaŭ štrafavać supracoŭnikaŭ za viartańnie klijentami brakavanaha ci padmienienaha tavaru, navat kali jon takim nie źjaŭlajecca. Havorka idzie pra śpisvańnie 100% koštu takich tavaraŭ i pra ŭtrymańnie da 40% zarobku.
Heta, pa słovach pratestujučych supracoŭnikaŭ, źjaŭlajecca «pierakidvańniem strat kampanii na ich plečy». A ŭ internecie ŭžo stali masava źjaŭlacca fatahrafii i videa z dokazami raspačataj zabastoŭki.
«Heta vyklikała ŭ nas šok. Tavar moža być skradzieny abo padmienieny na składzie, u pieravozčyka abo ŭ sartavalnym centry — dy dzie zaŭhodna. My ščyra nie razumiejem, čamu nas zrabili vinavatymi», — raspavioŭ vydańniu Forbes adzin z supracoŭnikaŭ Wildberries.
U sietcy stali masava źjaŭlacca dokazy začynienych punktaŭ vydačy zakazaŭ Wildberries pa ŭsioj Rasii. Fota: sacsietki
U kampanii ŭ adkaz zajavili, što nijakaha «buntu i šturmu» nie adbyvajecca, a tyja, chto raspaŭsiudžvaje infarmacyju ab zakryćci punktaŭ vydačy zakazaŭ, tolki robiać z kamara kania.
«Telehram-kanały zrabili z kamara kania i pakazali heta jak «bunt» abo «šturm» našych partnioraŭ, ale jany pradstaŭlajuć tolki 0,1% ad ich ahulnaj kolkaści», — paviedamiła vydańniu It's My City kiraŭnictva Wildberries.
Akramia taho, Wildberries pačała dadatkova štrafavać na 100 tysiač rasijskich rubloŭ (kala 1300 dalaraŭ) za lubuju niedakładnuju i abraźlivuju infarmacyju ab spravach kampanii, a taksama błakavać vyvad srodkaŭ z płatformy dla tych supracoŭnikaŭ i partnioraŭ, jakija majuć daŭhi pa štrafach.
Pratestoŭcy ž, pavodle ich słoŭ, hatovyja pravodzić zabastoŭku roŭna da taho času, pakul nie buduć vykanany ich patrabavańni (prybrać usie zapazyčanaści pa štrafach, atrymać mahčymaść asprečvańnia daŭhoŭ i ŭtrymańniaŭ z zarpłaty, viarnuć utrymańnie za brak i padmienu tavaru na raniejšyja 25% i inš.).
Usiaho ŭ Rasii płanujuć bastavać kala 7 tysiač punktaŭ vydačy zakazaŭ Wildberries i zvyš 10 tysiač supracoŭnikaŭ kampanii.
Adnak, pavodle apošnich źviestak, kampanija ŭžo pačała masava zvalniać bastujučych supracoŭnikaŭ i razryvać kantrakty ź niezadavolenymi ŭładalnikami punktaŭ vydačy zakazaŭ. Akramia hetaha, Wildberries užo adpraviŭ fury dla taho, kab zabrać usie tavary z začynienych handlovych punktaŭ, piša «Baza».
Nahadajem, što jašče ŭ minułym hodzie biełaruski filijał Wildberries pravodziŭ praktyku płatnaha viartańnia tavaru klijentami, za što potym byŭ aštrafavany. Taksama ŭ katałohu internet-kramy kampanii prakuratura Homielskaha rajona niadaŭna znajšła «tavary z nacysckaj simvolikaj».
U samoj Biełarusi prykmiety praviadzienia takoj ža zabastoŭki, jak u Rasii, adsutničajuć. U miascovych čatach, prynamsi, zhadak pra heta niama. U biełaruskim ofisie Wildberries na zvanki našaha žurnalista nie adkazali.
Čytajcie taksama:
Vializnaja chvala aryštaŭ. Siarod zatrymanych — zahadčyk łabaratoryi i były śpiecnazaviec
Śledam za šakaładam Ritter Sport u biełaruskija kramy viarnulisia Merci i Toffifee
«Robicca nievynosna». Ministr ekanomiki Sierbii zaklikaŭ uvieści sankcyi suprać Rasii
...Ale, ludzi maŭkliva i z hetym zhodny