Abłomki źbitaha drona žurnalistam pakazali ŭkrainskija vajskoŭcy. Pa słovach abaroncaŭ, BPŁA źbity z aŭtamata AK-47, piša «Ukrainskaja praŭda».
CNN identyfikavali dron jak Mugin-5, jaki vyrablaje kitajskaja kampanija Mugen Limited, jakaja bazujecca ŭ Siamenie, što na ŭschodnim uźbiarežžy Kitaja. Hetyja BPŁA taksama viadomyja jak «bieśpiłotniki Alibaba», bo ich možna kupić pa košcie da 15 tysiač dalaraŭ na kitajskich internet-płatformach Alibaba i Taobao.
Kampanija paćvierdziła CNN, što heta ich dron, i nazvała incydent «hłyboka prykrym».
Sa słoŭ žurnalistaŭ, u noč ź piatnicy na subotu Słužba biaśpieki Ukrainy paviedamiła im, što ŭkrainskija ahienty na akupavanaj terytoryi papiaredzili, što adtul byŭ zapuščany BPŁA. Paśla hetaha SBU padniała pa tryvozie voinskija čaści, jakija bazujucca na ŭschodzie Ukrainy, pablizu horada Słaviansk.
Kala 2 hadzin nočy bajcy 111-j bryhady sił terytaryjalnaj abarony pačuli bieśpiłotnik nad hałavoj i navat ubačyli, jak na latalnym aparacie zamihała sihnalnaja lampa. Vajskoŭcy adkryli ahoń i źbili dron. Sa słoŭ bajca, na jakoha spasyłajecca SNN, bieśpiłotnik lacieŭ na vielmi nizkaj vyšyni.
Na nasavoj častcy źbitaha aparata, pa słovach žurnalistaŭ, bačnaja adtulina ad kuli. Ukrainskija vajskoŭcy taksama pakazali žurnalistam nievialiki kratar, utvorany hruzam drona — bombaj vahoj prykładna 20 kh. Bajcy abiasškodzili snarad i pieradali SNN videa padryvu.
Vydańnie źviarnułasia ŭ Ministerstva abarony Rasii pa kamientaryj pa hetym incydencie, ale nie atrymała adkazu.
Pradstaŭnik Mugin Limited zajaviŭ SNN, što kampanija «nie paturaje takomu vykarystańniu i robić usio mahčymaje, kab spynić heta». U zajavie, apublikavanaj na sajcie kampanii 2 sakavika, Mugin Limited śćviardžaje, što «asudžaje» vykarystańnie svajoj pradukcyi padčas vajennych dziejańniaŭ, i paviedamiła, što spyniła pradavać pradukcyju ŭ Rasiju ci Ukrainu z pačatkam vajny.
CNN taksama źviazałasia z paŭtuzina inšych kampanij, čyje elektronnyja kampanienty byli zaŭvažanyja ŭ źbitym BPŁA, siarod jakich jość tajvański vytvorca elektronnych pryład MKS Servos.
Apošni prakamientavaŭ incydent nastupnym čynam: «Niekatoryja vytvorcy BPŁA mohuć vykarystoŭvać siervapryvady MKS u svaich hatovych praduktach dla vajennaha vykarystańnia, nam heta nie padabajecca, i heta supiarečyć misii i bačańniu našaj kampanii».
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ138
Kamientary