Chutka ŭ ludziej vypracujecca imunitet, i A/H1N1 adstupić, zapeŭnivaje doktar Źmicier Sałoškin. Prapanujem jaho aŭtarytetnyja parady.
Panika moža być strašniejšaja za epidemiju. Pierad tym jak biehčy ŭ apteku pa niemavied što, karespandenty NN daviedalisia ŭ doktara Źmitra Sałoškina, z čym jaduć hety śviny hryp i čym ad jaho ratavacca.
«Naša Niva»: Što takoha strašnaha ŭ śvinym hrypie?
Źmicier Sałoškin:
Hryp ź virusnych chvarobaŭ vyklikaje najbolš uvahi, bo jon vielmi źmienlivy. Da jaho niemahčyma prystasavacca i vypracavać stały imunitet.Raz na peŭnuju kolkaść hadoŭ jon kardynalna mianiajecca. Z hetym źviazanyja epidemii, jakija achoplivajuć cełyja kantynienty. Śviny hryp niebiaśpiečny tym, što heta zusim novy vid virusa.
«NN»: Čym uvohule hryp roźnicca ad inšych prastudaŭ?
ZS: Jon maje bolš ciažkaje ciačeńnie i prajavy. Tempieratura źbivajecca horš i na mienšy termin. Jarka vyražanyja prajavy intaksikacyi. Kali heta hryp, to čałaviek budzie niekalki dzion lažać, źbivać tempieraturu na 30 chvilinaŭ ci paru hadzinaŭ. Jamu nie budzie chaciecca ni jeści, ni pić, ni zadavalnieńniaŭ — ničoha. Plus jašče hryp chutka pieradajecca.
«NN»: Siońnia ŭ ludziej idzie stojkaja asacyjacyja: śviny hryp, epidemija, usie pamruć…
ZS:
Panika idzie ad taho, što heta novaje zachvorvańnie. Nie treba dumać, što ad śvinoha hrypu ludzi buduć pamirać, jak ad chalery naprykład. Chutka ŭ ludziej vypracujecca imunitet, i A/H1N1 adstupić.
«NN»: Ci vialikaja ryzyka pamierci ad śvinoha hrypu?
ZS: Pamirajuć nie naŭprost ad hrypu, a ad jaho ŭskładnieńniaŭ. Naprykład, pnieŭmanii. Dzieci, staryja ci ludzi z panižanym imunitetam u niebiaśpiecy pry luboj virusnaj epidemii. Padčas zvyčajnaha hrypu ŭ častki chvorych byvajuć ciažkija prajavy, sardečnaja niedastatkovaść ci paražeńnie lohkich.
«NN»: Ale nasamreč pryčyna śmierci moža chavacca ŭ hrypie?
ZS: Zaŭsiody možna skazać, što čałaviek pamior nie ad śvinoha hrypu, a ad pnieŭmanii. Kali iści dalej u hetaj hulni słovaŭ, usie ludzi na śviecie pamirajuć ad sardečnaj niedastatkovaści. Na što b jany ni chvareli, urešcie spyniajecca serca i čałaviek ličycca niežyvym.
Čałaviek zachvorvaje na hryp, jaki vyklikaje zapaleńnie ŭ arhaniźmie. Lohkija — adzin ź pieršych orhanaŭ, što traplajecca na šlachu infiekcyi. Adbyvajecca zapaleńnie, jakoje možna interpretavać jak pnieŭmaniju. Dalej moža być pryhniacieńnie imunitetu, raźvivajecca tatalnaja reakcyja ŭ lohkich, što vyklikaje parušeńnie dychańnia, sardečnaj dziejnaści i śmierć čałavieka. Dalej idzie hulnia. Kali patrebna pa statystycy, kab heta było nie ad hrypu, to budzie zapisana: virusnaja pnieŭmanija. Kali nie patrebna — zapišuć: uskładnieńni ad hrypu.
Hałoŭnaje, kab nie vyjšła tak, što ŭsich buduć zaličvać jak chvorych na hryp, navat ludziej ź infarktami i bolami ŭ hrudziach.
Nahniatańnie isteryi niebiaśpiečnaje, bo ŭsie pačynajuć dumać tolki pra hryp i zabyvajucca na inšyja chvaroby.
«NN»: Kali heta ŭsio ž taki hryp. Čym lačycca?
ZS: Harantavanaha preparatu niama. Zbolšaha heta dapamožnyja preparaty, roznyja čałaviečyja interfierony, jakija zakapvajuć u nos i padvyšajuć imunny barjer.
Nie varta pieranosić ciažkija prajavy hrypu na nahach. Nie treba bajacca, što bieź ciabie zavalicca praca firmy ci ŭstanovy.
«NN»: A jak ža časnyk, cybula, harbata?
ZS:
Čałaviek, jaki vieryć u časnyk ci alej čajnaha dreva, adčuvaje siabie abaronienym. U jaho lepšy nastroj, vypracoŭvajucca endarfiny, jakija stymulujuć arhanizm i trymajuć u tonusie. Vypracoŭvajucca standartnyja achoŭnyja rečyvy (interfierony, imunahłabuliny) i ŭskosna sapraŭdy jon bolš abaronieny ad virusaŭ.
Takim čynam, možna i seks paraić ludziam. Heta taksama vialiki vykid endarfinaŭ, jakija buduć mieć supraćvirusnaje dziejańnie. Psichika čałavieka — našmat macniejšy instrumient, čym hetyja leki.
«NN»: Dyk varta prosta zastavacca ŭ pazityŭnym nastroi? I nie abaviazkova nasić paviazki?
ZS:
Paviazki — heta štučny barjer, jaki dapamahaje, kali ty jeździš u mietro ci ŭ aŭtobusie. Pryčym masku treba mianiać kožnyja 2-3 hadziny.Ale kali čałaviek budzie ŭ stresie, paviazka jaho nie ŭratuje. Bo na hety stres arhanizm budzie vykarystoŭvać unutranyja siły, jakija mahli b pajści na budaŭnictva interfieronaŭ i procistajańnie infiekcyjam.
* * *
Interfierony
heta peŭnyja białki z padobnymi ŭłaścivaściami, jakija vydzialaje arhanizm u adkaz na źjaŭleńnie virusa. Čałaviečyja interfierony pradajucca ŭ ampułach. Ich treba razbaŭlać i zakapvać u nos. Pakul interfierony žyvyja, jany baroniać ad virusaŭ.
Usie naviny na temu epidemii hrypu, parady, daviedki i žarty
Kamientary