«Usie siłavyja viedamstvy vykonvajuć palicejskija funkcyi, a Łukašenka zachoŭvaje nad imi poŭny kantrol». Vyjšaŭ dakład Dziarždepartamenta ZŠA pa situacyi ŭ Biełarusi
Łukašenka «umacavaŭ svaju ŭładu nad usimi instytutami i padarvaŭ viaršenstva zakona aŭtarytarnymi mietadami, u tym liku falsifikacyjaj vynikaŭ vybaraŭ i pryniaćciem advolnych ukazaŭ», skazana ŭ dakładzie Biuro demakratyi, pravoŭ čałavieka i pracy Dziarždepartamienta ZŠA ab parušeńni pravoŭ čałavieka.
Dakład Dziarždepartamienta ZŠA ab parušeńni pravoŭ čałavieka ŭ Biełarusi — adzin z najbolš abjomnych siarod usich apublikavanych Dziarždepartamientam dakumientaŭ padobnaha kštałtu. Jon uklučaje siem raździełaŭ, u kožnym ź jakich jość pa niekalki punktaŭ.
Amierykanski fiederalny orhan nahadaŭ, što vybarčyja kampanii i pracedury volevyjaŭlenienia hramadzian z 1994 hoda pryznajucca «niesvabodnymi i niespraviadlivymi», u tym liku prezidenckija vybary ŭ 2020 hodzie i kanstytucyjny refierendum u 2022-m.
U Biełarusi «ahienty ŭłady» ździajśniajuć zabojstvy, a ŭzbudžeńnie kryminalnych spraŭ zaležyć ad Śledčaha kamiteta, «jaki padparadkoŭvajecca niepasredna prezidentu», padkreśliŭ Dziarždepartamient.
Usie siłavyja viedamstvy, adznačana ŭ dakładzie, vykonvajuć «palicejskija funkcyi», a Łukašenka «zachoŭvaje nad imi poŭny kantrol». Siłaviki «ahresiŭna, naŭmysna i sistematyčna ździajśniajuć šmatlikija parušeńni», kab «zdušyć palityčnaje inšadumstva i pravy čałavieka».
Dziarždepartamient apieluje da «dakładnych paviedamleńniaŭ» pra «niezakonnyja abo advolnyja zabojstvy, katavańni abo žorstkaje, biesčałaviečnaje, źniavažlivaje dla hodnaści abychodžańnie z boku siłavikoŭ». U dakładzie havorycca pra niebiaśpiečnyja dla žyćcia ŭmovy ŭtrymańnia ŭ turmach, advolnyja aryšty i zatrymańni, «surjoznyja prablemy» ź niezaležnaściu sudovaj ułady, saŭdzieł režymu Łukašenki ŭ vajnie Rasii suprać Ukrainy dy inšaje.
U dakumiencie padrabiazna vykładzienaja infarmacyja pra zakryćcio niedziaržaŭnych arhanizacyj, cisk i pieraśled žurnalistaŭ, cenzuru, sproby aficyjnych uładaŭ «karać členaŭ siemjaŭ za mierkavanyja pravaparušeńni z boku ich svajakoŭ».
«Ułady prymianiali hvałt abo pahrozy hvałtam u dačynieńni da asobaŭ u inšych krainach, u tym liku dla prymušeńnia ich da viartańnia ŭ krainu — u metach palityčnaha matyvavanaha pakarańnia», — havorycca ŭ dakładzie.
Dziarždepartament pierakanany, što pradstaŭniki ŭładaŭ na ŭsich uzroŭniach «dziejničali biespakarana» pavodle ŭkazańnia Łukašenki. Pry hetym, «jak praviła, nie rabiłasia nijakich krokaŭ dla sudovaha pieraśledu abo pakarańnia słužbovych asob va ŭradzie abo siłavych strukturach, jakija parušyli pravy čałavieka».
Ciapier čytajuć
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii3434
Kamientary