ISW: Rasija moža źmianić taktyku naniasieńnia rakietnych udaraŭ z-za niedachopu rakiet
Rasijskija vojski mohuć źmianić taktyku naniasieńnia rakietnych udaraŭ pa Ukrainie, zasiarodziŭšysia na ŭkrainskich vajskovych abjektach, pišuć u čarhovaj zvodcy ekśpierty amierykanskaha Instytuta vyvučeńnia vajny (ISW).
Pavodle ich źviestak, ahulnaja kolkaść rasijskich rakietnych udaraŭ pamianšajecca, što śviedčyć pra vyčarpańnie zapasaŭ vysokadakładnych rakiet.
Pres-sakratar Hałoŭnaha ŭpraŭleńnia vajskovaj raźviedki Ukrainy Vadzim Skibicki zajaviŭ, što rasijskija vojski mohuć pieraaryjentavać svaje ŭdary na ŭkrainskija vajskovyja abjekty i miescy zasiarodžańnia sił, praciahvajučy nanosić udary pa ŭkrainskaj enierhietyčnaj infrastruktury.
Skibicki zajaviŭ, što, pavodle acenki HUR, ciapier u Rasii zastałosia tolki 15% zapasaŭ vysokadakładnaj zbroi, jakaja była da 24 lutaha 2022 hoda, a kryłatyja rakiety «Kalibr», Ch-101 i Ch-555 składajuć mienš za 10% ad ahulnych zapasaŭ.
Sa słoŭ Skibickaha, rasijskija siły nie mohuć pravodzić ataki čaściej za dva razy na miesiac praź nieabchodnaść ekanomii rakiet (vosieńniu minułaha hoda jany pravodzili bujnyja pavietranyja ataki čaściej — prykładna raz na tydzień).
Ekśpierty ISW raniej taksama aceńvali, što rasijski rakietny arsienał vyčerpvajecca, što moža abmiežavać častatu i intensiŭnaść udaraŭ.
Ciapier čytajuć
Bietanavać hrošy — nacyjanalnaja ideja biełarusaŭ? Paraŭnali tempy budaŭnictva ŭ Biełarusi, Polščy, Litvie i Łatvii2
Kamientary