«U Krymie rasijskija bazy stali apornymi punktami dla anieksii». Kavaleŭski pra niebiaśpieku raźmiaščeńnia ŭ Biełarusi jadziernaj zbroi
«Nacyjanalnyja intaresy vyklučajuć u pryncypie rasijskuju vajskovuju prysutnaść na terytoryi Biełarusi», — kaža pradstaŭnik Kabinieta Valer Kavaleŭski.
Jašče 25 sakavika Pucin abjaviŭ, što da 1 lipienia ŭ Biełarusi skončać budaŭnictva schovišča dla taktyčnaj jadziernaj zbroi. Siońnia padčas pasłańnia parłamientu i narodu Łukašenka zajaviŭ, što mienavita ź jahonaj inicyjatyvy jadziernaja zbroja viartajecca ŭ Biełaruś.
«Va ŭmovach vajenna-palityčnaj abstanoŭki, jakaja składvajecca vakoł našaj krainy, mnoju byli aktyvavany nastojliva pieramovy z prezidentam Rasii Pucinym pa viartańni ŭ Biełaruś jadziernaj zbroi. Mienavita pa viartańni jadziernaj zbroi, jakaja była vyviezienaja ŭ 1990-ja hady. Tady pad harantyi: nijakich sankcyj suprać tych, chto vyviez, nijakaha cisku, nastupleńnia ci revalucyi. Usio rastaptana, usio razburana. Ja maju prava pastavić pytańnie viarnuć jadziernuju zbroju, jakuju tady jašče, da mianie, varjaty padpisali abaviazańni jaho viartańnia», — havaryŭ Łukašenka.
Kreml užo pieradaŭ Biełarusi 10 samalotaŭ, zdolnych nieści taktyčnuju jadziernuju zbroju, i rakietny kompleks «Iskander».
Pradstaŭnik Abjadnanaha pierachodnaha kabinieta pa zamiežnych spravach Valer Kavaleŭski kaža, što raźmiaščeńnie jadziernaj zbroi jašče bolš pahražaje našaj niezaležnaści, suvierenitetu i dziaržaŭnaści.
«Heta aznačaje, što ŭ Biełaruś prychodziać niaprošanyja hości — rasijskija vojski, jakija zamacoŭvajucca na našaj terytoryi, pryvoziać jadziernuju zbroju. Ciapier u Biełarusi zastałosia kala 10 tysiač vajskoŭcaŭ — heta vielmi i vielmi kiepska.
Ale kali zabiaśpiečvajecca pastajannaja prysutnaść rasijskich vajskoŭcaŭ, to Rasija moža pajści dalej. My ŭsie bačyli, jak raźvivalisia padziei ŭ Krymie, kali rasijskija vajskovyja bazy stali apornymi punktami dla anieksii», — adznačaje Valer Kavaleŭski.
Palityk zaŭvažaje, što Łukašenka ihnaruje nacyjanalnyja intaresy i stavić pad pahrozu ŭsiu krainu dziela zachavańnia piersanalnaj ułady:
«Nacyjanalnyja intaresy vyklučajuć u pryncypie rasijskuju vajskovuju prysutnaść na terytoryi Biełarusi».
Zajava Pucina pra raźmiaščeńnie taktyčnaj jadziernaj zbroi ŭ Biełarusi zaśpieła Śviatłanu Cichanoŭskuju ŭ Vašynhtonie ŭ čas jaje vizitu ŭ ZŠA 21—28 sakavika. Jak adreahavaŭ amierykanski isteblišmient na takuju pahrozu?
«Siensacyjaj hetaja zajava nie stała, ale jana śviedčyć pra pahražalnaje raźvićcio padziej. My mieli mahčymaść danieści infarmacyju da amierykanskich dypłamataŭ i palitykaŭ i ŭ čas słuchańniaŭ u Sienacie, i ŭ čas słuchańniaŭ u Radzie biaśpieki pry Biełym domie. Śviatłana Cichanoŭskaja abmiarkoŭvała heta pytańnie z daradcam pa nacyjanalnaj biaśpiecy Džejkam Salivanam. ZŠA adsočvajuć situacyju, nazirajuć za jaje raźvićciom. Situacyja vielmi surjoznaja, i my nie chavajem svajoj zaniepakojenaści», — kaža Valer Kavaleŭski.
«Pry lubym vykarystańni jadziernaj zbroi z terytoryi Biełarusi, suprać kaho b ni było, Biełaruś stanovicca mišeńniu dla ŭdaru ŭ adkaz. My, nie majučy realnaha kantrolu nad jadziernaj zbrojaj, tym nie mienš budziem nieści adkaznaść za jaje prymianieńnie.
My stali zakładnikami na hłabalnym uzroŭni, usia kraina stała patencyjnaj mišeńniu z boku tych krain ci błokaŭ, intaresy jakich mohuć być zakranutyja pry vykarystańni jadziernaj zbroi Rasijaj», — vykazvaje aściarohi Kavaleŭski.
Cichanoŭskaja ŭźniała pytańnie jadziernaj zbroi ŭ Biełarusi na sustrečy z Salivanam
Ciapier čytajuć
Žančynie, jakaja vyhuknuła ŭ fiłarmonii «Słava Ukrainie!», dali 20 sutak9
Žančynie, jakaja vyhuknuła ŭ fiłarmonii «Słava Ukrainie!», dali 20 sutak
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3131
Kamientary