KDB zatrymaŭ u Biełarusi hramadzian Polščy i krain Bałtyi «za ahienturnuju dziejnaść»
Staršynia Kamiteta dziaržaŭnaj biaśpieki Ivan Cierciel raspavioŭ žurnalistam, što za ažyćciaŭleńnie ahienturnych apieracyj u Biełarusi zatrymanyja hramadzianie Polščy i krain Bałtyi, pieradaje BiełTA.
«Pryadkryju vam sakret: nami zatrymanaja niekatoraja kolkaść hramadzian Polščy pry ažyćciaŭleńni aktyŭnych apieracyj pa ahienturnaj suviazi na našaj terytoryi. Zatrymanyja zdradniki, ź jakimi jany pracavali na našaj terytoryi», — skazaŭ Cierciel.
Akramia taho, raskazaŭ kiraŭnik KDB, u Biełarusi zatrymanyja «dziasiatki hramadzian Ukrainy» za sproby «ŭčynieńnia teraktaŭ, raźviedvalna-padryŭnuju i špijonskuju dziejnaść».
Siarod zatrymanych «za praviadzieńnie na terytoryi Biełarusi ahienturnych apieracyj» jość i hramadzianie krain Bałtyi, adznačyŭ Cierciel.
Inšyja padrabiaznaści pakul nieviadomyja.
Cierciel miarkuje, što «varta čakać surjoznaj eskałacyi abstanoŭki ŭ našym rehijonie».
Jon śćviardžaje, što na «terytoryi Polščy, Ukrainy, Litvy, Łatvii, Čechii isnujuć łahiery pa padrychtoŭcy bajevikoŭ».
«My viedajem kankretna vierbavalnyja punkty, viedajem, chto hetym zajmajecca. My viedajem łahiery pa ich padrychtoŭcy, viedajem piersanalna instruktaraŭ, chto ŭ hetym dačynieńnich i na jakich etapach prachodzić padrychtoŭku», — zajaviŭ kiraŭnik KDB.
Pa jaho słovach, ź viasny hetyja siły płanujuć aktyvizacyju svajoj dziejnaści na terytoryi Biełarusi.
U toj ža čas Cierciel zajaviŭ, što nichto z zatrymanych u Polščy biełarusaŭ nie maje dačynieńnia da śpiecsłužbaŭ.
15 sakavika Ahienctva ŭnutranaj biaśpieki Polščy zajaviła, što likvidavała špijonskuju sietku, jakaja pracavała na Rasiju i pavinna była rychtavacca da dyviersijnaj dziejnaści ŭ Polščy.
Siarod ich try biełarusy — 41-hadovy Mikałaj Maskalenka, 28-hadovy Uładzisłaŭ Paśmiciucha i jaho dziaŭčyna — 18-hadovaja Maryja Miadźviedzieva.
Łukašenka 22 sakavika zajaviŭ, što Zachad prapanoŭvaŭ jamu abmianiać biełarusaŭ, zatrymanych u Polščy za špijanaž na karyść Rasii.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary