Palitźniavolenaj Viktoryi Kulšy treci raz dadali termin pa kryminalnaj spravie

Sudździa Stanisłaŭ Ivaniucienka pryznačyŭ žančynie jašče hod źniavoleńnia ŭ dadatak da troch z pałovaj hadoŭ kałonii. Raniej Viktoryju ŭžo dvojčy sudzili pa kryminalnych spravach, u tym liku za «niepadparadkavańnie administracyi homielskaj kałonii». Za paŭhoda ŭ rečyckaj kałonii Viktoryja adbyła minimum 92 dni ŭ ŠIZA, a niadaŭna jaje źmiaścili ŭ PKT na šeść miesiacaŭ. 

Palitźniavolenuju inžynierku pa achovie pracy zatrymali 4 listapada 2020 hoda za toje, što jana administravała telehram-kanał i čat «Kiroŭcy 97%». Jaje abvinavacili pavodle č. 1 i č. 2 art. 342 Kryminalnaha kodeksa (arhanizacyja i padrychtoŭka dziejańniaŭ, jakija hruba parušajuć hramadski paradak). U lutym 2021 hoda Viktoryju asudzili da 2,5 hoda kałonii i nakiravali adbyvać termin u homielskuju žanočuju kałoniju.

U červieni žančynu asudzili pavodle art. 411 KK i dadali jašče adzin hod u źniavoleńni. U novaj papraŭčaj kałonii suprać jaje znoŭ zaviali kryminalnuju spravu pavodle hetaha artykuła. 

Viktoryju sudzili za niepadparadkavańnie administracyi homielskaj kałonii № 4.

Tak, siarod «parušeńniaŭ» u jaje byli: «źniščeńnie lista, napisanaha da dački»; «vyjšła ŭ tualet, nie papiaredziŭšy»; «była niavietlivaja z supracoŭnikami papraŭčaj ustanovy»; «znachodziłasia z rasšpilenym huzikam na palito», «kali adčynialisia dźviery kamiery, nie ŭstała, nie pryvitałasia, nie nazvała siabie».

U kałonii palitźniavolenuju pryznali «złosnaj parušalnicaj režymu». U adnosinach da Viktoryi ahułam było vypisana 34 spahnańni.

U homielskaj žanočaj kałonii na vyjaznym pasiadžeńni 14 červienia Viktoryi pryznačyli ŭ dadatak da 2,5 hoda kałonii jašče adzin hod źniavoleńnia.

«Skančeńnie terminu robicca čymści, čaho nie isnuje. Nie razumieju, jak ludzi ŭvohule mohuć z kałonii vyjści», — prakamientavała Viktoryja ŭ liście.

Akramia taho, jana piša, što nie atrymlivaje listoŭ navat ad svajakoŭ ad 3 sakavika minułaha hoda — «ich źniščajuć pa akcie, bo jany nibyta napisany tajnapisam».

Viadoma, što Viktoryja niekalki razoŭ trymała haładoŭku na znak pratestu suprać cisku z boku administracyi. Administracyja kałonii ŭžyvaje suprać žančyny fizičny i psichałahičny cisk. Stan zdaroŭja Viktoryi mocna pahoršyŭsia.

Treci sud nad žančynaj raspačaŭsia 6 krasavika ŭ sudzie Rečyckaha rajona. Na nastupny dzień, 7 krasavika, sudździa Stanisłaŭ Ivaniucienka pryznaŭ Viktoryju vinavataj i prysudziŭ joj jašče adzin hod pazbaŭleńnia voli. Kančatkovy termin składaje čatyry z pałovaj hady kałonii va ŭmovach ahulnaha režymu. Ciapier žančyna znachodzicca ŭ IČU Rečycy i čakaje etapu ŭ homielski SIZA.

• 0
• 1
• 1
• 5
• 27