Dziaŭčynu z Kruhłaha zatrymali adrazu paśla vypusknoha. Paśla načej na hołych doškach da jaje pryjazdžała chutkaja

Alinie Horavaj 20 hadoŭ. Rodam jana z horada Kruhłaje Mahiloŭskaj vobłaści. Z 2018 hoda dziaŭčyna vučyłasia ŭ Barysaŭskim dziaržaŭnym politechničnym kaledžy na śpiecyjalnaści «hieałohija».

27 sakavika jana atrymała dypłom kaledža, ale na śviata nie zastałasia, bo zmušana była pajechać dadomu: da baćkoŭ pryjšli i paviedamili, što na viečar hetaha dnia Alinu vyklikajuć u Kruhlanski RAUS. Pa lehiendzie śledčaha — tolki jak śviedku pa spravie ŭdziełu ŭ pratestach niejkaha pradprymalnika.

Pavialičyć

Dziaŭčynu zatrymali pa pryjeździe ŭ Kruhłaje prosta na aŭtobusnym prypynku. Alinie abjavili, što jana zatrymanaja pa kryminalnaj spravie za ŭdzieł u maršach, imavierna, pa artykule 342. Nieŭzabavie ŭ jaje adbyŭsia pieratrus i dopyt.

Jak raskazvajuć pravaabaroncy, u IČU Kruhlanskaha RAUS było vielmi choładna. Dziaŭčynie nie vydali matrac, joj daviałosia spać na hołych doškach, zabaranili nakryvacca navat ułasnymi rečami. 

Praz try dni Alinie stała drenna. U Aliny padniałasia tempieratura, a taksama abvastryłasia chraničnaje zachvorvańnie nyrak i žanočych orhanaŭ (u dziaŭčyny kista ŭ jaječniku). Joj vyklikali chutkuju (pra pryjezd chutkaj u Kruhlanski RAUS raniej paviedamlali mahiloŭskija pravaabaroncy), ale zabaranili špitalizacyju: siłaviki matyvavali heta tym, što ŭ turmie № 4 u Mahilovie, kudy jaje musiać pieravieści, jość lakarnia.

Ale, nakolki viadoma, paśla etapu ničoha nie źmianiłasia. Turemny lekar, pa słovach pravaabaroncaŭ, nie prapisaŭ dziaŭčynie antybijotykaŭ, niahledziačy na drennyja analizy.

Na dziasiatyja sutki stan jaje pahoršaŭ, boli ŭzmacnilisia, zapaleńnie prahresavała.

U inicyjatyvie biełaruskich miedykaŭ «Biełyja Chałaty» tłumačać, što pry apisanych vyšej skarhach zvyčajna patrabujecca ahlad hiniekołaha i UHD orhanaŭ małoha taza i nyrak. 

Byłaja palitźniavolenaja Volha Kłaskoŭskaja padčas znachodžańnia za kratami mieła prablemy sa zdaroŭjem pa «žanočaj častcy». Jana raspaviała, jak vyhladała miedycynskaja dapamoha, jakuju joj akazvali ŭ žodzinskim SIZA, na Vaładarcy i ŭ homielskaj kałonii.

Pavialičyć

«U mianie «žanočyja» prablemy pačalisia ŭ žodzinskim SIZA. Ja pakutavała ad pastajannaha kryvacioku, asabliva ŭ ŠIZA, — padziałasia jana. —

Miedycynskaja dapamoha akazvałasia nie na naležnym uzroŭni abo častkova była źviazana z prynižeńniem. Da prykładu, u ŠIZA doktar navat nie zachodziŭ u kamieru, kab zrabić ukoł. Jon prymušaŭ zdymać bializnu i prasoŭvać jahadzicy praz «karmušku» — maleńkuju adtulinu, praź jakuju zvyčajna pieradajuć ježu, i ŭsio heta adbyvałasia prosta pad kamierami.

Adnojčy ŭ mianie pačaŭsia kryvaciok z pramoj kiški ŭ ŠIZA. Pryjšła doktarka i skazała, što mnie treba abśledavańnie, ale ŭ kamieru jana zachodzić nie budzie, bo ja «niebiaśpiečnaja». Jana skazała raspranucca dahała i abśledavała mianie praz «karmušku». Ujavicie, jakoje heta prynižeńnie.

Dva razy mnie pravodzili chirurhičnaje lačeńnie. Adzin raz vazili z Vaładarki ŭ špital i adrazu ž pryvieźli nazad, nie daŭšy mahčymaści adyści ad narkozu.

A druhi raz mnie rabili apieracyju ŭ homielskaj kałonii ŭvohule biez aniestezii, spasłaŭšysia na kavid, maŭlaŭ, niemahčyma vyklikać aniestezijołaha. Było vielmi baluča — mnie paśla pieradali, što ja tak kryčała, što mianie było čuvać na ŭsich pavierchach lakarni.

Byvała takoje navat, što lekary mnie z mocnym kryvaciokam kałoli ŭkoły i adpraŭlali na pracu. Taksama prymušali chvoraj chadzić na roznyja ciažkija haspadarčyja pracy».

Volha zhadvaje, što joj składana było dabicca pieradačy lekaŭ, a vypadki, kali joj akazvali miedycynskuju dapamohu jakasna i svoječasova, byli redkija.

Nahadajem, niadaŭna ŭ Kruhłym prajšła abłava siłavikoŭ. Za ŭdzieł u pratestach da suda źmiaścili pad vartu niekalki čałaviek.

• 3
• 0
• 1
• 4
• 3
• 15
• 115
• 0