Rasijskaja mytnia ŭžo dva dni nie afarmlaje hruzy — kažuć, što va ŭsim vinavatyja chakierskija ataki. Zakranuła i Biełaruś
Ranicaj 10 krasavika Fiederalnaja mytnaja słužba Rasii paviedamiła, što ŭ pracy adzinaj infarmacyjnaj sistemy mytnych orhanaŭ nazirajucca zboi. Pryčynaj zbojaŭ nazyvajuć «źniešniaje ŭździejańnie» na IT-resursy mytnaj słužby. Pacikavilisia, jak zakranuli hetyja zboi pracu biełaruskaj mytni, łahistaŭ i pieravozčykaŭ.
Zachraśli hruzy ŭ RF
Biełaruskija śpiecyjalisty sa śfiery łahistyki kažuć, što prypynieńnie pracy rasijskaj mytni choć i adbiłasia na Biełarusi, ale nie pryviało da niejkaha surjoznaha kałapsu, bo našy mytnyja orhany afarmlajuć hruzy bieśpierabojna.
«Hetaja prablema bolš za ŭsio zakranuła tych śpiecyjalistaŭ, jakija mocna źviazanyja z pracaj na RF. Rasijskaja mytnia ŭžo dva dni nie prymaje dakumienty na afarmleńnie hruzaŭ u suviazi sa zbojami ŭ pracy prahramnaha zabieśpiačeńnia.
Praz heta ŭ nas zachraśli hruzy na terytoryi RF. Adzin ź ich zavis u aeraporcie. Kali tam na miescy nie prymuć niejkija adekvatnyja rašeńni, to ad zaŭtra daviadziecca płacić prastoj za znachodžańnie na terminale.
U avijapieravozkach heta vialikija hrošy. Prastoj samalota taksama abychodzicca ŭ kruhłuju sumu», — kaža łahist.
Zakranuła pastaŭki tavaraŭ z Kitaja
Zboi ŭ pracy infarmsistemy FMS zakranuli ŭsie haliny pieravozak i pryviali da prypynieńnia ruchu na transhraničnym moście ŭ Pryamurji, jaki złučaje Rasiju i Kitaj.
Pry hetym surazmoŭca adznačaje, što častka jaho kaleh, jakija nie pracujuć z rasijskim kirunkam, pra prablemy ŭ śfiery daviedałasia tolki siońnia, bo ich heta asabliva nie kranaje.
Inšy surazmoŭca kaža, što zboj u pracy rasijskaj mytni bolš za ŭsio adčujuć na sabie pieravozčyki, čyj transpart vymušany hublać čas na mytni.
Drobnyja zboi adbyvalisia i raniej
«Pracu łahistaŭ takija zboi zakranajuć minimalna, a voś pieravozčyki, čyje mašyny vymušanyja prastojvać na mytni paciarpiać bolš. Im daviadziecca dapłačvać kiroŭcam za prastoj, mohuć sarvacca nastupnyja zahruzki», — ličyć śpiecyjalist.
Łahist kaža, što zboi ŭ pracy adzinaj infarmacyjnaj sistemy mytnych orhanaŭ RF adbyvalisia i raniej, ale prablemy nasili rehijanalny charaktar.
«Zdarałasia, što na niekalki hadzin ci navat na sutki mytnia ŭ niejkim rehijonie Rasii prypyniała pryjom dakumientaŭ praz zboi, ale takoha, kab abrynułasia sistema pa ŭsioj krainie, nie było nikoli».
Surazmoŭca padsumoŭvaje, što kali vyrašyć prablemu atrymajecca siońnia-zaŭtra, to značnych prablem takija zboi nie pryniasuć.
«Kaniešnie, spatrebicca niejki čas, kab razhrebci hruzy, jakija naźbiralisia, ale, prynamsi, pakul ničoha fatalnaha nie adbyłosia. Kudy horš budzie, kali takaja situacyja praciahniecca na 5 i bolej dzion».
U Rasii zboj moža pryvieści da katastrofy ŭ fud-industryi
Kali dla Biełarusi heta moža mieć minimalnyja nastupstvy, to dla Rasii mohuć być surjoznyja prablemy.
«Heta katastrofa dla fud-industryi, kali tavar, jaki chutka psujecca, staić pa niekalki dadatkovych sutak na mytni», — kaža inšy surazmoŭca.
Taksama mužčyna kaža, što kali ŭ ich nie atrymajecca vyrašyć hetyja prablemy, to prypynieńnie pastavak hruzaŭ moža adbicca na pracy niekatorych pradpryjemstvaŭ.
Siarod inšaha pieravozčyki aścierahajucca, što im daviadziecca apłačvać kožnyja dadatkovyja sutki znachodžańnia na ŭnutranych punktach mytnaha afarmleńnia.
Na miažy Biełarusi i Rasii źbirajucca šmatkiłamietrovyja čerhi z fur
Z-za čerhaŭ na polskaj miažy ŭładalniki pieršačarhovych propuskaŭ nie mohuć imi skarystacca
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary