Kiraŭnik MZS Litvy zaklikaŭ admianić vieta Naŭsiedy: U biełarusaŭ jość duchoŭny suvierenitet
Habryelus Łandśbierhis kaža, što niespraviadliva ŭraŭnoŭvać abmiežavańni dla hramadzian Rasii i Biełarusi, pakolki biełaruskaja hramadzianskaja supolnaść aktyŭna zmahałasia z režymam Alaksandra Łukašenki, piša Delfi.lt.
«Nie zhadaju, kab my patrabavali adnolkavych sankcyj dla hramadzian. Kali pamiatajecie, kali ŭvodzilisia abmiežavańni na ŭjezd i dadatkovyja pravierki na miažy, to Litva vielmi vyrazna zajaviła, pry padtrymcy prezidenta, što adroźnieńni buduć», — zajaviŭ ministr zamiežnych spraŭ žurnalistam u aŭtorak u Siejmie.
«I hetaja ŭsia dyskusija, jakaja viałasia ŭ Litvie, napeŭna, paru miesiacaŭ, jana vielmi vyrazna raźmiežavała, što ŭ dačynieńni da rasijskich hramadzian, jakija ŭjazdžajuć u Litvu, na miažy prymianiajucca dadatkovyja pravierki, jakija adkazvajuć ustanoŭlenym Šenhienam patrabavańniam. U dačynieńni da hramadzian Biełarusi takoha prymianieńnia niama», — skazaŭ Łandśbierhis. Tamu, dadaŭ jon, niezrazumieła, pra jakuju paśladoŭnaść dziejnych sankcyj kaža Hitanas Naŭsieda. Pa słovach ministra, usie litoŭskija viedamstvy syšlisia ŭ mierkavańni, što biełaruskaje hramadstva aceńvajecca inakš, čym rasijskaje.
«Mnie zdajecca, što my ŭsie raniej damovilisia, što biełaruskaje hramadstva my aceńvajem jak toje, jakoje zmahałasia za svaju svabodu, demakratyju, niahledziačy na toje što heta — palityčnyja paniaćci, tym nie mienš my razumiejem, što za hetym staić praktyčnaje značeńnie. U 2020 hodzie na baraćbu z režymam u Minsku vyjšli sotni tysiač čałaviek. Takich sprobaŭ zmahacca ŭ Rasii my nie bačym», — padkreśliŭ lidar kansiervataraŭ.
Sa słoŭ ministra, mienavita tamu rozny padychod da abmiežavańniaŭ dla rasijan i biełarusaŭ «lohka patłumačyć». Pa słovach Łandśbierhisa, biełaruskaja apazicyja nieadnarazova prasiła ŭbačyć roźnicu pamiž hramadzianami hetych krain. «Tamu arhumient, čamu my ŭžyvajem roznyja, trochi roznyja padychody da hramadzian Biełarusi i da hramadzian Rasii, mnie zdajecca dosyć lohka rastłumačyć. Tym bolš, što biełaruskaja apazicyja, jakaja žyvie ŭ Litvie, taksama nieadnarazova prasiła nas ubačyć roźnicu pamiž biełarusami i rasijanami», — skazaŭ palityk.
«Biełarusy vałodajuć tym, što my nazyvajem duchoŭnym suvierenitetam. Heta ludzi, jakija vykazali svaju pazicyju i staŭleńnie da svabody, demakratyi, da tych kaštoŭnaściaŭ, jakija važnyja dla nas. Tamu znak roŭnaści ŭ zakonie ja liču niespraviadlivym. Mianie krychu zasmučaje, što nie byli pačutyja arhumienty, vykazanyja jak u Siejmie, tak i apazicyjaj Biełarusi. Nu, a ja budu zaklikać kaleh prahałasavać suprać vieta, kali jano pryjdzie», — padkreśliŭ Łandśbierhis.
Daradca Cichanoŭskaj: Vieta litoŭskaha prezidenta možna pieraadoleć
«Dla Kijeva było b lepš, kab Biełarusi nie isnavała naohuł». Vialikaja razmova z ukrainskim palitołaham Jaŭhienam Mahdam8
Kamientary