Kiravańnie aŭtamabilem, kali čałaviek spaŭ mienš za 5 hadzin, takoje ž niebiaśpiečnaje, jak i kiravańnie pjanym
Statystyka avaryj u śviecie pakazvaje, što kožnaja piataja ź ich adbyvajecca z pryčyny stomlenaści kiroŭcy. A voś kolkaść avaryj, vyklikanych ałkaholem, za apošnija 20 hadoŭ značna skaraciłasia. Vučonyja z Aŭstralii prapanoŭvajuć zakanadaŭča zamacavać normu praciahłaści snu napiaredadni pajezdki.
Navukoŭcy z Univiersiteta Centralnaha Kvinślenda (Aŭstralija) apublikavali vyniki svajho daśledavańnia, u jakim razhledzieli zaležnaść ryzyki patrapić u avaryju ad praciahłaści snu ŭ apošnija 24 hadziny pierad pajezdkaj.
Jany praanalizavali 61 unikalny vypadak dla vyznačeńnia vierahodnaści incydentu, źviazanaha sa stomlenaściu za rulom (uklučajučy avaryju, zasynańnie padčas kiravańnia, traŭmu i pamyłku kiravańnia), na asnovie kolkaści hadzin papiaredniaha snu.
Heta dazvoliła im pryjści da vysnovy, što vierahodnaść avaryi prykładna na 30% vyšejšaja dla ludziej, jakija mieli 6-7 hadzin snu, u paraŭnańni ź ludźmi, jakija dobra adpačyli (8 i bolš hadzin snu).
A voś praciahłaść snu ŭ 4 ci 5 hadzin pryvodzić da značnaha i surjoznaha źnižeńnia efiektyŭnaści kiravańnia i (ci) pavyšeńnia vierahodnaści zasnuć za rulom abo trapić u avaryju.
Vierahodnaść niespryjalnaha vyniku paśla 4-5 hadzin snu padvojvajecca (niekatoryja daśledavańni pakazvajuć značna bolšuju vierahodnaść). Stan ža čałavieka paśla snu takoj praciahłaści anałahičny stanu čałavieka, u kryvi jakoha ŭtrymlivajecca 0,05% ałkaholu.
Niekatoryja daśledavańni pakazvajuć, što kali kiroŭca ŭ apošnija sutki spaŭ čatyry hadziny i mienš, to vierahodnaść patrapić u avaryju moža dla jaho być u 15 razoŭ vyšejšaj.
Aŭtary zadajucca pytańniem, ci nielha niešta zrabić, kab pakazčyk avaryj z-za stomlenaści źniziŭsia. U jakaści prykładu jany pryvodziać kompleks mier, nakiravanych na baraćbu z pjanstvam za rulom. Jany ŭklučajuć šyrokuju adukacyjnuju prahramu, zakanadaŭčaje zamacavańnie normaŭ utrymańnia ałkaholu ŭ kryvi dla kiroŭcaŭ, žorstkija miery pakarańnia, sistemu manitorynhu, šyrokaje infarmavańnie publiki ab sudovych spravach suprać parušalnikaŭ.
Aŭtary ličać, što takim ža čynam možna raspracavać abmiežavańni i dla stomlenaści — vyznačyć dapuščalnuju normu snu dla kiroŭcaŭ.
Navukoŭcy vykazali prapanovu ab tym, kab narmatyŭna zamacavać patrabavańnie da kiroŭcaŭ prytrymlivacca vyznačanaj kolkaści hadzin snu pierad tym, jak sadzicca za rul.
Daśledčyki razumiejuć składanaści realizacyi takoha zakona. U ciapierašni čas niama sposabu acanić stomlenaść na ŭzbočynie — niama analizu dychańnia ci analizu kryvi, jakija mahli b acanić, kolki vy spali ci nakolki vy stomlenyja.
Vučonyja taksama źviarnuli ŭvahu na toje, što son na praciahu apošnich 24 hadzin nie ŭličvaje inšyja faktary, jakija taksama mohuć paŭpłyvać na stomlenaść i kanhnityŭnyja zdolnaści. Naprykład, čas sutak. Viadoma, što nočču značna ciažej być uvažlivym. Akramia taho, na stan kiroŭcy ŭpłyvaje papiaredniaja historyja snu i niaspańnia na praciahu niekalkich dzion.
Akramia hetaha, jość i składanaści inšaha kštałtu. Ludzi sami mohuć vybirać, pić ci nie pić ałkahol pierad tym, jak siadać za rul. Ale nie zaŭsiody i nie ŭsie mohuć vybrać bolš praciahły son. Siarod tych, chto rehularna niedasypaje, naprykład, maładyja baćki, supracoŭniki sa źmiennym hrafikam, pacyjenty, u jakich son parušany z-za dyjahnazu. Tamu, kali ŭvodzić novyja praviły, treba ŭličyć i takija vypadki.
Čytajcie jašče:
Praź niedachop snu ludzi pačali bačyć u siabrach vorahaŭ
Kamientary