Januškievič raskazaŭ, jaki raman Kinha jany vydaduć pa-biełarusku i kali
I praanansavaŭ jašče niekalki navinak.
19 krasavika vydaviec Andrej Januškievič paviedamiŭ, što jaho vydaviectva atrymała prava vydavać knihi Styviena Kinha pa-biełarusku.
«Płanujem vydać jak jaho kłasičnyja tvory, tak i najnoŭšyja. Vydańnie biełaruskich pierakładaŭ asabliva važna tamu, što aŭtar zabaraniŭ vydavać svaje tvory ŭ Rasii. Heta byŭ jahony adkaz na ŭvarvańnie va Ukrainu», — napisaŭ u fejsbuku Andrej Januškievič.
Na biełastockaj knižnaj vystavie Andrej Januškievič paviedamiŭ «Našaj Nivie», što pieršuju knihu — raman Kinha «Źziańnie» (The Shining) — jaho vydaviectva źbirajecca vypuścić sioleta ŭ śniežni.
«Heta toj tvor, paśla jakoha Styvien Kinh staŭ nie prosta admietnym piśmieńnikam u žanry chorar, u žanry žachlivaj litaratury — jon uźniaŭ tvorčaść piśmieńnika na vysoki ŭzrovień psichałahizmu, jaki prosta prabiraje da kaściej. Z hetaha tvora staŭ vidavočnym sacyjalny padtekst tvorčaści Styviena Kinha», — tłumačyć Andrej Januškievič.
Na jaho dumku, tvory Kinha — najlepšy srodak spaznańnia paŭsiadzionnaha žyćcia Amieryki. U ich apisanyja budni zvyčajnaha amierykanca z pravincyi.
Dalej vydaviectva «Januškieviča» miarkuje zaniacca sučasnaj tvorčaściu Kinha i zrabić akcent na tych tvorach, jakija rasijanie nie mohuć vydać z-za palityčnaj pazicyi Styviena Kinha.
«Kinh taki pładavity aŭtar, što my ciapier razmaŭlajem, a jon, vierahodna, zakančvaje novy raman, jaki vyjdzie praz paŭhoda, i my zdolejem uziać, pierakłaści i vydać pa-biełarusku», — kaža Andrej Januškievič.
Andrej Januškievič taksama paviedamiŭ, što na dniach vydaviectva atrymała paćviardžeńnie i kantrakt na vydańnie 4-j i 5-j častak sahi Andžeja Sapkoŭskaha pra «Viedźmara».
Paśla aryštu ŭ 2022 hodzie i vymušanaj emihracyi Andrej Januškievič adnaviŭ vydavieckuju dziejnaść u Polščy. Na čužynu jon vyjechaŭ ź vialikim vydavieckim partfielem: u vyniku fašyzacyi łukašenkaŭskaha režymu šmatlikija vydaviectvy ŭ krainie zakrylisia.
Na vyhnańni kamanda Januškieviča zakłała niekalki handlovych marak: «Januškievič buks» i «Knihaŭka».
Pieršyja knihi «Knihaŭki» ŭžo vyjšli.
«Heta kłasika XX stahodździa — Ernest Cheminhuej i Frensis Ficdžerald. Pieršaja kniha — u pierakładzie ŭžo daŭno pamierłaha Jurki Haŭruka, a druhaja — našaha talenavitaha majstra pierakładu Siarhieja Matyrki, u redakcyi Siarhieja Šupy.
Taksama vydali tut novy tvor Valeryja Hapiejeva. Niachaj čytačy aceniać, nakolki jamu ŭdałasia kniha ŭ žanry fentezi», — raskazvaje vydaviec.
Andrej Januškievič vymušany byŭ zjechać ź Biełarusi vosieńniu minułaha hoda paśla razhromu vydaviectva i kniharni tam. Ministerstva infarmacyi pazbaviła jaho vydaviectva prava vydavać knihi na radzimie. Pad administracyjnym aryštam vydaviec prabyŭ 28 dzion.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary