Biełaruski režysior staŭ siabram Jeŭrapiejskaj kinaakademii

9 maja Jeŭrapiejskaja kinaakademija pryniała ŭ svaje šerahi 462 novych siabroŭ. Razam z amierykanskim akcioram Uiljamam Defo (jaki ŭ kinaakademii pradstaŭlaje Italiju), niamieckim režysioram Frenkam Petcoldam («Na Zachodnim froncie bieź źmien»), dacka-amierykanskim akcioram Elijatam Krosietam Chovam («Zimnija braty»), sierbskaj aktrysaj Jasnaj Džuryčyč («Quo Vadis, Aida?») dy inšymi prafiesijanałami ŭ adzin z samych viadomych kinainstytutaŭ śvietu byŭ pryniaty biełaruski režysior, aŭtar filmaŭ «Kuraž», «Voziera radaści» Alaksiej Pałujan, piša Reform.by.

Na hety momant u siabrach Jeŭrapiejskaj kinaakademii čatyry kiniematahrafisty ź Biełarusi: režysior-dakumientalist Viktar Aśluk, kinaanalityk, prahramny dyrektar Ihar Sukmanaŭ, pradziusarka, zasnavalnica i dyrektarka fiestyvalu Paŭnočnych i Bałtyjskich krain «Paŭnočnaje źziańnie» Vola Čajkoŭskaja i režysior, scenaryst Alaksiej Pałujan.

Aŭtar našumiełaha filma «Kuraž» («Śmiełaść») tak prakamientavaŭ Reform.by svajo ŭstupleńnie ŭ siamju European Film Academy.

— Heta vielmi pryjemny i simvaličny krok, — adkazaŭ jon. — Pryjemny, bo adbyvajecca intehracyja biełaruskaha niezaležnaha kiniematohrafa jašče hłybiej u jeŭrapiejkija instytuty. Simvaličny, bo naša niezaležnaja kultura viartajecca tudy, dzie histaryčna mieła svajo miesca — u Jeŭropu.

—Asabliva pryjemna stać častkaj vialikaj prafiesijnaj supolnaści, jakaja padzialaje kaštoŭnaści aŭtarskaha kiniematohrafa, — padkreśliŭ jon. — Spadziajusia ŭ nastupny hod inšyja maje biełaruskija kalehi i kalažanki dałučacca da nas.

Siońnia biełaruski režysior, jaki žyvie ŭ Bierlinie, pracuje nad novaj stužkaj — poŭnamietražnym hulniavym filmam pad rabočaj nazvaj «U čakańni Biernau» — historyjaj pra toje, jak dyktatarskija režymy źmianiajuć asobu čałavieka.

— Heta taksama budzie historyja pra roźnicu pamiž pakaleńniami ŭ siońniašniaj Biełarusi, — dadaje aŭtar.

— Hety padzieł [pamiž pakaleńniami] ŭ žniŭni 2020 staŭ ahromnistym, — ličyć Alaksiej Pałujan, — i jaho ŭžo nijak nie spynić.

Kiniematahrafist akurat ciapier zakančvaje pracu nad režysiorskim scenarom karciny; a ŭletku raspačniecca pieradvytvorčy pieryjad prajekta: pošuk akcioraŭ, łakacyi i kamandy.

Alaksiej Pałujan taksama zaŭziaje za jašče adnu važnuju inicyjatyvu — Biełaruskuju niezaležnuju kinaakademiju. Nahadajem, što jon źjaŭlajecca adnym z šaści zasnavalnikaŭ novaha instytuta, meta jakoha — zrabić čutnym hołas biełaruskich niezaležnych kiniematahrafistaŭ u śviecie, sadziejničać stvareńniu biełaruskaha kino. Raźvićcio i prasoŭvańnie hetaha važnaha prajekta, jaho padtrymka — taksama ŭ pryjarytetach kinadziejača.

— Spadziajusia, što majo siabroŭstva ŭ Jeŭrapiejskaj kinaakademii dapamoža jašče bolš ščylnamu supracoŭnictvu hetaha instytuta ź Biełaruskaj niezaležnaj kinaakademijaj, — padkreśliŭ režysior.

European Film Academy była zasnavana ŭ 1989 hodzie jaje pieršym prezidentam Inhmaram Bierhmanam i 40 kiniematahrafistami dla prasoŭvańnia intaresaŭ jeŭrapiejskaj kinaindustryi. Stvareńnie jeŭrapiejskaj kinasupolnaści kiniematahrafistaŭ i tym samym pavyšeńnie cikavaści i dastupnaści jeŭrapiejskaha kino dla supolnaści amataraŭ kino źjaŭlałasia i źjaŭlajecca adnym z hałoŭnych napramkaŭ jaje dziejnaścii. Kinaakademija prasoŭvaje jeŭrapiejskaje kino, kulminacyjaj čaho štohod stanovicca Miesiac jeŭrapiejskaha kino i ŭručeńnie Jeŭrapiejskaj kinapremii, a hetaksama sadziejničaje prafiesijnym znosinam filmmejkieraŭ.

Siońnia arhanizacyja naličvaje bolš za 4000 siabroŭ z 52 krain.

• 4
• 0
• 0
• 0
• 1
• 0
• 0
• 0