«Pisaŭ listy ŭ MVF z zaklikami da ŭviadzieńnia sankcyj, abražaŭ Łukašenku»: minskaha błohiera asudzili na piać hadoŭ
Brescki abłasny sud 18 maja zaviaršyŭ razhlad kryminalnaj spravy 42-hadovaha žychara Minska Alaksandra Hurnika.
Mužčynu abvinavacili ŭ arhanizacyi i padrychtoŭcy dziejańniaŭ, jakija hruba parušajuć hramadski paradak, abo ŭdziele ŭ takich dziejańniach (č. 1 art. 342 KK), zaklikach da sankcyj (art. 361-1 KK) i abrazie Łukašenki (č. 1 art. 368 KK).
Sudovy praces, jaki pačaŭsia jašče 16 lutaha, vioŭ sudździa Dźmitryj Kuroŭski, piša «Viasna».
Palitźniavoleny Alaksandr Hurnik — ahient pa nieruchomaści, błohier, aŭtar błoha «Biełaruś u aknie». Na jahony TikTok-akaŭnt byŭ padpisany 431 čałaviek. U rolikach jon humarystyčna kamientavaŭ biełaruskija naviny.
Hurnika zatrymali ŭ kancy červienia 2022 hoda, raźbiŭšy pry hetym akno jaho kvatery. Z apublikavanaha praŭładnym telehram-kanałam videa bačna, što milicyja hrukała ŭ dźviery Hurnika kuvałdaj. Adčynić jaje takim čynam nie atrymałasia, i siłaviki zaleźli ŭ kvateru praz akno. Alaksandra pry hetym mocna źbili.
Alaksandra ŭžo źbivali raniej, u 2020 hodzie: jon trapiŭ pad chvalu katavańniaŭ na Akreścina padčas žnivieńskich pratestaŭ. Pavodle apublikavanaha na jaho staroncy miedycynskaha zaklučeńnia, mužčynu žorstka źbili padčas zatrymańnia na vychadzie z doma 12 žniŭnia i na Akreścina, na jaho ciele było 47 hiematom.
U chodzie razhladu kryminalnaj spravy ŭstanoŭlena, što Hurnik sa žniŭnia pa kastryčnik 2020 hoda «nieadnarazova braŭ udzieł u błakavańni ruchu transpartnych srodkaŭ u Minsku, raźmiaščaŭ u sacyjalnych sietkach videa z abrazami Łukašenki».
U žniŭni 2021 hoda abvinavačany nie mienš za čatyry razy nakiravaŭ listy pradstaŭnikam Mižnarodnaha valutnaha fondu (MVF) z zaklikami, nakiravanymi na pryčynieńnie škody nacbiaśpiecy.
Jak vynik — piać hadoŭ kałonii ŭzmocnienaha režymu.
USU rajać žycharam Biełharadskaj vobłaści vyviešvać žoŭta-błakitnyja ściahi ci pisać BNR, kab paźbiehnuć atak dronaŭ2
Kamientary