Kit-białuha pa imieni Chvałdzimir, jakoha ŭpieršyniu vyjavili čatyry hady tamu ŭ Narviehii i zapadozryli ŭ špijanažy na karyść Rasii, apynuŭsia ŭ rajonie ŭźbiarežža Šviecyi — vierahodna, jon šukaje paru.
Bolš za try hady Chvałdzimir pravioŭ la narviežskaha ŭźbiarežža, paśla čaho ŭ apošnija miesiacy raptam pačaŭ ruchacca ŭ bok Šviecyi. U niadzielu jaho zaŭvažyli la paŭdniova-zachodniaha šviedskaha ŭźbiarežža ŭ rajonie nasielenaha punkta Chuniebastrand, piša «Jeŭrapiejskaja praŭda».
Marski bijołah z arhanizacyi OneWhale Siebaśćian Strand vykazaŭ zdahadku, što Chvałdzimir moh raptam adpravicca ŭ płavańnie, bo šukaje sabie paru abo kampaniju, bo białuhi — vielmi sacyjalny vid.
Pa słovach Stranda, kitu 13-14 hadoŭ, i jon znachodzicca «ŭ takim uzroście, kali jaho harmanalny fon vielmi vysoki». U toj ža čas bližejšaja da Chvałdzimira papulacyja białuh znachodzicca na archipiełahu Špicbierhien, što na krajniaj poŭnačy Narviehii.
U OneWhale zaniepakojenyja tym, što kit, jakoha apošnija niekalki hadoŭ padkormlivali ludzi, moh razvučycca samastojna palavać, i ŭžo zaŭvažyli niekatoruju stratu im vahi.
U 2019 hodzie kala narviežskich vod rybaki zaŭvažyli kita-białuhu, jaki paźniej pasialiŭsia pablizu Chamierfiesta. Jaho dahladali miascovyja žychary i ŭłady. Na žyviole tady zaŭvažyli kamiery, jakija, jak vyjavili narviežskija śpiecsłužby, byli ŭstalavanyja dla špijanažu.
Ličycca, što Chvałdzimir (heta spałučeńnie słova hval, jakoje na narviežskaj aznačaje «kit», i imia Pucina) byŭ častkaj daśledčaj prahramy RF pa vykarystańni kitoŭ dla marskoha špijanažu.
Maskva tak i nie apublikavała nijakaj aficyjnaj reakcyi na zdahadku Narviehii, što białuha była rasijskim špijonam.
Barancava mora, dzie znachodziŭsia Chvałdzimir, — stratehičny hieapalityčny rajon, dzie adsočvajecca ruch zachodnich i rasijskich padvodnych łodak. Heta svojeasablivyja varoty da Paŭnočnaha šlachu, jaki skaračaje marskija padarožžy pamiž Atłantyčnym i Cichim akijanami.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy27
Kamientary