Inžynierna-techničny supracoŭnik VA «Intehrał» na ŭmovach ananimnaści prakamientavaŭ abvinavačvańni ŭ marnatraŭstvie srodkaŭ, jakija Łukašenka ahučyŭ na ŭsiu krainu padčas naviedvańnia pradpryjemstva.
Inžynierna-techničny supracoŭnik VA «Intehrał» na ŭmovach ananimnaści pahadziŭsia raspavieści pra asablivaści submikronnaj vytvorčaści i prakamientavać abvinavačvańni ŭ marnatraŭstvie srodkaŭ, jakija Alaksandr Łukašenka pakazalna ahučyŭ na ŭsiu krainu padčas naviedvańnia pradpryjemstva.
«Prajekt «Submikron K» — heta vytvorčaja linija, pryznačanaja dla apracoŭki paŭpravadnikovych płaścin dyjamietram 200 mm ź minimalnymi prajektnymi normami (minimalnymi pamierami elemienta) 0,35 mk. Dla paraŭnańnia, taŭščynia čałaviečaha vołasa 35 mk — to bok u 100 razoŭ bolšaja. Biez hetaj linii «Intehrał» nikomu nie patrebny. Jaje ŭstalavańnie — žyćciovaja nieabchodnaść.
Abstalavańnie dla linii vielmi darahoje. Tych srodkaŭ, što byli vydzielenyja, chapiła tolki na samaje nieabchodnaje. Ale na toje, kab abstalavać liniju paŭnacenna i sučasna, hrošaj prosta nie chapiła. Tamu prychodzicca dadatkova vykarystoŭvać abstalavańnie sa staroj linii. Ale ŭsie hetyja prablemy, u pryncypie, vyrašajucca, i linija, chacia i nie idealna, pracuje. Pradukcyi pakul sapraŭdy niama, ale da leta ŭsio budzie daviedziena da ładu i pradukcyja pojdzie.
Prablema ŭ inšym. Kudy jaje pradavać? Paŭsiul kryzis. Na linii budzie stvaracca pradukcyja jak vajskovaha, tak i cyvilnaha pryznačeńnia. I kali vajskovaja pradukcyja kuplajecca niezaležna ad cany, to dla realizacyi pradukcyi hramadzianskaha ŭžytku treba, kab jana była rentabielnaj. Ale pakul nie dapracavany techpraces, niama prymalnaha pracentu vychadu hodnych mikraschiem. A praces dapracoŭki doŭhi.
Tyja ličby, što nazyvaŭ Łukašenka — 300 młrd rubloŭ za 4 hady — heta 100 młn dalaraŭ. Pałova hetaj sumy pajšła na novy enierhacech. Heta była inviestycyja ŭ asnoŭnyja fondy, ad jakich nielha čakać prybytku. Dla paraŭnańnia: anałahičnuju liniju zapuskajuć maskvičy. U ich inviestycyi skłali 200 młn jeŭra za dva hady. Abo padobnaja fabryka zapuskałasia dziesiać hadoŭ nazad u Drezdenie firmaj AMD — jany inviestavali 4 młrd dalaraŭ. Tak što
suma, jakaja była vydzielenaja, nasamreč nievialikaja.Mahčyma, jaje možna było vykarystać bolš efiektyŭna, ale ŭ našych umovach zrabić heta składana. Z hetkimi ž prablemami sutykajucca i inšyja pradpryjemstvy. Čamu tolki čatyry dni ŭ tydzień pracuje MAZ, čamu staić hadzińnikavy zavod, viełazavod? Musić, sprava nie stolki ŭ «Intehrale».
Ja liču, što najechali na «Intehrał» daremna. Ale što zrobiš? Treba stavicca da hetaha, jak da nadvorja. Pryrodnyja ŭmovy ŭ Biełarusi takija».
Zapisała Natalla Babina
* * *
U Japonii zavody, anałahičnyja «Intehrału»
budujuć u adkrytym mory na svajach. Tak vyrašajuć prablemu pyłu. Dla vytvorčaści mikraschiemaŭ patrebnaja sterylnaść. U vysokatechnałahičnaj vytvorčaści jość i šmat inšych tonkaściaŭ.
* * *
kamientar redakcyi
Meta raznosu — MVF
U Minsku pajšli čutki, što prosta na prachadnoj «Intehrała» turnikiet vypadkova prycisnuŭ Kolu — da siniakoŭ, što i sapsavała humor tatu. Nadta ž nieadekvatnymi vyhladali najezdy na kiraŭnictva zavoda. Submikronnaja mikraschiema — nie płot. Jaje biez abstalavańnia nie zvarhaniš. A kali i zvarhaniš, dyk nie pradasi. U čym ža sprava, kali surjozna?
Sprava mahła być u pryvatyzacyi.
Uradu treba novaja kredytnaja prahrama MVF. Jaje adkryjuć tolki pry ŭmovie pačatku pryvatyzacyi. Ale ž rasprodaž zavodaŭ piarečyć raniejšym ideałahiemam. Voś i pačałasia terminovaja apracoŭka nasielnictva ŭ novym duchu.Maŭlaŭ, našto trymacca za stratnyja pradpryjemstvy? Davajcie addamo ich ułaśnikam hatovych technałohij. Pieršy kvartał 2010 hoda pakaža, ci my majem racyju z takim tłumačeńniem.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary