«Pačynali zimoj, a trapili ŭ vizavy centr tolki ŭ mai». Dzie tańniej atrymać vizu ŭ Jeŭropu? 

Atrymali italjanskuju vizu biez pasiarednikaŭ

Čytačy, jakija samastojna sprabavali zrabić italjanskuju turystyčnuju vizu, raspaviadajuć, što pačynali łavić datu padačy ŭ vizavym centry jašče ŭzimku, ale padacca na vizu zmahli tolki ŭ siaredzinie maja.

«Zapisacca na daty, što zjaŭlalisia na sajcie, nie ŭdavałasia. Paśla peŭnaha času my pačali dasyłać listy na elektronnuju poštu. Nam adkazali, što možna budzie padać dakumienty ŭ siaredzinie maja», — kaža čytač.

Urešcie biełarusy zabraniravali vizit, ale zapisacca na padaču atrymałasia tolki ŭ VIP-zału, praz što vydatki na čatyroch čałaviek (dvoje darosłych i dvoje dziaciej) skłali kala 1200 rubloŭ.

U vyniku ŭsia siamja atrymała vizy na dva hady. Vizu na taki vialiki termin im vydali z toj pryčyny, što raniej jany ŭžo mieli hadavyja italjanskija turystyčnyja vizy.

Hreckaja turystyčnaja viza praz ahienctva

Inšyja čytačy ŭ krasaviku rabili hreckija šmatrazovyja vizy na kankretnyja daty.

«Rabili ŭsio praz ahienctva, jakoje za svaje pasłuhi ŭziało pa 250 rubloŭ z čałavieka. Za hetyja hrošy padrychtavali nieabchodny pakiet dakumientaŭ, ankietu i zarehistravali na padaču. Da 250 rubloŭ treba dadać košt strachoŭki», — kaža čytačka.

Pavialičyć

Vydatki ŭ vizavym centry skłali jašče kala 60 jeŭra na čałavieka. Heta konsulski zbor i ŭznaharoda vizavamu centru.

Francyja, Vienhryja, Ispanija

Aproč vyšej apisanych krain, turystyčnyja vizy hramadzianam Biełarusi vydaje Francyja, Vienhryja i Ispanija. Praŭda, padać dakumienty na ispanskuju vizu ŭ Biełarusi nielha, tamu daviadziecca jechać u Maskvu. Bolš za toje, atrymać vizu ŭ hetyja krainy da kanca leta ŭžo naŭrad ci ŭdasca. 

Što tyčycca vydatkaŭ, to pasiarednickija pasłuhi dla atrymańnia ispanskaj vizy abyducca pryblizna ŭ 600 rubloŭ na čałavieka. U hetuju sumu ŭvachodzić prajezd ź Minska ŭ Maskvu i nazad, zapis na padaču, ankieta i broń hatela / avijabiletaŭ bieź ich apłaty.

Za mahčymaść atrymać vienhierskuju vizu daviadziecca vykłaści 900 rubloŭ za pasiarednickija pasłuhi.

Košt pasiarednickich pasłuh dla atrymańnia francuzskaj turystyčnaj vizy — kala 600 jeŭra.

Polšča — usio, aproč turyzmu

Polšča turystyčnych viz biełarusam nie vydaje, ale vydaje šerah inšych typaŭ viz.

Samyja papularnyja polskija vizy, jakija atrymlivajuć biełarusy, — pracoŭnaja i haściavaja.

Adna z našych čytačak raspaviała, što pracoŭnaja viza «pad kluč» abyšłasia joj u 1000 rubloŭ. U hetuju sumu ŭvajšli lipavyja zaprašeńnie na pracu i pracoŭnaja damova, a taksama rehistracyja na padaču i vydatki, źviazanyja niepasredna z padačaj na vizu.

«Heta byŭ samy prosty i chutki sposab atrymać vizu. Ad sustrečy z pasiarednikam da atrymańnia vizy prajšoŭ miesiac i niekalki dzion. Usie inšyja varyjanty byli bolš darahija abo praciahłyja pa časie», — dzielicca čytačka.

Pavialičyć

Polskaja viza na 2—3 hady

Aproč pracoŭnych viz, pasiaredniki dapamahajuć rabić polskija dziełavyja vizy. Padrychtavać pakiet nieabchodnych dla padačy dakumientaŭ pasiaredniki hatovyja za 400—500 dalaraŭ. Praściej za ŭsio hety typ vizy mohuć zrabić tyja biełarusy, chto maje dziejnaje IP abo firmu.

Tyja, chto ŭžo raniej mieŭ dziełavuju polskuju vizu, mohuć raźličvać na novuju terminam da piaci hadoŭ, što davoli redkaja zjava. Ale biełarusy, jakija sapraŭdy zajmajucca biznesam i majuć dziełavyja stasunki z polskim biznesam, kažuć, što zvyčajna druhi raz im adkryvajuć dziełavyja vizy terminam na dva-try hady.

Doŭhaterminovaja viza bieź lipavych dakumientaŭ

Haściavaja viza ŭ Polšču taksama davoli papularnaja. Dla jaje atrymańnia dastatkova mieć zaprašeńnie adpaviednaj formy. Zaprašać haściej u Polšču mohuć nie tolki hramadzianie Polščy, ale i inšaziemcy z pastajannym dazvołam na žycharstva (Karta Stałego Pobytu). Samo zaprašeńnie robicca ciaham miesiaca. Plus patrebny čas, kab pierapravić jaho ŭ Biełaruś, paśla čaho možna zapisvacca na padaču. Tamu haściavuju vizu možna atrymać pryblizna praz dva miesiacy paśla zapusku pracedury.

Dla tych, chto nie maje znajomych ci svajakoŭ, jakija hatovyja zaprasić ich da sabie ŭ Polšču, jość pasiaredniki, jakija za 300—400 dalaraŭ hatovyja dapamahčy ŭ rašeńni hetaha pytańnia. Z vydatkami na zapis i inšymi zborami ŭ vizavym centry takaja viza abychodzicca pryblizna ŭ 500 dalaraŭ.

Doraha, ale, u adroźnieńnie ad bolš tannaj i chutkaj pa časie pracoŭnaj vizy, haściavaja, atrymanaja navat z dapamohaj pasiarednikaŭ, budzie bolš biaśpiečnaj i kamfortnaj. Z takoj vizaj vam nie treba budzie dakazvać pamiežnikam, čamu i navošta vy jedziecie za miažu. Dy i atrymać nastupnuju vizu budzie prosta, bo vy nie parušajecie ŭmoŭ jaje vydačy. Čaho nielha kazać pra tych, chto robić pracoŭnyja vizy dziela taho, kab padarožničać i jeździć pa tavary. 

• 0
• 12
• 0
• 3
• 3
• 15
• 7