Borys Džonsan skłaŭ ź siabie deputackija paŭnamoctvy paśla skandału ab viečarynkach na Daŭninh-stryt
Były premjer-ministr Brytanii Borys Džonsan skłaŭ ź siabie paŭnamoctvy deputata Pałaty hramad brytanskaha parłamienta. Heta adbyłosia paśla taho, jak jon atrymaŭ spravazdaču pa spravie ab viečarynkach na Daŭninh-stryt padčas łakdaŭnu.
U piatnicu Džonsan atrymaŭ kopiju jašče nie apublikavanaj spravazdačy parłamienckaha kamiteta, jaki rasśledavaŭ abstaviny arhanizacyi viečarynak u rezidencyi premjera na Daŭninh-stryt padčas łakdaŭnu, uviedzienaha ŭ suviazi pandemijaj karanavirusa, nahadvaje Bi-bi-si.
Aŭtary dakłada, u pryvatnaści, pryjšli da vysnovy, što Džonsan naŭmysna ŭvodziŭ parłamient u zman. Sam eks-premjer zajaviŭ, što spravazdača «maje šmat niedakładnaściaŭ i što jana praduziataja», a členaŭ kamiteta abvinavaciŭ u sprobie vyhnać jaho z parłamienta.
«Jany da hetaha času nie pryviali nijakich dokazaŭ taho, što ja śviadoma ci pa nieaściarožnaści ŭvioŭ Pałatu hramad u zman», — zajaviŭ jon.
U pakazańniach, jakija Džonsan davaŭ kamitetu ŭ sakaviku, jon pryznaŭ, što ŭvodziŭ parłamient u zman, ale admaŭlaŭ, što rabiŭ heta naŭmysna.
Pakinuŭšy pasadu premjera letam minułaha hoda, Džonsan zastavaŭsia deputatam ad adnoj z łondanskich akruh (Aksbrydž i Saŭt-Rajślip), zaraz tam pavinny prajści daterminovyja vybary.
U brytanski parłamient Džonsan byŭ abrany ŭ 2001 hodzie. Paśla adychodu adtul, pa jaho ŭłasnym pryznańni, jon nie maje namieru pakidać palityku.
Borys Džonsan uznačalvaŭ brytanski ŭrad z 2019 pa 2022 hod. Padčas jaho znachodžańnia na čale kabinieta Brytanija aficyjna vyjšła ź ES.
Jaho adychod z pasady premjer-ministra byŭ pa bolšaj častcy vyklikany skandałam ź viečarynkami na Daŭninh-stryt, jaki atrymaŭ nazvu «Partyhiejt» (Partygate).
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy5
Kamientary