Na miažy z Polščaj amal źnikli čerhi ź lehkavikoŭ. Čamu tak adbyvajecca?
Vielizarnyja čerhi ŭ punkcie propusku «Brest — Tarespal» na biełaruska-polskaj miažy stali zvykłaj źjavaj. Asabliva paśla taho jak polski bok prypyniŭ pracu punkta propusku «Babroŭniki». Ludzi naŭprost sutkami stajali, kab źjeździć u Polšču i nazad. Apošnimi dniami situacyja źmianiłasia. «Naša Niva» razabrałasia, čamu tak adbyvajecca.
![](http://nashaniva.com/img/w732d4webp1/photos/z_2023_06/-au8pf.jpg.webp)
Da hetaha tydnia čerhi z 250-350 mašyn na vyjezd ź Biełarusi ŭ punkcie propusku «Brest» byli zvyčajnaj spravaj. Praz heta na miažy navat aktyvizavaŭsia novy vid biznesu, kali ludzi za peŭnuju ŭznaharodu prapanavali pastajać za vas u čarzie. Jany mahli rabić heta jak na vašym aŭto, tak i na svaim.
Ale na hetym tydni situacyja źmianiłasia. Čerhi stali nievialikimi, a ŭ niejkija hadziny całkam adsutničajuć.
Źniknieńnie vielizarnych čerhaŭ vyklikała ździŭleńnie ŭ amataraŭ pajezdak u Polšču. Hetuju temu aktyŭna abmiarkoŭvajuć i karystalniki admysłovych telehram-čataŭ. Padarožniki dzielacca zdymkami i infarmacyjaj, što na miažy pusta ci amal pusta.
![](http://nashaniva.com/img/w732d4webp1/photos/z_2023_06/2023-06-22163737-uz1hx.png.webp)
Ludzi ahučvajuć dźvie asnoŭnyja pryčyny, čamu tak adbyvajecca. Spojler: heta nie bolš chutkaja praca polskich i biełaruskich pamiežnikaŭ i mytnikaŭ.
Asnoŭnaja viersija — polski bok apošnim časam uzmacniŭ kantrol za pieravozkaj cyharet ź Biełarusi. Praz heta, na dumku karystalnikaŭ čataŭ, na miažy źnikli cyharetnyja kantrabandysty.
![](http://nashaniva.com/img/w732d4webp1/photos/z_2023_06/2023-06-22112955-e21pt.png.webp)
Druhaja viersija — umacavańnie polskaj valuty. Kali ŭ pieršy dzień leta za 1 dalar davali 4,2 złotaha, to ciapier tolki 4. Heta robić pajezdki pa zakupy mienš vyhadnymi.
![](http://nashaniva.com/img/w732d4webp1/photos/z_2023_06/-ovg2v.jpg.webp)
Z druhoha boku, umacavańnie złotaha da dalara i jeŭra, naadvarot, pavialičvaje prybytak ad kantrabandy paliva i cyharet. Ale, jak pakazvaje statystyka čerhaŭ na miažy, achvotnych padzarabić na kantrabandzie bolej nie stała. Tamu całkam imavierna, što značnaje źmianšeńnie čerhaŭ adbyvajecca jakraz praz bolš pilnuju ŭvahu polskaha boku da ŭvozu cyharet ź Biełarusi.
![](http://nashaniva.com/img/w732d4webp1/photos/z_2023_06/mycollages43-h1cs7.jpg.webp)
Tym časam pa stanie na 18 hadzin 22 červienia vyjezdu ź Biełarusi ŭ Polšču čakajuć usiaho kala 10 lehkavikoŭ. Dla paraŭnańnia: tydzień tamu ŭ hety čas na miažy było 345 lehkavych aŭto.
-
Što viadoma pra źniavolenych u Biełarusi hramadzian Ukrainy, jakija siońnia niečakana zdabyli volu?
-
Łukašenka nie pavieryŭ Ryžankovu. Piatkievič vyhladaje procivahaj Krutomu. A Kruty — vialikaja zahadka
-
«Ukraina Biełarusi nie pahražaje, my vymušanyja abaraniacca». Ukrainskaja pamiežnaja słužba adkazała biełaruskaj
Kamientary