Chimičnaja kastracyja — jak heta moža pracavać u Biełarusi i ci jana efiektyŭnaja? Tłumačyć ekśpiert

Śpiecyjalist (imia jaho nie raskryvajecca ŭ metach biaśpieki) tłumačyć, što chimičnaja kastracyja — heta pryjom peŭnych preparataŭ, jakija pamianšajuć uzrovień testasteronu i praz heta źnižajuć libida. Takim čynam čałaviek robicca mienš ahresiŭnym, u jaho paharšajecca pałavaja funkcyja i pažada. Tak jak chimičnaja kastracyja — heta miedykamientoznaje ŭździejańnie, jano zbolšaha abaračalnaje, ale hetyja preparaty, jak i lubyja inšyja, majuć svaje pakazańni i supraćpakazańni.

Jak takaja terapija paŭpłyvaje na astatnija sistemy i orhany čałavieka? Testasteron — važny pałavy harmon, jaki ŭpłyvaje nie tolki na seksualnuju funkcyju, ale i na mietabalizm inšych orhanaŭ i sistem, u pryvatnaści, kaściova-sustaŭnaj. Tamu, papiaredžvaje miedyk, kali źmianšać uzrovień testasteronu, heta vykliča peŭnyja pabočnyja efiekty. Ale ź inšaha boku, hetyja ž preparaty vykarystoŭvajuć, kab lačyć ankałahičnyja i endakrynałahičnyja chvaroby, tamu isnuje vialiki dośvied ich vykarystańnia.

Preparaty chimičnaj kastracyi buduć rabić mužčynu bolš fieminnym, jaho reakcyi stanuć miakčejšyja, čałaviek paspakajnieje i stanie bolš razvažlivym.

Naŭrad ci heta adabjecca na im z prafiesijnaha boku, ale, chutčej za ŭsio, trochi źmienicca jaho sacyjalnaje žyćcio. Kali nie prymianiać preparaty doŭha, ciaham niekalkich hadoŭ, naŭrad ci psichika značna źmienicca. A voś na zdaroŭje leki paŭpłyvać mohuć, ale heta, chutčej, indyvidualnaje pytańnie, ličyć seksołah.

Pakul niezrazumieła, jak buduć pracavać u Biełarusi pratakoły chimičnaj kastracyi, ale naš ekśpiert tłumačyć, jak heta zvyčajna adbyvajecca ŭ śviecie.

«Adpaviednyja preparaty prymianiajuć ad 6 da 24 miesiacaŭ pad nahladam miedyka, paralelna pacyjent pracuje ź psichaterapieŭtam. Ludzi pastajanna apisvajuć svaje pavodziny i adznačajucca ŭ miedykaŭ. Kali ŭ čałavieka stanoŭčaja dynamika i śpiecyjalisty jaje paćviardžajuć, a taksama niama niebiaśpieki recydyvu, preparaty pacichu admianiajuć.

Na siońnia chimičnaja kastracyja — heta, chutčej, sposab kantrolu za ludźmi, jakich abvinavacili ŭ piedafilii. Jaje prymianiajuć dziela abmiežavańnia ludziej, u tym liku tych, jakija ŭžo adbyli termin źniavoleńnia, kab źnizić imaviernaść recydyvu. Taksama chimičnaja kastracyja moža zamianiać źniavoleńnie i vystupać niečym nakštałt prymusovaha lačeńnia», — kaža seksołah.

Ale pakul, jak źviartaje ŭvahu ekśpiert, nie vielmi zrazumieła, chto budzie hetym zajmacca ŭ Biełarusi. Mahčyma, hetuju spravu pierakinuli na psichijatraŭ, ale, jak pakazvaje praktyka, psichijatry nie majuć nieabchodnych viedaŭ u halinie seksałohii, adpaviedna niezrazumieła, jak jany buduć z hetym spraŭlacca. A moža, hetuju zadaču voźmuć na siabie sudovyja seksołahi, jakija jość u našaj krainie.

Nakolki heta efiektyŭnaja miera? Na dumku ekśpierta, usio zaležyć ad kankretnaj situacyi. Nasamreč isnujuć davoli składanyja rasstrojstvy, źviazanyja ź piedafilijaj, i jany, jak kaža seksołah, časam patrabujuć peŭnych mier strymlivańnia.

Chimičnaja kastracyja — heta bolš humanny mietad, čym kastracyja chirurhičnaja, jana šmat dzie praktykujecca, hety mietad maje jak prychilnikaŭ, tak i tych, chto vystupaje suprać. Miedyk ličyć, što chacia b na niejki čas chimičnaja kastracyja mahła b być dla čałavieka faktaram strymlivańnia.

Seksołah tłumačyć, što ciapier nie tolki ŭ Biełarusi, ale i ŭ śviecie nazirajecca ŭsio bolš parafiličnych (źviazanych z seksualnymi adchileńniami) i, u pryvatnaści, piedafiličnych rasstrojstvaŭ. Čamu? «Dumaju, što heta źviazana ŭ cełym z ahulnasuśvietnym rostam napružańnia ŭ sacyjalnym asiarodździ z ulikam ekanamičnych, palityčnych i sacyjalnych tendencyj. Raniej ludzi z takimi zaležnaściami byli čymści abmiežavanyja, u tym liku ich strymlivała asiarodździe. Ciapier, kali napružańnia vielmi šmat, takija ludzi jaho nie vytrymlivajuć, bo ŭ ich nie vielmi dobra naładžany miechanizmy psichałahičnaj abarony, što abmiažoŭvajuć našy pavodziny. Tamu ŭ ludziej mienš mahčymaściaŭ strymlivać svaje anamalnyja pavodziny, i jany robiacca ich zakładnikami».

Ale tut jość składanaść, jakuju važna ŭličvać. Z adnaho boku, jak raskazvaje miedyk, isnuje piedafilija, i heta davoli ciažkaje rasstrojstva, a ź inšaha — sustrakajucca piedafilnyja pavodziny, jakija bolš blizkija da absesiŭna-kampulsiŭnych rasstrojstvaŭ. Piedafilnyja pavodziny — heta, chutčej, nie pra imknieńnie da dziaciej, a pra adpaviednyja dumki, jakim čałaviek sprabuje supraćstajać, naprykład, pra zaležnaść ad dziciačaj parnahrafii ci fantazij na hetuju temu, jakim čałaviek moža dać rady. Ale hetyja dumki i fantazii nikoli nie realizujucca. Davoli ciažka adroźnić piedafiliju ad piedafilnych pavodzinaŭ, i praktyčna nichto hetym nie zajmajecca.

Na dumku seksołaha, chimičnaja kastracyja apraŭdvaje siabie jak miera lačeńnia, bo na fonie źnižeńnia libida možna pravodzić psichaterapieŭtyčnuju pracu. Ź inšaha boku, heta nastolki indyvidualnaja źjava, što, na pohlad miedyka, amal niemahčyma pradkazać, ci padydzie čałavieku chimičnaja kastracyja. Jość šmat navukovych artykułaŭ, jakija dakazvajuć, što heta paśpiachovy mietad, i stolki ž artykułaŭ, pavodle jakich jon biessensoŭny i navat škodny.

«Na niekatorych ludziej preparaty chimičnaj kastracyi nie ŭpłyvajuć, jany nie panižajuć hetym ludziam libida. Taksama vielmi časta pacyjenty manipulujuć pracesam chimičnaj kastracyi: prykryvajucca im i pry hetym praciahvajuć učyniać supraćpraŭnyja dziejańni. Pry hetym ich nielha ni ŭ čym abvinavacić, bo jany byccam by lečacca.

Z adnaho boku, heta čakanaje novaŭviadzieńnie, ja razumieju jaho niekatoruju kaštoŭnaść. Ź inšaha boku, sumniavajusia, što da chimičnaj kastracyi buduć padychodzić indyvidualna ŭ kožnym kankretnym vypadku. Jakija tady buduć nastupstvy, niezrazumieła», — padsumoŭvaje seksołah.

«Najbolš efiektyŭny mietad karekcyi». Minzdaroŭja prakamientavała prymusovaje lačeńnie piedafiłaŭ

Uvodzicca administracyjnaja adkaznaść za «prapahandu nietradycyjnych seksualnych adnosin» i biaździetnaści

Aleh Hajdukievič: My za prymusovuju kastracyju piedafiłaŭ

• 6
• 0
• 1
• 4
• 7
• 2
• 8
• 0