Palicyja Kijeŭskaj vobłaści: abvinavačany ŭ złačynstvach u Bučy ŭradženiec Biełarusi abvieščany ŭ vyšuk, spravy nie zakryli
Siarhieja Kałaceja nazyvajuć nie biełaruskim hramadzianinam, a akurat uradžencam Biełarusi.
U hałoŭnym upraŭleńni Nacyjanalnaj palicyi Ukrainy ŭ Kijeŭskaj vobłaści paviedamili, što spravy suprać mazyranina Siarhieja Kałaceja, jakoha padazrajuć u datyčnaści da zabojstvaŭ mirnych žycharoŭ u horadzie Buča Kijeŭskaj vobłaści padčas rasiejskaj akupacyi, nie zakryli i praciahvajuć jaho vyšuk u suviazi tym, što jon chavajecca ad śledstva, jak piša «Radyjo Svaboda».
«Paviedamlajem, što śledčy adździeł Bučanskaha ŭpraŭleńnia palicyi ŭ Kijeŭskaj vobłaści ažyćciaŭlaŭ dasudovaje rasśledavańnie ŭ asobnym kryminalnym viadzieńni pavodle prykmiet kryminalnych pravaparušeńniaŭ, praduhledžanych č. 1 i č. 2 artykuła 438 («Parušeńnie zakonaŭ i zvyčajaŭ vajny») Kryminalnaha kodeksa Ukrainy, padčas jakoha padazravanaha ŭradženca Respubliki Biełaruś abviaścili ŭ vyšuk u suviazi z tym, što jon chavajecca ad śledstva», — adznačajecca ŭ adkazie na aficyjny zapyt «Svabody».
Siarhieja Kałaceja ŭ hetym adkazie nazyvajuć nie biełaruskim hramadzianinam, a akurat uradžencam Biełarusi.
U toj ža čas palicyja Kijeŭskaj vobłaści admoviłasia adkazać na pytańnie, čym zaviaršyłasia paŭtornaja pravierka fakta słužby Siarhieja Kałaceja ŭ rasiejskich vojskach.
Kiraŭnica adździeła kamunikacyi palicyi Kijeŭskaj vobłaści Iryna Pranišnikava matyvavała hetuju admovu zakanadaŭčaj zabaronaj raskryvać źviestki dasudovaha śledstva biez dazvołu śledčaha ci prakurora.
Letaś u žniŭni Kijeva-Śviatošynski rajonny sud Kijeŭskaj vobłaści pradoŭžyŭ dasudovaje rasśledavańnie spravy Siarhieja Kałaceja da 2 listapada 2022 hoda. Pakolki inšych rašeńniaŭ suda ab pradaŭžeńni śledstva nie publikavali, peŭna, jaho spynili i abviaścili biełarusa ŭ vyšuk, ale spravu, jak vynikaje z adkazu palicyi, nie zakryli.
Što papiaredničała
Spravu na Siarhieja Kałaceja zaviali treciaha krasavika 2022 hoda pavodle č. 1 i 2 artykuła 438 Kryminalnaha kodeksa Ukrainy «Parušeńnie zakonaŭ i zvyčajaŭ vajny, jakoje zaklučajecca ŭ biaźlitasnym staŭleńni da cyvilnych, abjadnanych z naŭmysnym zabojstvam». Heta karajecca pazbaŭleńniem voli na 10-15 hadoŭ abo pažyćciovym źniavoleńniem.
Mazyranina identyfikavali pa videazapisach z mazyrskaha adździaleńnia SDEK, apublikavanych u krasaviku, na jakich Siarhiej Kałacej pakavaŭ dla adpraŭleńnia pasyłku.
Pavodle śledstva, 18 sakavika 2022 hoda na miažy vulic Nazaryja Jaramčuka i Jabłunskaj u horadzie Buča Kijeŭskaj vobłaści Siarhiej Kałacej zastreliŭ pa čarzie čatyroch hramadzian Ukrainy.
2 maja 2022 hoda śledstva nakiravała Siarhieju Kałaceju tekst padazreńnia praź miesiendžary Telegram i WhatsApp. Śledčyja šeść razoŭ vyklikali biełarusa na dopyt, a paśla taho, jak jon nie źjaviŭsia, sud uchvaliŭ rašeńnie ab jahonym zavočnym aryšcie i abviaściŭ u vyšuk.
Siarhiej Kałacej ad pačatku admaŭlaje svaju vinu, jak i toj fakt, što niadaŭna naviedvaŭ Ukrainu. Pa słovach Kałaceja, jon maje tolki biełaruski pašpart i apošni čas znachodziŭsia ŭ Biełarusi. U materyjałach spravy jaho nazyvajuć hramadzianinam Rasiei.
Tahačasnaja hienieralnaja prakurorka Ukrainy Iryna Vieniadziktava zajaŭlała, što śledčyja sabrali biassprečnyja dokazy ab datyčnaści da rasstrełu čatyroch žycharoŭ Bučy ŭ Kijeŭskaj vobłaści, u tym liku biełarusa Siarhieja Kałaceja.
19 lipienia 2022 hoda Viarchoŭnaja rada Ukrainy adpraviła Irynu Vieniadziktavu ŭ adstaŭku, a 28 lipienia novym kiraŭnikom prakuratury staŭ Andrej Kościn. Jon byŭ vybrany ŭ Viarchoŭnuju Radu Ukrainy ad praŭładnaj partyi «Słuha narodu» i da pryznačeńnia pracavaŭ kiraŭnikom parłamienckaha kamiteta pravavoj palityki.
Kamientary