Sioleta ŭ Katalickim Kaściole Advent — pieryjad padrychtoŭki da pieražyvańnia tajamnicy Uciełaŭleńnia Božaha Syna — raspačynajecca 29 listapada. Advent praciahvajecca da 24 śniežnia, kali adznačajecca Vihilija Božaha Naradžeńnia.
Hety pieryjad dzielicca na dźvie častki: dni da 16 śniežnia źjaŭlajucca časam radasnaha čakańnia paŭtornaha pryjścia Chrysta na skančeńnie śvietu. Z 17 da 24 śniežnia praciahvajecca padrychtoŭka da ŭračystaści Naradžeńnia Pana, jakaja śviatkujecca 25 śniežnia.
U Advent uvieś Kaścioł, jakim źjaŭlajecca Narod Božy, radasna, u malitvie i zasiarodžańni čakaje prychodu Zbaŭcy. U hety čas nie adbyvajucca hučnyja zabavy. Vierniki taksama zaachvočvajucca da ŭstrymańnia ad drennych zvyčak i, biezumoŭna, da pracy nad saboju. Praktykujecca ŭziaćcie pastanovaŭ na hety čas. Charaktar adračeńniaŭ kožny vyznačaje dla siabie asabista abo pa paradzie śviatara. Usio heta robicca dziela naviartańnia i lepšaha pieražyvańnia radasnaj viestki — Božaha Naradžeńnia.
Malitoŭnyja praktyki — biezumoŭnaja častka Adventu. Vielmi pryhožaj źjaŭlajecca tradycyja ŭdziełu ŭ raratnich śviatych Imšach, jakija adbyvajucca na dośvitku i celebrujucca ŭ honar Božaj Maci. Padčas hetych liturhij, jakija raspačynajucca pry zhašanym śviatle i zapalenych śviečkach, hučyć śpieŭ‑malitva: «Śviet naš abmyjcie, čystyja rosy, Zbaŭcu śviatoha dajcie, Niabiosy». Abaviazkam kožnaha viernika źjaŭlajecca taksama ŭdzieł u parafijalnych adventavych rekalekcyjach.
«Heta čarhovy Advent u žyćci kožnaha čałavieka, za jakim idzie Božaje Naradžeńnie, — adznačaje Mitrapalit Kandrusievič u sioletnim pasłańni na Advent. — Zaniepakojenyja składanaj situacyjaj sučasnaha čałavieka, my iznoŭ pytajemsia, što čynić, kab nie raźminucca z nadychodziačym Panam? Śviaty Jan Chryściciel adkazvaje: naviartajciesia. A heta aznačaje: idzicie ŭ pustyniu svajho duchoŭnaha žyćcia, kab, znachodziačysia zdalok ad homanu sučasnaha śvietu, pačuć Taho, jaki žyvie ŭ nas, i vyzvalicca ad homanu źniešniaha i ŭnutranaha, jaki značna bolš hrozny, bo zahłušaje čałaviečaje sumleńnie».
