Rašeńnie pra toje, što infarmacyjnaja pradukcyja, raźmieščanaja na sajcie bk-brest.by, źjaŭlajecca «ekstremisckimi materyjałami», pryniaŭ 7 lipienia sud Leninskaha rajona Bresta. Jak vynikaje z raskładu, hetuju spravu razhladała sudździa Ała Vinahradava.
Hazieta «Briestskij kuŕjer» — adno ź pieršych hramadska-palityčnych rehijanalnych vydańniaŭ Biełarusi, stvoranych paśla abviaščeńnia niezaležnaści krainy. Pieršy numar vyjšaŭ u červieni 1990 hoda i byŭ nadrukavany ŭ Vilni, a sa śniežnia taho hoda hazieta pačała drukavacca ŭ rodnym horadzie, piša BAŽ.
Hazieta vychodziła raz na tydzień i aśviatlała značnyja hramadskija padziei ŭ rehijonie i Biełarusi. Tematyčny i žanravy dyjapazon «Briestskoho kuŕjera» składaŭsia z navin, kamientaroŭ, repartažaŭ, žurnalisckich rasśledavańniaŭ, analityčnych ahladaŭ i listoŭ čytačoŭ. Vydańnie šmat uvahi nadavała padziejam z kulturnickaha i spartyŭnaha žyćcia rehijona.
U 1999 hodzie haziecie «Briestskij kuŕjer» była prysudžana mižnarodnaja premija «Maładaja presa Uschodniaj Jeŭropy» niamieckaha fondu Zeit-Stiftung.
U suviazi z ekanamičnym kryzisam u Biełarusi ŭ 2015 hodzie redakcyja była vymušanaja skaracić nakład, a ŭ kancy 2017 hoda štotydniovik praź finansavyja prablemy pačaŭ vychodzić nierehularna. U 2018 hodzie papiarovaja viersija «Briestskoho kuŕjera» całkam spyniła isnavańnie, a jašče praz hod uładalniki vydańnia vystavili na prodaž redakcyjny budynak. Z taho času pieryjadyčna abnaŭlajecca tolki sajt «Briestskoho kuŕjera», dzie źmiaščajucca pieravažna materyjały kulturnickaha źmiestu.
Pavodle padlikaŭ pravaabaroncaŭ, ź lipienia 2020 hoda i na hety momant sudy Bresckaj vobłaści ŭžo 212 razoŭ pryznavali «niepažadanymi» ŭ toj ci inšaj formie sajty, staronki ŭ sacyjalnych sietkach, čaty albo kanały.
«Ja musiła hladzieć miesca dla ludziej, jakija pierachodziać miažu. Što moža pajści nie tak?» Dramatyčnaja historyja aryštu Alesi Bunievič1
Kamientary