Amierykanskaja karaleva soŭła pakinuła dva tastamienty: praź niekalki miesiacaŭ adzin znajšli ŭ šafie, druhi pad paduškaj. Ciapier pamiž dziećmi idzie sud
Kali Areta Franklin pamierła ŭ 2018 hodzie, svajaki karalevy soŭła i adnoj sa znakamitych amierykanskich śpiavačak dumali, što jana nie pakinuła nijakich rasparadžeńniaŭ pra los svajoj šmatmiljonnaj majomaści. Adnak praź niekalki miesiacaŭ jany vyjavili adrazu dva tastamienty, napisanyja ŭ roznyja hady. Ciapier syny Franklin sudziacca pamiž saboj, kab vyrašyć, jaki z dakumientaŭ treba ličyć sapraŭdnaj volaj śpiavački.
Tastamienty Arety Franklin znajšli ŭ jaje majontku ŭ Detrojcie, štat Mičyhan, praź dzieviać miesiacaŭ paśla jaje śmierci ad raku. Adzin ź ich lažaŭ u začynienaj šafie, a inšy vyjavili ŭ natatniku, jaki lažaŭ pad adnoj z padušak kanapy ŭ haścinaj.
U abodvuch vypadkach spadčyńnikami śpiavački stanuć jaje dzieci, ale, miarkujučy pa ŭsim, kiravańnie jaje hrašyma ŭ roznych dakumientach apisanaje pa-roznamu.
Adzin z synoŭ nastojvaje, što sapraŭdnym treba pryznać dakumient, datavany červieniem 2010 hoda (jon znachodziŭsia ŭ začynienaj šafie). Dvoje inšych ličać, što ciapierašni tastamient byŭ napisany značna paźniej, u sakaviku 2014-ha (kali byli zapoŭnienyja niekalki staronak u natatniku).
Starejšy syn śpiavački Kłarens Franklin u sudzie nie ŭdzielničaje. Jon žyvie ŭ śpiecyjalnym pansijanacie ŭ Mičyhanie i znachodzicca pad zakonnaj apiekaj.
Vyrašyć sprečku treba budzie sudu prysiažnych z šaści čałaviek.
Słuchańni pačalisia ŭ paniadziełak, i čakajecca, što rašeńnie prymuć da kanca tydnia. Sud vysłuchaje pakazańni śviedak synoŭ Arety Franklin, jaje plamieńnicy Sabryny Oŭens i ekśpierta-hrafołaha.
Čym adroźnivajucca tastamienty
Abodva tastamienty napisanyja ad ruki — z natatkami na palach i takim počyrkam, što miescami jaho ciažka rasšyfravać.
U bolšaści štataŭ takija dakumienty nie majuć zakonnaj siły, ale ŭ Mičyhanie rukapisnyja tastamienty pryznajucca, kali adpaviadajuć inšym kryteram.
Teador Uajt II — treciaje dzicia Franklin ad jaje niadoŭhaha šlubu z byłym mieniedžaram — śćviardžaje, što nataryjalna zavierany 11-staronkavy dakumient 2010 hoda pavinien ličycca sapraŭdnym zaviaščańniem.
U im jon pryznačajecca adkaznym za hrašyma maci razam ź plamieńnicaj Franklin Sabrynaj Oŭens. Raniej Oŭens kiravała hrašyma asabista.
Taksama ŭ hetaj viersii zaviaščańnia ŭtrymlivajecca zaklik da Kiekałfa i Edvarda Franklina — druhoha i čaćviortaha synoŭ śpiavački — atrymać dypłom abo stupień u halinie biznesu, kali jany chočuć atrymać vyhadu ad spadčyny śpiavački.
Adnak Kiekałf i Edvard nastojvajuć, što asnoŭnaja vola ich maci ŭ viersii zaviaščańnia 2014 hoda na čatyroch staronkach, napisanych u natatniku.
U im kiravać spadčynaj z Oŭens pryznačajecca jakraz Kiekałf, a nie Teador Uajt II. Tam taksama skazana, što jon i jaho ŭnuki pavinny atrymać u spadčynu asabniak Arety Franklin koštam 1,2 młn dalaraŭ.
Advakat apiekuna Kłarensa Franklina zajaviŭ Bi-bi-si, što ź jaho bratami ŭdałosia dasiahnuć pahadnieńnie, jakoje daje Kłarensu peŭny pracent ad majomaści, niezaležna ad vyniku sudovaha pracesu.
Što zastałosia paśla Arety Franklin
Akramia majontka, značnuju častku spadčyny Arety Franklin składajuć hrošy, zaroblenyja śpiavačkaj za čas jaje karjery, i aŭtarskija pravy na jaje muzyčnuju spadčynu.
Paśla śmierci Franklin u 2018 hodzie jaje bahaćcie aceńvałasia ŭ 80 młn dalaraŭ. Adnak z tych časoŭ acenki byli značna źnižanyja, u tym liku praź niavypłačanyja padatki: ciapier ličycca, što pamier spadčyny składaje kala 6 młn dalaraŭ.
Dakumient ad 2014 hoda taksama praduhledžvaje, što sceničnyja sukienki Franklin pavinny być albo pradadzienyja z aŭkcyjonu, albo pieradadzienyja Śmitsanaŭskamu instytutu ŭ Vašynhtonie.
Na fonie ciažby Sabryna Oŭens uchiliłasia ad abaviazkaŭ kiraŭnika majomaściu svajoj ciotki, spasłaŭšysia na toje, što Areta Franklin zaŭsiody achoŭvała svajo pryvatnaje žyćcio i spravy siamji i nie ŭchvaliła b šumichi vakoł svajho zaviaščańnia.
«Ja lublu svaich stryječnych bratoŭ, nie adčuvaju da ich nijakich drennych pačućciaŭ i zyču im usiaho najlepšaha», — zajaviła jana.
Na praciahu bolš čym paŭviekavoj muzyčnaj karjery 20 albomaŭ Arety Franklin uvachodzili ŭ pieršuju dziasiatku amierykanskich chit-paradaŭ, dziasiatki sinhłaŭ pradavałasia nakładam zvyš miljona asobnikaŭ, a sama śpiavačka 18 razoŭ atrymlivała najvyšejšuju muzyčnuju premiju «Hremi».
Jak i mnohija afraamierykanskija vakalisty svajho pakaleńnia, Franklin pačynała śpiavać hośpieł — relihijnyja śpievy ŭ baptysckich cerkvach, ale z časam stała sapraŭdnym univiersałam, uklučyŭšy ŭ svoj repiertuar džaz, soŭł, rytm-end-bluz i rok-n-roł.
Kaho z palitviaźniaŭ mohuć vypuścić paśla anonsu Łukašenki?3
Kaho z palitviaźniaŭ mohuć vypuścić paśla anonsu Łukašenki?
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»11
Kamientary