Saudaŭskaja Aravija i Turcyja viaduć tajemnyja pieramovy pa viartańni ŭkrainskich dziaciej z Rasii i Biełarusi — Financial Times
Pavodle infarmacyi krynic vydańnia, Ukraina i Rasija ŭ hetym pytańni nastolki nieprymirymyja, što nie majuć nijakich pramych kantaktaŭ. Tamu na dapamohu prychodziać pasiaredniki ŭ asobie niekatorych krain i navat peŭnych ludziej.
18 lipienia vydańnie Financial Times sa spasyłkaj na niekalki krynic paviedamiła ab tajemnym imknieńni Turcyi i Saudaŭskaj Aravii paspryjać viartańniu dadomu ŭkrainskich dziaciej z Rasii i Biełarusi.
Krynicy, znajomyja ź situacyjaj, padkreślivajuć, što i Ukraina, i Rasija z-za «nadzvyčajnaj adčuvalnaści i sprečnaści pytańnia» nie viaduć anijakich pramych pieramoŭ na hetu temu.
Tamu niekatoryja krainy i asobnyja ludzi voś užo niekalki miesiacaŭ sprabujuć niepublična hrać rolu pasiarednikaŭ z metaj zaklučyć damovu ab repatryjacyi ŭkrainskich dziaciej.
«Niepasrednaj suviazi pamiž ukrainskim i rasijskim bakami niama, bo havorka idzie nie pra zvyčajny abmien vajennapałonnymi, a pra viartańnie cyvilnych asob. Tym bolš havorka idzie pra dziaciej, što robić pytańnie nadzvyčaj sprečnym i adčuvalnym.
Bakami navat nie viaducca centralizavanyja zapisy ab tym, kolki dziaciej było vyvieziena z Ukrainy. Na dapamohu ŭ hetym i inšych pytańniach prychodziać niekatoryja krainy, naprykład, Saudaŭskaja Aravija i Turcyja, a taksama isnuje pasiarednictva asobnych ludziej, jak rasijski biznesmien Raman Abramovič», — piša vydańnie Financial Times sa spasyłkaj na svaje krynicy.
Nahadajem, što pytańnie vyvazu ŭkrainskich dziaciej užo stała pryčynaj dla vydačy ordara na aryšt prezidenta Rasii Uładzimira Pucina z boku Mižnarodnaha kryminalnaha suda.
Rasijskija ŭłady z pačatku vajny va Ukrainie aktyŭna vyvoziać adtul tysiačy dziaciej i adpraŭlajuć ich u svaje łahiery, sanatoryi pryjomnyja siemji i h. d., sprabujučy pry hetym pieravychavać nacyjanalnuju śviadomaść dziaciej i navat navučajučy ich vałodać zbrojaj.
U hetym pracesie taksama ŭdzielničaje i režym Łukašenki ŭ Biełarusi, na zahad jakoha ŭ krainu ŭžo było vyvieziena niekalki tysiač ukrainskich dziaciej, što publična pryznali prapahandysty, a taksama aficyjna paćvierdzili ŭkrainskija ŭłady.
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu12
Kamientary