Siońnia anłajn-marafon u padtrymku palitviaźniaŭ. Dałučajciesia!
29 lipienia biełaruskija niezaležnyja miedyja i pravaabarončyja inicyjatyvy arhanizujuć anłajn-marafon «Nam nie ŭsio adno!», kab sabrać hrošy dla palitviaźniaŭ i ich siemjaŭ. Jak paŭdzielničać i što budzie ŭ efiry?
Marafon budzie ad 10 ranku da 10 viečara pa minskim časie na šmatlikich niezaležnych jutub-kanałach. Tranślacyja budzie i na kanale «Našaj Nivy».
Padzieju padtrymlivaje bolš za 20 niezaležnych miedyja.
Hrošy dla palitviaźniaŭ možna danacić užo ad učora. Zbor zakryvajecca ŭ 23:59 30 lipienia. Dapamohu buduć źbirać na adzin rachunak. Kab zadanacić, pierachodźcie na sajt salidarnasc.com.
Na efiry buduć Śviatłana Cichanoŭskaja, Pavieł Łatuška, kiraŭnik «Bajsoła» Andrej Stryžak, błohier Andrej Pavuk, palitołah Arciom Šrajbman, błohiery Saša Ivulin i Mikita Miełkazioraŭ, muzyki Juryj Stylski i Pit Paŭłaŭ, piśmieńnica Śviatłana Kurs i mnohija inšyja. U efiry buduć i byłyja palitviaźni.
Što budzie dalej z sabranymi srodkami?
Paśla anłajn-marafonu projdzie pieršaje pasiadžeńnie naziralnaj rady z pradstaŭnikoŭ miedyja, što realizoŭvajuć prajekt. Jany prymuć rašeńnie ab tym, jak raźmierkavać sabranyja srodki pamiž arhanizacyjami-ŭdzielnicami marafonu, a tyja, u svaju čarhu, zmohuć na sabranyja hrošy dapamahčy siemjam palitviaźniaŭ, ź jakimi pracujuć. Praź niejki čas (mierkavana, praz try miesiacy) naziralnaja rada vyvučyć spravazdačy arhanizacyj i ahučyć publičnuju zajavu pra toje, na što pajšli srodki.
Jakija arhanizacyi ŭdzielničajuć:
- sacyjalny prajekt INeedHelpBY;
- prajekt dapamohi palitźniavolenym biełaruskam «Palitviazynka»;
- pravaabarončaja inicyjatyva dapamohi palitviaźniam Dissidentby;
- fond dapamohi biełarusam u Litvie RAZAM;
- inicyjatyva BY_help;
- Biełaruskaja asacyjacyja palitviaźniaŭ «DA VOLI»;
- Biełaruskaja rada kultury;
- fond miedycynskaj salidarnaści ByMedSol;
- Biełaruski fond spartyŭnaj salidarnaści;
- fond biełaruskaj salidarnaści BYSOL;
- dabračynny fond «Kraina dla žyćcia»;
- publičnaja dabračynnaja arhanizacyja Littouwin LIONS CLUB;
- Anarchičny čorny kryž — Biełaruś.
Pavodle padlikaŭ «Viasny», u krainie ciapier 1475 palitviaźniaŭ. Pravaabarončaja inicyjatyva Dissidentby nazyvaje ličbu ŭ 1741 čałaviek. Hety tyja, chto ciapier znachodzicca ŭ niavoli za palityku.
Arhanizatary padziei nahadvajuć pra miery biaśpieki — nie varta danacić z vykarystańniem rasijskich ci biełaruskich płaciežnych instrumientaŭ. Taksama, kali vy znachodziciesia ŭ Biełarusi, nie repościcie, nie łajkajcie i nie kamientujcie tranślacyi sa svaich piersanalnych akaŭntaŭ.
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY14
Kamientary
šmat