Ci možna nie płacić pa kredycie, aformlenym na prośbu machlaroŭ?
U ŚMI rehularna traplaje infarmacyja, jak biełarusy z navodki telefonnych machlaroŭ afarmlajuć kredyty na svajo imia, a potym pieravodziać hrošy na rachunki ašukancaŭ, jakija vydajuć siabie za supracoŭnikaŭ milicyi ci bankaŭ. Časam heta vializnyja sumy. Ci jość mahčymaść nie vypłačvać hetych kredytaŭ banku?
«Ź jurydyčnaha punkta hledžańnia i atrymalnik, i bank usio zrabili pravilna»
Ekśpiertka BEROC Nastaśsia Łuzhina adznačaje, što niezaležna ad taho, z čyjoj inicyjatyvy byŭ uziaty kredyt, vypłačvać jaho ŭsio roŭna daviadziecca.
«U lubym vypadku vydatki na pahašeńnie kredytu pavinny być na kahości ŭskładzienyja. Jany kładucca na čałavieka albo na sam bank. Zychodziačy z praktyki, adkaznaść za dziejańni pierš za ŭsio laža na samoha čałavieka», — kaža Łuzhina.
Ekśpiert adznačaje, što pakolki čałaviek sam vyjaviŭ žadańnie, sam pryjšoŭ u adździaleńnie i aformiŭ kredyt, to ź jurydyčnaha punkta hledžańnia i atrymalnik, i bank usio zrabili pravilna.
«Bank nie pavinien achviaravać ułasnymi srodkami praź finansavuju nieabaznanaść nasielnictva. A toj fakt, što pracedura pačałasia z-za machlaroŭ, nie zdymaje adkaznaści z čałavieka, jaki pavieryŭ u hetyja schiemy i pahadziŭsia na dadzienyja dziejańni», — ličyć Łuzhina.
Pry hetym ekanamistka nie vyklučaje, što z bankam možna sprabavać vieści dyjałoh, choć heta i składany praces. Tym bolš, što ciapier pačaścilisia vypadki, kali ludzi biaruć kredyt pad ašukanskija schiemy i bank im ich afarmlaje.
Ekśpiertka ličyć, što nie isnuje varyjanta śpisać usio na bank, abvinavaciŭšy jaho ŭ tym, što jon nie pavinien byŭ afarmlać hety kredyt. Tamu bank budzie patrabavać, kab atrymalnik viarnuŭ hrošy. Bo heta nie vina banka, što čałaviek pavieryŭ ašukancam.
«Dla praduchileńnia takich vypadkaŭ pierš za ŭsio treba pracavać nad pavyšeńniem finansavaj abaznanaści, kab ludzi razumieli, z čym jany mahu sutyknucca», — kaža Łuzhina.
Prabačeńnie daŭhoŭ achviaram moža sparadzić novy vid machlarstva
Taksama ekśpiert tłumačyć, čamu banki nie mohuć iści na sastupki i daravać ludziam daŭhi, kali tyja pahraźli ŭ ich z-za ašukanskich dziejańniaŭ. Taki padychod moža pryvieści da źjaŭleńnia novych ašukanskich schiem.
«Kali jaki-niebudź niadobrasumlenny hramadzianin budzie viedać, što jon moža aformić kredyt, a potym zajavić, što jon heta zrabiŭ z-za taho, što jaho padmanuli ašukancy, i ničoha nie vypłačvać, to heta moža sparadzić novy vid machlarstva», — tłumačyć ekśpiert.
«Nieabchodna, kab sud pryznaŭ damovu niesapraŭdnaj»
Juryst Siarhiej Zikracki taksama kaža, što kali hramadzianin zaklučyŭ kredytnuju damovu, atrymaŭ kredyt i vykarystaŭ jaho, to jon musić hety kredyt viartać.
Zikracki adznačaje, što dla taho, kab nie viartać kredyt, nieabchodna, kab sud pryznaŭ damovu niesapraŭdnaj. Ale juryst pryznajecca, što nie bačyć vialikich šancaŭ dla hetaha.
«Artykuł 180 Hramadzianskaha kodeksa Respubliki Biełaruś vyznačaje padstavy dla pryznańnia ŭhody niesapraŭdnaj u tym vypadku, kali jana była ździejśniena pad upłyvam padmanu, hvałtu ci pahrozy. Adnak hety artykuł prymianiajecca tolki ŭ tym vypadku, kali padman, hvałt ci pahroza zychodzili ad boku pa damovie (nu albo kali taki bok byŭ u zmovie z tym, chto ažyćciaŭlaŭ padman, hvałt ci pahrozu)», — tłumačyć Zikracki.
Tamu da taho času, pakul nie dakazana, što bank zahadzia damoviŭsia z machlarami ab padmannym atrymańni imi kredytu, padstaŭ dla prymianieńnia artykuła 180 Hramadzianskaha kodeksa niama.
«Taksama ŭ Hramadzianskim kodeksie Respubliki Biełaruś jość artykuł 179, jaki daje padstavy dla pryznańnia niesapraŭdnaj uhody, praviedzienaj pad upłyvam pamyłki. Adnak hety artykuł prymianiajecca tolki ŭ tym vypadku, kali pamyłka maje istotnaje značeńnie. Naprykład, hramadzianin mieŭ namier atrymać kredyt na budaŭnictva, ale pry zapaŭnieńni formy abraŭ nie toj kredyt i atrymaŭ kredyt na spažyvieckija patreby.
Pry hetym u Hramadzianskim kodeksie skazana, što pamyłka adnosna matyvaŭ uhody nie maje istotnaha značeńnia. Heta značyć, toj fakt, što hramadzianin pamylaŭsia ŭ tym, ci biare kredyt dla siabie, ci dla taho, kab pieradać jaho kamuści inšamu (a heta i jość matyŭ), nie moža słužyć padstavaj dla pryznańnia ŭhody niesapraŭdnaj», — tłumačyć Siarhiej Zikracki.
«Vypłačvać kredyt daviadziecca ŭ lubym vypadku»
Najbolš pravilnymi dziejańniami ŭ takoj situacyi juryst nazyvaje zvarot u milicyju dla ŭstanaŭleńnia fakta machlarstva. Ale heta nie aznačaje, što čałavieka aŭtamatyčna pazbaviać abaviazkaŭ viartać hrošy banku.
«Vypłačvać kredyt daviadziecca ŭ lubym vypadku, ale kali ŭdasca ŭstanavić asobu machlaroŭ, to možna budzie dabivacca spahnańnia ź ich paniesienych strat, da jakich buduć adnosicca i płaciažy pa kredycie, jaki hramadzianin pavinien banku. A kali machlaroŭ nie znojduć, to značyć namahacca spahnać straty budzie niama z kaho».
Ci mohuć čałavieka pryznać bankrutam?
Prajści praceduru bankructva taksama nie atrymajecca, bo biełaruskaje zakanadaŭstva nie praduhledžvaje takoj mahčymaści ŭ dačynieńni da fizičnych asob, jakija nie zarehistravanyja ŭ jakaści IP.
Tamu paźbiehnuć abaviazkaŭ pa vypłacie kredytu takim čynam nie atrymajecca. Bolš za toje, niepahašanyja pazyki zakranuć i naščadkaŭ, jakija majuć prava atrymać spadčynu. Praŭda, naščadkam nie daviadziecca vypłočvać pazyki za pamierłaha svajaka sa svaich hrošaj. A voś zastacca biez spadčyny jany mohuć, kali vartaść majomaści ci inšych aktyvaŭ pamierłaha nie pierakryjuć sumu zapazyčanaści.
«Naša Niva» — bastyjon biełaruščyny
PADTRYMAĆ
Kamientary