«Ruskija — heta fašysty». Jak intervjujerka Łukašenki pieraabuvałasia prosta padčas vajny
Prapahandystka Dyjana Pančanka, jakaja ŭziała ŭ Łukašenki intervju, jašče hod tamu pisała zusim nie toje, što kaža paśla pierajezdu ŭ Rasiju.
Alaksandr Łukašenka dniami daŭ intervju prarasijskaj prapahandystcy z Ukrainy Dyjanie Pančanka.
Raniej taja pracavała na telekanałach, źviazanych z kumam Pucina Viktaram Miedźviedčukom, a praz paru miesiacaŭ paśla pačatku vajny va Ukrainie pierajechała ŭ Rasiju i pačała pracu na rasijskuju prapahandu. Za heta na radzimie na jaje zaviali kryminalnuju spravu.
Paśla vyjezdu z Ukrainy Pančanka paśpieła vydalić vialikuju kolkaść pastoŭ sa svajho telehram-kanała. Bolšaja ich častka adnosiłasia da pieryjadu lutaha — žniŭnia 2022 hoda, abo pieršaha paŭhoda vajny.
My znajšli niekatoryja z tych vydalenych publikacyj pry dapamozie servisu Tgstat i vyrašyli pakazać ich vam. Charakterna, što źmiest hetych pastoŭ moh by stać vydatnaj padstavaj dla aryštu luboha zvyčajnaha čałavieka jak u Rasii, tak i ŭ samoj Biełarusi.
«Rasija prajhrała jašče 24 lutaha, padpisaŭšy prysud sabie i svaim adeptam»
Ciapierašniaja adeptka vajny i rasijskaj prapahandy Dyjana Pančanka jašče ŭ krasaviku minułaha hoda pisała, što zaŭsiody maryła vieści efir mienavita z ukrainskaha Daniecka, a Rasija, uvarvaŭšysia va Ukrainu, tolki padpisała sabie i svaim adeptam prysud.
U jašče adnoj svajoj publikacyi za toj ža krasavik jana vykazvałasia voś tak:
«Kaliści dzieci hulali ŭ vajnuški pamiž našymi i fašystami. Ciapier zamiest fašystaŭ — ruskija. Kaliści sinonimam słova «izalacyja» była Paŭnočnaja Kareja, a siońnia — Rasija. Kaliści ŭvasableńniem zła byŭ Hitler, a zaraz — Pucin.
Trahiedyja ŭ tym, što ŭ svaim samarazbureńni Rasija zabivaje našych ludziej. Najlepšyja z nas hinuć u bitvie z cmokam.
Ja zaŭsiody kazała, što maru pravieści efir u našym, ukrainskim Daniecku. Ale ja pamyliłasia. Rasija — heta kraina, jakaja razumieje tolki siłu. Jana prajhrała», — pisała Dyjana Pančanka ŭ svaich vydalenych publikacyjach jašče ŭ pieršyja miesiacy vajny va Ukrainie.
Hetyja pasty, jak i mnohija inšyja, prapahandystka vydaliła jašče ŭ siaredzinie žniŭnia 2022 hoda, kali ŭciakała z Ukrainy.
Cikava, što taja, jakaja «zaŭsiody kazała» pra žadańnie pravieści ŭłasny efir va ŭkrainskim Danbasie, sapraŭdy ździejśniła svaju maru — ale na inšym baku kanfliktu i na akupavanaj Rasijaj terytoryi. U tym prapahandysckim repartažy Pančanka apraŭdvała rasijskuju ahresiju suprać Ukrainy, za što na jaje i zaviali kryminalnuju spravu na radzimie.
Aproč inšaha, prarasijskaja prapahandystka z Ukrainy vydalała i tyja zapisy, dzie maliłasia za Uzbrojenyja siły Ukrainy, nazyvała rasijskuju prapahandu «tupoj i ŭporataj», a taksama padtrymlivała baraćbu ŭkraincaŭ suprać «kryvavaj impieryi» za svaju svabodu, kaštoŭnaści i žyćcio.
«Da vajny ja časta krytykavała ŭładu, ale heta maja, NAŠA kraina. I kali da nas prychodziać sa zbrojaj, heta vyklikaje hnieŭ i nianaviść.
Impieryja trymajecca na kryvi i strachu, joj dla vyžyvańnia treba vajavać, zabivać i naviazvać. Ale voś paradoks — nam naviazvać niama čaho. Ruskaja prapahanda pa sutnaści ŭžo pazbaŭlena sensaŭ, akramia svajoj tupoj i ŭporataj siły.
Baraćba lepšaja za strach. Mienavita tamu my pieramožam. Impieryja zabivaje z-za strachu syści ŭ niabyt. A my vajujem za svabodu, kaštoŭnaści i žyćcio», — dzialiłasia svaimi dumkami Dyjana Pančanka ŭ krasaviku.
Užo paśla pierachodu na bok Rasii prapahandystka pačnie supiarečyć samoj sabie i krytykavać ukraincaŭ za ich baraćbu i niežadańnie pajści na mir na rasijskich umovach.
Plus da ŭsiaho, niahledziačy na ačystku papiarednich pastoŭ, Pančanka pakinuła niekranutymi niekalki cikavych publikacyj, jakija dahetul jość na jaje telehram-kanale. Heta reposty ŭkrainskich i zamiežnych vydańniaŭ ab varjactvach rasijskaj armii va Ukrainie, fiksacyi rasijskich abstrełaŭ hramadzianskaj infrastruktury, a taksama abvinavačvańnie Rasii ŭ masavych zabojstvach ukrainskich dziaciej.
Va ŭsioj hetaj historyi samym cikavym źjaŭlajecca toj fakt, što padobnyja publikacyi (navat u vydalenym vyhladzie) pryviali b da nieadkładnaha aryštu luboha zvyčajnaha čałavieka ŭ Biełarusi i Rasii za «ekstremizm» i hetak dalej.
Pa prykłady doŭha chadzić nie treba: u Biełarusi mohuć zatrymać ci dapytać tolki za sam fakt najaŭnaści ŭkrainskaha hramadzianstva, albo asudzić za prostaje vykanańnie ci prasłuchoŭvańnie ŭkrainskich piesień (prytym, što režym Łukašenki nie nazyvaje siabie pramym ŭdzielnikam vajny va Ukrainie i ŭsialak zajaŭlaje ab siabroŭstvie pamiž dvuma narodami).
U toj ža čas u samoj Rasii, kudy źbiehła prapahandystka Dyjana Pančanka, za krytyku ŭłady nie škadujuć navat samych viernych rasijskich patryjotaŭ i prychilnikaŭ «ruskaha śvietu», navat kali jany sami vajavali i słužyli ŭ śpiecsłužbach.
I viadoma ž, abodva režymy nie curalisia aryštaŭ nie tolki ŭkrainskich, ale i inšych zamiežnych hramadzian navat za mienšaje, čym jość u źmiestach vydalenych publikacyj Pančanka.
«Naša Niva» — bastyjon biełaruščyny
PADTRYMAĆStała viadoma, chto žanich byłoj deputatki Maryi Vasilevič26
Kamientary
Oni, vsie, troje odnoho pola jahody, niezavisimo ot zanimajemoj dołžnosti i ličnych riesursov, oni - pieški v ihrach Kriemla.
I popav na polanu russkoho fašizma v Rośsii i Biełarusi, oni budut jeho otricať.