Miadźviedzia sustreli ŭ Baraŭlanach, za 100 mietraŭ ad žyłych damoŭ
U adzin ź viečaroŭ Volha adpraviłasia na tradycyjny pramienad pa miascovym zakaźniku, što prylahaje da žyłoha masivu. U niejki momant dziaŭčynu pryciahnuŭ šum. Padumała, što sabaka, ale, pryhledzieŭšysia, pabačyła sapraŭdnaha miadźviedzia, piša Onliner.by.
— Usio adbyłosia litaralna za 100 mietraŭ ad damoŭ, kala mikrarajona Zialony Bor. Ja išła pa hałoŭnaj darožcy, dzie ŭvieś čas hulaje vielizarnaja kolkaść ludziej, a potym zbočyła na ściažynku, jakaja viadzie nazad u Baraŭlany, — raspaviadaje surazmoŭca. — Miadźviedź vyjšaŭ na darohu. Čas nabližaŭsia da źmiarkańnia, ja nie nadzieła akularaŭ, i siłuet źlivaŭsia ź lesam, ale ŭsio-tki razhledzieła, što pierada mnoj miadźviedź. A tak ja išła prosta na jaho.
U miadźviedziach nie raźbirajusia, ale, miarkujučy z usiaho, jon byŭ nie darosły, ale i nie maleńki. Zrazumieła, chto heta, i nohi, viadoma, pačali padkošvacca, ja raźviarnułasia i pavoli pajšła ŭ advarotny bok, a jon — na mianie.
Ubačyŭšy źviera, dziaŭčyna nie pačała kryčać, nie zamitusiłasia, i miadźviedź, nie vyjaŭlajučy nijakaj ahresii, nieŭzabavie raźviarnuŭsia i syšoŭ. Pry hetym Volha navat paśpieła zaśniać kasałapaha na telefon, a potym i apublikavała ŭ siabie ŭ instahramie.
Viartajučysia nazad, jana papiaredziła minakoŭ pra miadźviedzia, adnak daloka nie ŭsie joj pavieryli.
— Niekatoryja kazali, maŭlaŭ, dy dobra, vy žartujecie, vam zdałosia, ale ja im potym pakazvała videa. Ja sama tut žyvu vielmi daŭno i nikoli nijakich žyvioł nie sustrakała, — dadaje Volha.
Supracoŭnik Biarezinskaha bijaśfiernaha zapaviednika, mahistr pryrodaznaŭstva Alaksandr Rak kaža, što havorka, chutčej za ŭsio, idzie pra maładuju mihrujučuju žyviolinu, jakaja pierachodziła z adnaho miesca na inšaje.
Sa słoŭ Alaksandra, kali sustreli miadźviedzia, uciakać nie varta. Treba zahavaryć basam, pačać pavolna adychodzić i ni ŭ jakim razie nie pavaročvacca da źviera śpinaj.
Sioleta miadźviedzia ŭžo bačyli ŭ rajonie Ždanovičaŭ, a taksama ŭ Łahojskim rajonie kala vioski Zarečča.
Usiaho, na dumku Alaksandra Raka, u Biełarusi pražyvaje kala 500 miadźviedziaŭ.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary