U viadomaj biełaruskaj televiadučaj vyjavili redkuju i ciažkuju chvarobu — bakavy amijatrafičny skleroz
Maryja Lemiešava niekalki hadoŭ viała naviny sportu na ANT, ale pracu pryjšłosia kinuć.
Kali Maryja razmaŭlaje pa telefonie, to jana pramaŭlaje słovy vielmi pavolna i pryznajecca, što joj ciažka havaryć. Paśla niekalkich chvilin razmovy kamunikacyja pierachodzić u farmat pierapiski, piša «Sputnik».
Da 2022-ha Maryja była absalutna zdarovaj. Jana starałasia sačyć za saboj i na rehularnaj asnovie zajmałasia płavańniem, fitnesam, chutkaj chadźboj.
Letaś Maryja pierachvareła na karanavirus, paśla čaho ź joj pačali adbyvacca dziŭnyja rečy. Dziaŭčyna adčuła, što cieła jak byccam pierastała joj naležać: ciahlicy słabieli, stała ciažej chadzić, a ruka admaŭlałasia vykonvać rucinnyja zadačy. Pry hetym mozh praciahvaŭ pracavać.
«Ja pačała mižvolna padać, kali apranałasia. Pa-inšamu adčuvała nohi, ruki. Heta byli pieršyja prykmiety chvaroby», — uspaminaje Maryja.
Na rańniaj stadyi daktary stavili dyjahnaz pad pytańniem i prasili Maryju ničoha nie vyvučać u internecie, kab lišni raz nie nakručvać siabie. Jana hnała preč błahija dumki i praciahvała pracavać na telebačańni. Ale z kožnym dniom chvaroba prahresavała i nastojliva nahadvała pra siabie. Maryja słabieła, joj stanaviłasia składana rabić elemientarnyja rečy.
U pačatku hetaha hoda Maryja zvolniłasia.
«Inšaha varyjantu ŭ mianie nie było na toj momant. Emacyjna heta było vielmi ciažka. Ale viedaju, što dźviery telekanała dla mianie zaŭsiody adčynienyja», — padzialiłasia televiadučaja.
Źmirycca z tym, što ty bolš nie možaš zajmacca lubimaj spravaj i być na chvali pośpiechu i papularnaści, vielmi składana. Ale jašče składaniej uśviedamlać toje, što ty nie zdolny spraŭlacca biez dapamohi inšych ludziej.
«Samu pa sabie chvarobu pryniać vielmi ciažka. Dahetul idzie transfarmacyja śviadomaści. I heta nie pra honar, u mianie hetaha niama. A voś toje, što tabie pierastajuć być dastupnyja elemientarnyja rečy, što ty stanovišsia zaležnym ad kahości ŭ płanie dapamohi — heta ciažka», — adznačyła jana.
Ale kalehi nie pakidajuć Maryju i dapamahajuć joj: telefanujuć, pryjazdžajuć, kali niešta treba, pa miery svaich mahčymaściaŭ kuplajuć nieabchodnaje.
«Kalehi mnie vielmi dapamahajuć, za što ja im biaźmierna ŭdziačnaja», — pryznałasia surazmoŭnica.
Siońnia Maryja znachodzicca pad nahladam daktaroŭ RNPC nieŭrałohii i niejrachirurhii. Pry takim dyjahnazie lačeńnia jak takoha niama. Daktary prapanavali joj prajści kurs stvałavych kletak, kab spynić praces chvaroby. Jana pahadziłasia, choć razumieje, što harantyj nichto nie daje.
«Ciapier stan źmianiajecca ad miesiaca da miesiaca. I navat niezrazumieła, ad čaho heta zaležyć. Ale adnoj mnie spraŭlacca ciažka, treba kab byŭ chtości pobač i dapamahaŭ», — kaža Maryja.
U Maryi padrastaje 8-hadovy syn Jan. Jon — jaje hałoŭny matyvatar nie apuskać ruki i praciahvać zmahacca sa strašnym dyjahnazam. Chłopčyk razumieje, što ŭ mamy niešta balić, ale ŭ detali jana jaho nie pahružaje.
«Ni da čoha jamu heta viedać, treba bierahčy syna», — tłumačyć svaju pazicyju kłapatlivaja mama.
Pakul jana znachodzicca ŭ balnicy, za Janam pryhladaje jaho babula, śviakroŭ Maryi. Ź joj u jaje vydatnyja adnosiny, jana taksama dahladaje Maryju.
Bo televiadučaja z abjektyŭnych pryčyn nie moža pracavać, jana vielmi maje patrebu ŭ dapamozie, u tym liku finansavaj. Joj na pastajannaj asnovie patrabujecca reabilitołah, trenier, masažyst, leki. Dyj prosta, kab pahulać na vulicy, Maryi patrebny chtości, u kaho jość volny čas.
Pra svaju chvarobu Maryja napisała post u siabie na staroncy ŭ sacyjalnaj sietcy, nazvaŭšy svaju baraćbu z chvarobaj asabistaj Alimpijadaj.
«Trymać udar chvaroby, treniravać kožny dzień niepasłuchmianyja myšcy, biehčy ad drennych dumak, vyjhravać i prajhravać u sutyčcy ź niejronami — maja novaja realnaść pa toj bok ekrana i maja asabistaja Alimpijada», — napisała Maryja.
Jana vielmi spadziajecca pieramahčy svoj hrozny dyjahnaz i vieryć u cud.
Jak roŭna ŭ toje, što kali joj spatrebicca finansavaja dapamoha na lačeńnie, to jaje siabry nie pakinuć u biadzie.
«Ja vieru, što cud adbudziecca. Jak ža chočacca znoŭ nadzieć pryhožuju sukienku i lubimyja łodački, uziać z saboj synulu i prosta pajści hulać. Lohkaja svabodnaja pachodka. Z usim astatnim možna spravicca. I pa sutnaści ŭsio astatniaje — takaja drobiaź», — zaklučyła Maryja.
Bakavy amijatrafičny skleroz (BAS) — heta chvaroba niervovaj sistemy, kali admirajuć matornyja niejrony, u vyniku čaho atrafirujucca myšcy. Takuju chvarobu mieŭ piśmieńnik i fizik Styvien Chokinh.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary