Tank abstralaŭ kadeckaje vučylišča ŭ Pareččy pad Hrodnam — Reform.by
U pieršaj pałovie žniŭnia za 30 km ad Hrodna ŭ ahraharadku Parečča adbyŭsia incydent — tank streliŭ u bok nasielenaha punkta i trapiŭ u budynak Hrodzienskaha abłasnoha kadeckaha vučylišča. Pa ščaślivaj vypadkovaści nichto nie paciarpieŭ, paviedamlaje Reform.by na padstavie śviedčańnia svajoj krynicy, znajomaj ź situacyjaj.
Pavodle infarmacyi Reform.by, bajavaja mašyna ŭdzielničała ŭ vučeńniach pobač z Hožskim palihonam.
Ź nieviadomaj pryčyny ekipaž tanka, jak paviedamlajecca, zadraŭ stvoł i streliŭ. Snarad trapiŭ u plac kadeckaha vučylišča, adrykašeciŭ i razburyŭ ścianu susiedniaha budynka. Nichto ŭ vyniku nie paciarpieŭ.
Vajskoŭcy, jak śćviardžajecca, apieratyŭna adramantavali budynak, likvidavali paškodžańni. Aficyjna pra incydent ničoha nie paviedamlałasia.
Kamandna-štabnyja vučeńni z 6-j asobnaj hvardziejskaj miechanizavanaj bryhadaj, jakija ŭklučali etap z bajavoj stralboj, pačalisia na Hožskim palihonie 7 žniŭnia i praciahvalisia niekalki dzion. Paviedamlałasia, što padčas ich buduć adpracavanyja pytańni kiravańnia padraździaleńniami ŭ chodzie viadzieńnia bajavych dziejańniaŭ, a taksama budzie ŭličany vopyt vajny va Ukrainie, a mienavita — šyrokaje prymianieńnie bieśpiłotnych latalnych aparataŭ i ciesnaje ŭzajemadziejańnie tankavych i motastrałkovych padraździaleńniaŭ z padraździaleńniami inšych rodaŭ vojskaŭ.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant24
Kamientary