Sud ES paćvierdziŭ sankcyi suprać Hucaryjeva, jaki trapiŭ u čorny śpis za padtrymku Łukašenki
Ciapier razhladajecca kala 80 pazovaŭ ad biełarusaŭ i rasijanaŭ.
Sud Jeŭrapiejskaha sajuza ŭ sieradu adchiliŭ pazovy šerahu bujnych rasijskich pradprymalnikaŭ i ich siamiejnikaŭ, suprać jakich byli ŭviedzienyja piersanalnyja jeŭrapiejskija sankcyi, piša Deutsche Welle.
U pryvatnaści, adchilenyja pazovy pradprymalnika Michaiła Hucaryjeva, jaki trapiŭ u sankcyjny śpis ES suprać Biełarusi za padtrymku Alaksandra Łukašenki; byłoha ŭładalnika Trubnaj mietałurhičnaj kampanii (TMK) Dźmitryja Pumpianskaha (paśla ŭniasieńnia ŭ sankcyjny śpis jon vyjšaŭ ź bienieficyjaraŭ i rady dyrektaraŭ TMK), jaho žonki Haliny Pumpianskaj i syna Alaksandra Pumpianskaha (taksama pakinuŭ radu dyrektaraŭ TMK).
Sankcyi ŭ dačynieńni da hetych asob Rada ES abhruntavała padtrymkaj palityki, jakaja padryvaje terytaryjalnuju cełasnaść Ukrainy. Rasijanie paličyli, što ich unieśli ŭ sankcyjnyja śpisy niezakonna, i źviarnulisia ŭ sud u indyvidualnym paradku z patrabavańniem skasavać abmiežavalnyja miery.
Choć Dźmitryj Pumpianski nie ŭdzielničaŭ u vajennych dziejańniach niepasredna, jon zajmajecca dziejnaściu ŭ halinach ekanomiki, jakija słužać dla ŭrada Rasijskaj Fiederacyi važnaj krynicaj dachodaŭ, rastłumačyli DW u sudzie ES. U svaju čarhu Halina Pumpianskaja źviazanaja z mužam dziełavymi adnosinami, pakolki jana ŭznačalvaje fond, jaki naležyć jaho ž kampanii.
Kala 80 pazovaŭ ad rasijcaŭ i biełarusaŭ
Ciapier Sud ES u Luksiemburhu razhladaje blizu 80 pazovaŭ ad fizičnych i jurydyčnych asob z RF i Biełarusi, jakija asprečvajuć pastanovy ab sankcyjach, paviedamiŭ DW aficyjny pradstaŭnik suda Chartmut Ost.
Bolšaść spraŭ raspačataja rasijskimi biznesoŭcami, u dačynieńni da jakich dziejničajuć takija zachady, jak zamarožvańnie aktyvaŭ i zabarony na ŭjezd u Jeŭrasajuz, adnak vyjhrać sud dahetul udałosia tolki maci kiraŭnika PVK «Vahnier» Jaŭhiena Pryhožyna.
Praces razhladu takich pazovaŭ zvyčajna zajmaje hod. Bolšaść pazovaŭ rasijskich aliharchaŭ da Rady ES była padadzienaja ŭ 2022 hodzie.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary