Vadu ŭ paciarpiełych ad avaryi rajonach Minska ŭžo možna pić
Paśla niadaŭniaha nadzvyčajnaha zdareńnia na sietkach vodazabieśpiačeńnia ŭ Minsku žycharam niekalkich rajonaŭ stalicy rekamiendavali nie ŭžyvać vadu z kranaŭ. Ciapier śpiecyjalisty pravieryli jaje jakaść i zabaronu źniali.
Daśledavańnie pitnoj vady ŭ Minsku pravioŭ Minski haradski centr hihijeny i epidemijałohii. Proby brali na zbudavańniach i sietkach haspadarča-pitnoha vodapravoda, u sacyjalnych abjektach i žyłym fondzie, jakija zakranuła zona avaryi.
Na 14:30 9 vieraśnia centr paviedamiŭ, što ŭsie proby adpaviadajuć hihijeničnym narmatyvam pa pakazčykach biaśpieki ŭ chimičnym składzie.
Nahadajem, što ŭviečary 6 vieraśnia adbyłasia avaryjnaja situacyja na sietkach vodazabieśpiačeńnia, jakija zabiaśpiečvajuć vadoj Pieršamajski, Partyzanski i Saviecki rajony Minska. Paškodžańnie vadavoda ŭ rajonie parku Čaluskincaŭ paŭpłyvała na jakaść vady na vulicach Surhanava, Niakrasava, Biady, Uschodniaja, Jakuba Kołasa, Vałhahradskaja, Kuźmy Čornaha, Filimonava, Vysockaha, Ahinskaha, Bahracijona, Sołtysa, Karvata, Suviazistaŭ, praśpiekta Niezaležnaści ad vulicy Hikały da vulicy Filimonava.
Da likvidacyi niepaładak sanitarna-epidemijałahičnaja słužba Minska rekamiendavała dla pitnych met, hatavańnia ježy i zachavańnia praviłaŭ asabistaj hihijeny vykarystoŭvać padvaznuju abo butylavanuju vadu.
Paškodžańnie na vadavodzie haspadarča-pitnoha vodazabieśpiačeńnia ŭ parku Čaluskincaŭ likvidavali 8 vieraśnia. Taksama da hetaha času zaviaršyli pramyvańnie vodapravodnych sietak na vulicach, jakija zakranuła nadzvyčajnaje zdareńnie. Ale da zajavy sanitarna-epidemijałahičnaj słužby pra biaśpieku vady z krana jaje ŭsio adno raili nie pić i nie vykarystoŭvać dla hatavańnia ježy.
Kamientary