Praciahłaść pramianiovaj terapii dla lačeńnia raku prastaty možna značna skaracić biez parušeńnia efiektu — daśledavańnie 

Dozy terapii dla lačeńnia ankałohii prastaty mohuć być skaročanyja na try čverci, tamu zamiest 20 ci bolš pracedur pramianiovaj terapii pacyjentu moža być dastatkova i 5, ale z bolšym uzroŭniem apramieńvańnia (tak zvanaj «šmatpramianiovaj» terapii).

U mižnarodnym daśledavańni raku prastaty, jaki pravodzili miedyki i navukoŭcy z karaleŭskaj balnicy Marsdena ŭ Łondanie, brali ŭdzieł amal 900 chvorych na hety typ ankałohii mužčyn. Jany byli jašče na toj stadyi chvaroby, kali rak nie pačaŭ raspaŭsiudžvacca.

«Vyniki ŭściešyli jak miedykaŭ, tak i pacyjentaŭ. Praz 5 hadoŭ 96% mužčyn, jakija atrymali 5 doz šmatpramianiovaj terapii, nie mieli raku ŭ paraŭnańni z 95 % tych, chto prymaŭ standartnuju terapiju 20 razoŭ na niekalki miesiacaŭ. Pabočnyja efiekty (naprykład, patreba mačycca čaściej) byli drobnymi ŭ kožnaj z hrup. Heta pakazvaje, što takim čynam možna ekanomić i čas, i hrošy i, što samaje hałoŭnaje, atrymlivać lepšyja vyniki ŭ baraćbie z rakam prastaty», — piša ahienctva Bi-bi-si sa spasyłkaj na novaje daśledavańnie.

«Mianie vylečyli tak chutka, što ciažka źmirycca z tym faktam, što ŭ mianie niekali byŭ rak» — kaža adzin z mužčyn, chto prajšoŭ šmatpramianiovuju terapiju pa novaj mietodycy za 5 razoŭ u 1 tydzień. Jon kaža, što rehularna ciapier zdaje analizy i, miarkujučy pa im, pracedura pazbaviła jaho ad ankałohii.

Ciapier daktary-daśledčyki čakajuć, kali Nacyjanalnaja słužba achovy zdaroŭja Vialikabrytanii ŭkaranić taki sposab lačeńnia i dazvolić užyvać jaho ŭ špitalach. Jany ličać, što heta pryviadzie da stanoŭčych źmienaŭ u mietodycy praviadzieńnia pramianiovaj terapii i lačeńnia ankałohii.

Sajman Hryviesan, pamočnik dyrektara pa daśledavańniach u centry hramadskaj arhanizacyi «Prostate Cancer UK» kaža: «Fantastyčna bačyć, što novy typ šmatpramianiovaj terapii hetak ža efiektyŭny, jak i tradycyjnaja pramianiovaja terapija, i što heta moža dapamahčy mužčynam atrymać lačeńnie chutčej i sa značna mienšaj kolkaściu naviedvańniaŭ balnicy».

Daktary taksama zaklikajuć usich mužčyn, jakija starejšyja za 50 hadoŭ, zdavać analizy dla taho, kab chutka dyjahnastavać rak prastaty. Bo vyjaŭlenaja na rańnich stadyjach chvaroba lečycca praściej i nie supravadžajecca vialikaj kolkaściu pabočnych efiektaŭ.

Nahadajem, što rak prastaty źjaŭlajecca adnoj z najbolš raspaŭsiudžanych raznavidnaściaŭ ankałohii ŭ mužčyn, jakaja rehularna pryvodzić da śmiarotnych zychodaŭ. Štohod u śviecie dyjahnastujecca zvyš miljona vypadkaŭ uźniknieńnia i raźvićcia raku prastaty, i pry hetym nie zaŭsiody heta zachvorvańnie možna zaŭvažyć.

• 6
• 0
• 0
• 0
• 2
• 0
• 0
• 0