Minčuk znajšoŭ hihancki jadomy hryb, jaki zavažyŭ 11 kiłahramaŭ
Za paŭtary hadziny Mikałaju Kalainie ŭ lesie va Uździenskim rajonie ŭdałosia sabrać siem viodraŭ baravikoŭ i apieniek. Ale potym jaho čakaŭ sapraŭdny siurpryz.
Mikałaj Kalaina źbirać hryby pačaŭ jašče ŭ dziacinstvie, tamu lohka moža adroźnić iłžyvych dvajnikoŭ ad jadomych. Voś i hetym razam, pryjechaŭšy ŭ viosku da svajakoŭ va Uździenski rajon, pierš za ŭsio adpraviŭsia na cichaje palavańnie. Za paŭtary hadziny minčuku ŭdałosia sabrać siem viodraŭ baravikoŭ i apieniek, pišuć Minsk-naviny.
Mikałaj adnios zdabyču ŭ aŭtamabil i vyrašyŭ, što možna jašče pachadzić pa lesie. Druhaja vyłazka źbiantežyła: jon natknuŭsia na dziŭny hryb, jaki ni razu ŭ žyćci nie sustrakaŭ. Ros jon na jasieni nievysoka nad ziamloj.
— Adrazu ŭraziŭsia jaho pryhažościu, jon uvieś taki załacisty, — raspavioŭ Mikałaj Kalaina. — Ale tut ža praciała dumka: a raptam atrutny? Doŭha dumaŭ, ale ŭsio ž vyrašyŭ zrezać: było škada pakidać. Mučyŭsia kala 20 chvilin, bo nož byŭ zusim maleńkim, a paškodzić znachodku nie chaciełasia. Ale ŭsio roŭna razrezaŭ hryb napałovu, bo jon paprostu nie źmiaščaŭsia ŭ košyk. Kab danieści znachodku da mašyny, u les pryjšłosia schadzić dvojčy. A kali pryvioz u viosku, usie źbiehlisia pahladzieć na cud.
Na nastupny dzień Mikałaj viarnuŭsia ŭ Minsk i pačaŭ šukać, dzie možna pravieryć hryb. Patelefanavaŭ u niekalki łabaratoryj, źjeździŭ na bujnyja staličnyja rynki, ale ŭsiudy razvodzili rukami.
Vyručyli abaznanyja hrybniki, jakija padkazali, što heta jadomy trutavik. Ščaślivy ŭładalnik znachodki vyrašyŭ, što adnu častku hryba zamarozić, a inšuju pryhatuje roznymi sposabami. Zastałosia tolki recept znajści, kab usio zrabić pravilna.
— Viedaju, što z hrybami treba być aściarožnym. Treba vykonvać praviły biaśpieki, kab paźbiehnuć atručvańnia. Ale znajomyja ŭžo pasprabavali moj trutavik, ź imi ŭsio dobra. Chvalili navat. Pa smaku čymści nahadvaje miasa kurycy. Tamu i sam jaho z zadavalnieńniem pasmažu abo zvaru, trochi zasušu, a što zastaniecca — pakładu ŭ marazilnik. U mianie jany doŭha lažać nie buduć — da lutaha ŭsie sabranyja hryby dakładna źjem. Lublu hrybočki ŭ lubym vyhladzie, — adznačyŭ Mikałaj.
«Ja nie chaču adpuskać žyćcio». U piśmieńnicy Śviatłany Kurs rak na poźniaj stadyi10
Kamientary
fałas
nie ŭsie cichija palaŭničyja mažliva viedajuć, što luby "hryb" - heta pałavy vorhan hryba, cieła jakoha znachodzicca pad ziamloj