Ministerstva handlu Złučanych Štataŭ abjaviła ab novych abmiežavańniach dla šeraha hrafičnych pracesaraŭ Nvidia. Ciapier pad zabaronaju navat hulniavy pracesar RTX 4090.
Nvidia sutyknułasia z surjoznaj prablemaj z-za niadaŭna ŭviedzienych licenzijnych abmiežavańniaŭ z boku ministerstva handlu ZŠA na niekatoryja hrafičnyja pracesary i paskaralniki.
Jak adznačajuć ekśpierty, u adroźnieńnie ad papiarednich abmiežavańniaŭ, aryjentavanych na chutkaść złučeńnia na pryładzie, novyja praviły licenzavańnia zasnavanyja na parozie pradukcyjnaści.
Minułahodnija abmiežavańni zabaranili prodaž Nvidia H100, jaki zjaŭlajecca asnoŭnym pracesaram dla raspracoŭščykaŭ štučnaha intelektu ŭ ZŠA, takich jak OpenAI. Kab adpaviadać ekspartnym praviłam, Nvidia inviestavała ŭ raspracoŭku indyvidualnych praduktaŭ na bazie architektur Ampere i Hopper, stvoranych na asnovie aryhinalnych sieryj A100 i H100. Tak byli stvoranyja źlohku zapavolenyja viersii pad nazvami H800 i A800.
Adnak ciapier vytvorcy sutyknulisia z novym naboram pravił, jakija zabaraniajuć ekspart i hetaj pradukcyi.
Prablema paharšajecca tym, što navat hulniavy hrafičny pracesar RTX 4090 padpadaje pad dziejańnie hetych novych pravił, što paćvierdžana NVIDIA ŭ zajavie, padadzienaj u Kamisiju pa kaštoŭnych papierach i biržach (SEC).
Stroha kažučy, heta nie zabarona tolki dla Kitaja. Z dakumienta vynikaje, što novyja abmiežavańni ŭžyvajucca da «Kitaja i krain hrupy D1, D4 i D5 (uklučajučy, ale nie abmiažoŭvajučysia, Saudaŭskuju Araviju, Abjadnanyja Arabskija Emiraty i Vjetnam, ale vyklučajučy Izrail)».
Da hrupy D5 adnosiacca Biełaruś i Rasija, jak krainy, dzie jość vysokaja ryzyka parušeńnia pravoŭ čałavieka.
Novaja pastanova praktyčna ŭvodzić poŭnuju zabaronu na ekspart luboha hrafičnaha pracesara Nvidia. Jana achoplivaje «intehralnyja mikraschiemy, jakija pieravyšajuć peŭnyja parohavyja značeńni pradukcyjnaści (uklučajučy, ale nie abmiažoŭvajučysia, A100, A800, H100, H800, L40, L40S, i RTX 4090). Pad dziejańnie zabarony taksama padpadaje «lubaja sistema, jakaja ŭklučaje adnu ci niekalki pakrytych intehralnych schiem (uklučajučy, ale nie abmiažoŭvajučysia, sistemy NVIDIA DGX i HGX)».
Pa słovach ministarki handlu ZŠA Džyny Rajmonda, administracyja ZŠA ŭvodzić hetyja praviły, kab kantralavać dostup da vysokapradukcyjnych vyličalnych čypaŭ, u pieršuju čarhu z metaj abmiežavać mahčymaści Kitaja ŭ raźvićci svaich technałohij, asabliva ŭ vajennych metach.
Hetyja novyja praviły taksama zaklikanyja zakryć peŭnyja ščyliny, jakija zastalisia paśla minułaj zabarony i dazvalali zamiežnym kampanijam nabyvać takija čypy i ekspartavać ich u krainy, na jakija nakładziena embarha.
Nvidia zajaviła, što novyja abmiežavańni mohuć pieraškodzić jaje zdolnaści zaviaršyć raspracoŭku novych praduktaŭ u adpaviednaści z hrafikam, a taksama prymusiać pieranieści peŭnyja apieracyi z adnoj ci niekalkich krain, achoplenych zabaronaj.
Čytajcie jašče:
The New York Times: ZŠA ŭvodziać zabaronu na pastaŭki hrafičnych čypaŭ Nvidia i AMD u Rasiju i Kitaj
Nvidia zapłanavała vytvorčaść novych čypaŭ, jakija stanuć kankurentam Intel
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ156
Kamientary