Bobi Čarłtan pamior z-za traŭmy, atrymanaj u vyniku padzieńnia ŭ domie sastarełych
Stała viadomaja pryčyna śmierci lehiendarnaha byłoha futbalista «Mančester Junajted» i zbornaj Anhlii sera Bobi Čarltana. Jon pamior 21 kastryčnika va ŭzroście 86 hadoŭ.
Jak paviedamiła BBC, Čarłtan dažyvaŭ svoj viek u domie sastarełych, dzie dahladajuć ludziej z demiencyjaj. Jon straciŭ raŭnavahu, kali ŭstaŭ z kresła, upaŭ i stuknuŭsia ab padvakońnie i, mahčyma, batareju.
Supracoŭniki ŭstanovy praviali ŭ toj čas poŭnuju pravierku cieła, nie zaŭvažyli nijakich bačnych paškodžańniaŭ i zafiksavali, što ruchavaść Čarłtana, jak im zdavałasia, nie źmianiłasia. Ale potym jany zaŭvažyli aciok na jaho śpinie i vyklikali paramiedykaŭ. Renthien hrudnoj kletki i kampjutarnaja tamahrafija pakazali, što jon złamaŭ rebry i, vierahodna, u jaho raźviłasia pnieŭmanija.
Tady lekary vyrašyli, što paciarpiełamu varta akazać palijatyŭnuju dapamohu, a praz 5 dzion jon pamior. U chodzie rasśledavańnia było ŭstanoŭlena, što Čarłtan mieŭ šyrokuju historyju chvaroby, a taksama ŭ vieraśni zaraziŭsia karanavirusam.
Pryčynaj śmierci nazvali traŭmu lohkich, padzieńnie i demiencyju.
Bolšuju častku karjery hulca, z 1956 da 1973 hoda, Čarłtan pravioŭ u składzie «Mančester Junajted». Hulajučy za hety kłub, jon zabiŭ rekordnyja 249 hałoŭ (našmat paźniej hety rekord byŭ pabity Uejnam Runi), a ahulnaja kolkaść zhulanych za «Mančester Junajted» matčaŭ skłała rekordnyja 758 hulniaŭ (rekord byŭ pabity Rajanam Hihzam).
U 1966 hodzie, paśla pieramohi zbornaj Anhlii na čempijanacie śvietu pa futbole, Čarłtan atrymaŭ «Załaty miač» jak najlepšy futbalist hoda. Akramia taho, Čarłtan vyjhravaŭ čempijanat Anhlii i Kubak jeŭrapiejskich čempijonaŭ.
Čarłtan taksama viadomy tym, što vyžyŭ u avijakatastrofie ŭ Miunchienie ŭ 1958 hodzie, u jakoj raźbiŭsia samalot z kamandaj «Mančester Junajted» na borcie. Z 44 čałaviek, jakija znachodzilisia ŭ samalocie, zahinuli 23, jašče 19 atrymali ranieńni.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary