Vakalista Aerosmith abvinavacili ŭ seksualnym hvałcie

U dakumientach pa pazovie havorycca, što, kali jana pracavała madellu na Manchetenie, siabar zładziŭ dla ich sustreču z rok-hurtom paśla pakazu mod. U toj dzień jana dvojčy zaznała seksualny hvałt, śćviardžajecca ŭ pazovie.

Pieršy incydent adbyŭsia na prahułcy, kali Tajler nibyta prymusiŭ jaje zajści ŭ telefonnuju budku, hruba źviartaŭsia da jaje, dakranaŭsia — Bielino «supraciŭlałasia z usich sił i sprabavała vyzvalicca, ale Tajler utrymlivaŭ jaje», śćviardžaje madel. Udzielniki hrupy «hladzieli, śmiajalisia i nie ŭmiešvalisia», havorycca ŭ dakumientach.

Druhi epizod adbyŭsia ŭžo ŭ bary hatela. Jak śćviardžaje madel, Tajler prycisnuŭ jaje da ściany i pačaŭ imitavać seks.

Pavodle jaje słoŭ, jana «supraciŭlałasia i ciahnuła jaho za vałasy». Tajler paklikaŭ jaje ŭ svoj pakoj, ale jana zmahła vyzvalicca i ŭciačy, napałochanaja i zapłakanaja.

Pa słovach Žanny Bielino, jana pieražyła «ciažki i niezvarotny emacyjny razład».

Tajler abvinavačvańni z boku madeli i padadzieny ŭ dačynieńni da jaho pazoŭ pakul nie kamientavaŭ.

Choć mierkavanyja incydenty adbylisia bolš za paŭstahodździa tamu, u pazovie śćviardžajecca, što Bielino pakutavała i budzie pakutavać ad mocnaha dušeŭnaha i cialesnaha bolu, ciažkich i pastajannych emacyjnych razładaŭ, fizičnych prajaŭ emacyjnaha stresu, źbiantežanaści, źniavahi i psichałahičnych traŭmaŭ».

U dakumiencie taksama adznačajecca, što jana «była špitalizavanaja i atrymała lačeńnie ŭ vyniku incydentu» i da hetaha času prymaje leki, «kab spravicca z seksualnym hvałtam».

Heta nie pieršaje abvinavačvańnie ŭ seksualnym hvałcie ŭ adras Tajlera. Raniej z anałahičnymi abvinavačvańniami vystupiła inšaja žančyna — Džulija Miśli. Pavodle jaje słoŭ, Tajler byŭ ź joj u niezakonnych seksualnych adnosinach, kali jana była jašče padletkam.

U jaje pazovie havaryłasia, što Tajler vykarystaŭ svoj status zorki šou-biznesu, kab «manipulavać, ekspłuatavać i ažyćciaŭlać seksualny hvałt». Jon navat pierakanaŭ baćkoŭ Miśli dazvolić jamu stać jaje zakonnym apiekunom, kab jon moh pieravieźci jaje praź miažu štata i nie aścierahacca aryštu.

Vakalist Aerosmith tyja abvinavačvańni adchiliŭ.

U Styviena Tajlera (imia pry naradžeńni Styvien Viktar Tałaryka), jaki naradziŭsia ŭ 1948 hodzie ŭ štacie Ńju-Jork, jość «biełaruskija karani». Jaho dzied pa matčynaj linii Fieliks Čarnyševič naradziŭsia ŭ 1892 hodzie ŭ Kličavie i ŭ 1924 hodzie emihravaŭ u ZŠA, dzie źmianiŭ proźvišča na Błanča. Fieliks — brat piśmieńnika polskaha pachodžańnia Fłaryjana Čarnyševiča, jaki naradziŭsia ŭ 1900 hodzie ŭ majontku pad Babrujskam.

Fłaryjan Čarnyševič — aŭtar cikavaha ramana «Nadbiarezincy» (1942), u jakim apaviadajecca pra dramatyčny los žycharoŭ šlachieckich zaścienkaŭ na ziemlach pamiž Biarezinaj i Dniaprom u 1911—1920 hadach. U 2017 hodzie raman vyjšaŭ pa-biełarusku.

• 2
• 0
• 10
• 21
• 1
• 1
• 3
• 0