Lidar «Spraviadlivaj Rasii» z žonkaj vyvieźli z akupavanaha Chiersona dziaŭčynku. Jany zapisali siabie jaje baćkami i źmianili joj imia

Novaja žonka lidara «Spraviadlivaj Rasii» Siarhieja Mironava ŭ 2022 hodzie vyviezła z akupavanaha Chiersona 10-miesiačnuju ŭkrainskuju dziaŭčynku, paśla čaho jany ŭdačaryli jaje i źmianili joj imia. Rasśledavańnie ab vykradzienych z Chiersona dzieciach praviali žurnalisty BBC Panorama i «Važnyja historyi», piša Bi-bi-si.

Dziejańni 70-hadovaha deputata i jaho 55-hadovaj žonki mohuć być kvalifikavanyja jak vajennaje złačynstva i hienacyd mižnarodnym kryminalnym sudom, jaki raniej vydaŭ ordary na aryšt Uładzimira Pucina i dziciačaha ambudsmiena Maryi Lvovaj-Białovaj.

Z rasśledavańnia vyśvietliłasia, što ŭ kancy žniŭnia 2022 hoda Ina Varłamava, jašče nie budučy ŭ aficyjnym šlubie ź Mironavym, naviedvała Dom dziciaci ŭ akupavanaj Chiersonskaj vobłaści. U pajezdcy jaje supravadžała namieśnik Mironava ŭ Dziarždumie Jana Łantratava. Z Chiersona jany pavieźli ŭ Maskvu dvaich dziaciej — 10-miesiačnuju Marharytu Prakapienku i dvuchhadovaha Illu Vaščanku.

Dziaŭčynka ŭ toj momant lačyłasia ad branchitu ŭ Chiersonskaj abłasnoj dziciačaj balnicy, raspaviała zahadčyca piedyjatryčnaha adździaleńnia Natalla Lucikava. Pavodle jaje słoŭ, Taćciana Zavalskaja, jakaja supravadžała Varłamavu, pryznačanaja paśla akupacyi Chiersona kiraŭnikom Doma dziciaci, patrabavała paskoryć vypisku dziaŭčynki ź lakarni.

Pavodle źviestak BBC Panorama, rodnaja maci dziaŭčynki admoviłasia ad jaje, miescaznachodžańnie baćki nieviadomaje.

«Kali ja spytała, čamu ja pavinna vypisvać chvorych dziaciej, Zavalskaja skazała, što taja žančyna ich abrała i paviazie ŭ Maskvu, užo ŭsio hatova i jość kvitki», — raspaviała Lucikava. Lekaram udałosia adkłaści vypisku tolki na tydzień.

Pa danych «Važnych istoryj», aficyjna dziaciej vyvozili z Chiersona dla «abśledavańnia, vyznačeńnia dalejšaj taktyki lačeńnia i prachodžańnia reabilitacyi».

U śniežni 2022 hoda Siarhiej Mironaŭ i jaho na toj momant užo aficyjnaja (i piataja pa liku) žonka aformili Marharycie dakumienty, zhodna ź jakimi, jany — jaje baćki. Akramia hetaha, jany źmianili dziaŭčyncy imia — u rasijskim paśviedčańni ab naradžeńni jana stała «Marynaj Mironavaj», miescam naradžeńnia zapisali padmaskoŭny Padolsk. Heta pieršy taki vypadak, pra jaki stała viadoma.

Praces udačareńnia možna prasačyć pa dakumientach, jakija akazalisia ŭ rasparadžeńni žurnalistaŭ.

Kab usynavić dzicia ŭ Rasii, patencyjnyja pryjomnyja baćki pavinny źviarnucca ŭ sud. Tak, spravu, jakaja tyčycca Maryny Prakapienki, u listapadzie minułaha hoda razhledzieŭ Padolski haradski sud Maskoŭskaj vobłaści. Zacikaŭlenaj asobaj pa im prachodziła žonka Mironava Ina Varłamava, a zajaŭnikam było kiravańnie padmaskoŭnaha Minsacraźvićcia № 16. Raniej heta ŭpraŭleńnie zapytvała ŭ Chiersonskaha doma dziciaci dakumienty, jakija paćviardžajuć, što Marharyta i Illa zastalisia biez apieki baćkoŭ.

Pra los Illi Vaščanki paśla taho, jak jaho pryvieźli ŭ Rasiju, viadoma mienš. U vieraśni 2023 hoda jon atrymaŭ novaje paśviedčańnie ab naradžeńni.

Žurnalisty źviartalisia da Mironava i Varłamavaj pa kamientary. Jany nie pažadali ich dać.

Paźniej Siarhiej Mironaŭ zajaviŭ, što heta fejk.

«Nie baču sensu reahavać na čarhovuju fejkavuju isteryju, raźviazanuju ŭkrainskimi śpiecsłužbami i ich zachodnimi kuratarami. Za čas majoj palityčnaj dziejnaści ja ŭžo pryvyk da takich źjaŭ, jak infarmacyjnyja ataki, raździmańnie iłžyvaj infarmacyi pra mianie, maich dzieciach, siamji, blizkich svajakach. Za ŭsim hetym staić adna meta-hrubaja asabistaja dyskredytacyja ŭsich, chto zajmaje siońnia nieprymirymuju patryjatyčnuju pazicyju», — napisaŭ Mironaŭ u svaim telehram-kanale

Jon dadaŭ, što chłuśnia nie budzie mieć nijakaha pośpiechu i Rasija ŭ vyniku atrymaje pieramohu. Mironaŭ padkreśliŭ, što mety, pastaŭlenyja ŭ ramkach SVA (tak u Rasii nazyvajuć vajnu va Ukrainie), buduć realizavanyja.

• 2
• 0
• 2
• 0
• 28